Vosa ena Vosa
Jemesa 1:5–6
E vakavulica vei keda o Jemesa na iApositolo na iusutu ni vakavukui mai vua na Kalou.
5 Ia kevaka sa lailai na vuku vua e dua vei kemudou, me kerea vua na Kalou, o koya sa solia vakalevu kivei ira kecega na tamata, a sa sega ni dauveivakadirideini; ka na solia ga vua.
6 Ia me kerekere ena vakabauta, me kakua ni vakatitiqa. Ko koya sa vakatitiqa sa vaka na ua ni waitui sa cagina ena cagi ka veitubuyaki.
Kerea vua na Kalou
A wilika o Josefa Simici na tikina oqo ka laki masu kina ena Veikau Tabu, ka raica na imatai ni Raivotu (raica Josefa Simici—Ai Tukutuku 1:11–17). E dua beka mai na nomudou matavuvale se o iko a vakasaqara na vuku ena masu ka a saumi mai? Vola ena nomu ivolaniveisiga.
Soli Vei Ira Kecega na Tamata
“Sa nodra dodonu na luve ni Kalou me ra lako mai vua na Kalou ka ciqoma na ivakatakila. … Sa sega ni digitaki ira vakailoa na tamata na Kalou: eda sa tautauvata kecega.”
Na Parofita Josefa Simici, Nodra iVakavuvuli na Peresitedi ni Lotu; Josefa Simici (Lewe ni Vuli ni Matabete i Melikiseteki kei na iSoqosoqo ni Veivukei 2007), 147.
Vakalevu
Vakalevu—sega ni saumi, ena loloma, vakavuqa.
Vakadirideina
Vakadirideina—vakalewa, vosacataka, vakacala. Sa kena ibalebale, ena sauma mai na Kalou ka na sega ni cudruvi iko ni ko masu yani ena yalodina Vua ni ko kerea na kena isau.
Ka na Soli Ga
Sa dau rogoca ka sauma na nomu masu na Tamada Vakalomalagi. Ena sauma mai o Koya ena Nona gauna ga ena veimataqali sala kecega—kena ivakaraitaki, ena veika ni nomu bula, mai na nodra veivuke na tani, se mai na domo lailai vinaka ni Yalo Tabu. Oqo eso na sala mo vakarautaki iko mo ciqoma na veidusimaki ni Yalotabu (mai na “iVakatakila,” Tudei ena Vakabauta [2004], 141–43):
-
Masuta na veidusimaki.
-
Mo vakarokoroko.
-
Mo yalomalua.
-
Muria na vunau.
-
Kilikili mo votai ena sakaramede.
-
Vulica na ivolanikalou e veisiga.
-
Mo dau tugana.
-
Ni vakasaqara na veidusimaki e gadrevi, mo vakasamataka na veika oqo ena nomu vakasama.
-
Vakasaqara ena vosota na lewa ni Kalou.
Kerekere ena Vakabauta
“E kaya na Parofita [Josefa Simici] ni gauna sa wilika oti kina na tikina oqo me sa na vakatovolea mada na Turaga ka kerekere Vua se me sa bula voli ga ena butobuto ena nona bula taucoko. … Sa wilika na ivolanikalou, ka sa kila vakavinaka, sa vakanuinui ga vua na Kalou na Tamana Tawamudu; sa qai tekiduru ka masu, ni sa kila ni na vakavukui koya na Kalou ena vuku sa gadreva dina sara. E vakavulica vei keda na Parofita o Josefa Simici na ivakavuvuli ni vakabauta—ena nona ivakaraitaki”
Peresitedi Thomas S. Monson, “The Prophet Joseph Smith: Teacher by Example,” Tambuli, June 1994, 5; Ensign, June 1994, 4.
iVakaraitaki mai vei Baraca Josefa, mai vei David Lindsley; veitaba o David Newman