Yalovinaka ni Vakabulai Tamaqu
O tamaqu ga a vakasaqara na dina ka kunei rau na daukaulotu. Rau a vakavulica vei keitou na kosipeli, ni oti ga o ya, rau a qai—papitaiso na noqu itubutubu, lima na taciqu kei na ganequ—kei au. A qaqaco cake sara na neitou ivakadinadina. Keitou a vulica e vuqa sara na ka, vakabibi na iVakabula kei na matavuvale.
Ena 1992, niu a se bisopi tiko e Filipaini, a tauvi mate ni uto o tamaqu. Mai na nona valenivolavola a kau sara yani vakatotolo ki valenibula. A kurabui na noqu matavuvale, ni sa tukuni mai ni sa curu bibi tiko e valenibula. Sa vaka me keitou sa rere. Ena mate oqo ena rawa ni mate kina o tamaqu. Sa tagi o tinaqu ka kerea me keitou masu.
Au sa qai vaka meu veilecayaki—ka votu mai na veika sa oti. Au a tagi, tekiduru ka masu. Sa luluvu dina na yaloqu, ka katakata sivia na lomaqu. Au a via kaila me lakotani na mosi ka kau tani na rere ena siga o ya. Au a qai masu ga, “Yalovinaka ni vakabulai tamaqu. A masu dina na yaloqu, ka me na saumi mai.
Ena bogi o ya sa vakadonui meu curu ki na tabana ni veiqaravi bibi. Sa sega tu ni vakilai koya o tamaqu, ka keitou sa tu vakarau na vo ni lewe ni nona matavuvale. A dua dina na gauna mosimosi vei keitou. Sa na sega ni macala na veika ni mataka. Niu sa vakamoce lo vua, au nanuma sara na imatai ni neitou lotu vakamatavuvale. Keitou a sarava kina e dua na iyaloyalo ni Lotu, na Families Are Forever.
Niu sa vakarau moce ena bogi o ya, sa mai tokitaki lesu kina o tamaqu vakavuravura vua na Tamana Vakalomalagi.
Na mate nei tamaqu, niu sa yabaki 22, a veisautaka sara ga e vica na drau na ka ena noqu bula. Ni sa mai yali o koya au sa qai kidava rawa na kaukauwa sa mai tu vei au. E levu na ka au sa mai cakava oqo sega ni ka vakatani baleta niu sa veisau ka vakatorocaketaki.
A sega ni sauma mai na Tamaqu Vakalomalagi na noqu masu, au a sega ni kila ni a rogoca o Koya na noqu masu. Au kila ni a vakarorogo tiko o Koya. Sa kila vakavinaka tu o Koya na veika sa yaco tiko vei au. E kila vakavinaka na gagadre ni neitou matavuvale ena gauna o ya, a qai soli mai kina na—kaukauwa me keitou curuma rawa na bolebole ni bula, ka yaloqaqa me votai ena veika ni bula. A vakavulica me keitou curuma na veivakatovolei ena vakabauta.
Sa sivi oqo e 15 na yabaki mai na siga rarawa o ya. Au se vuli tikoga, kau sa tubu tiko ena kosipeli. Au sa mai vakamatavuvale, kau marau ni keitou sa vauci vata ena valetabu. Au sa rai matua tikoga ki na ituvatuva ni kosipeli sa dusimaka vei keitou o tamaqu.
Mai na Veisorovaki kei na Tucaketale i Jisu Karisito, au kila ni dua na siga ena laki duavata tale na noqu matavuvale. Se vo levu na noqu bula, ia au marau niu na raici tamaqu ni cava na ilakolako oqo.