Faamolemole Laveai Lo’u Tama
O lo’u tamā o le tagata lea na sailia le upumoni ma mauaina faifeautalai. Na latou aoaoina i matou i le talalelei, ma na le’i umi, ae matou—papatiso loa—o o’u matua ma o’u tuagane ma uso e toalima. Na tutupu malolosi a matou molimau. E tele mea na matou aoaoina, ae maise lava mea e uiga i le Faaola ma aiga.
I le 1992, a o auauna ai o se epikopo o le matou uarota i Filipaina, na oso ai le ma’i fatu o lo’u tamā. Na faananati atu o ia i le falemai mai lona ofisa. Ina ua oo mai le tala ua taofia o ia i le potu o gasegase tigaina, na matuā faatei’a ai lava lo matou aiga. Na lofituina o matou loto i le popole. Sa itiiti lava se avanoa e toe manuia mai ai lo’u tamā. Na tagi lo’u tinā ma fai mai ia i matou uma ia matou tatalo.
Ou te le’i toe iloa se taimi i lena taimi—na tele naua mea e manatua na toe oo mai i lo’u mafaufau. Faatasi ai ma o’u loimata, na faapea ai loa ona ou tootuli e tatalo. Na matuā mamafatu lo’u loto, ma na toetoe a pa lo’u fatafata. Na ou manao foi ou te alaga leotele e tau tuumama ai le tiga ma aveese ai le fefe na lofituina ai a’u i lena aso. Nai lo lena, sa na ona ou tatalo lava, “Faamolemole laveai lo’u tamā.” O se tatalo faamaoni, na faamoemoe ina ia lagonaina mai.
O le po lena, na mafai ai ona faataga a’u i totonu o le potu o gasegase tigaina. Na faapea ona see atu lo’u tama i le koma, ma sa matou sauniuni o lo’u tina ma nai o’u tei mo se tulaga e sili atu ona leaga. Sa avea o se aafiaga tiga tele mo lo matou aiga. Sa le tulaga lelei ma le mautonu le lumanai. A o o’u faatofa leleoa atu ia te ia, na ou manatuaina ai la matou afiafi faaleaiga muamua lava. Sa matou matamata i le ata tifaga a le Ekalesia, E Faavavau Aiga.
A e ou te le’i moe i lena po, na faapea ona toe foi filemu atu ai lo’u tama faalelalolagi i Lona Tama Faalelagi.
O le maliu o lo’u tama, a o 22 o’u tausaga, na faailoaina ai le amataga o le faitau selau o suiga i lo’u olaga. O lona toesea ai, na ou iloaina ai na ia te a’u ni malosiaga ou te le’i iloaina. E tele atu mea na ou faia i lo’u olaga nai lo mea na semanu ou te faia aua na faapalasi mai i o’u luga ia suiga ma le tuputupu ae.
Ina ua le tali mai le Tama Faalelagi i la’u talosaga, e le’i i ai lava se taimi na ou manatu ai e le’i faafofoga mai o Ia ia te a’u. Na ou iloa lava na faafofoga mai o Ia. Na Ia silafiaina lelei le mea na ou oo i ai. Na Ia silafiaina lelei foi le mea na manaomia e lo matou aiga i lena taimi, ma o le mea lena na Ia tuuina mai ia i matou—o le malosi e faatoilalo ai luitau o le olaga, malosi e feagai ai ma le mea moni. Na Ia aoaoina i matou i le ala e taulima ai ma le faatuatua o matou tofotofoga.
Ua silia ma le 15 tausaga talu ona mavae atu lena aso mafatia. Ae o loo o’u aoao pea, ma ou tuputupu ae pea i le talalelei. O lenei ua fai lo’u lava aiga, ma ua ou fiafia lava ua faamauina i matou i le malumalu. E le’i toe sepu lava la’u vaai mai le auala na faataatia e lo’u tama mo i matou.
E ala i le Togiola ma le Toetu o Iesu Keriso, ou te iloa e i ai se aso o le a toe faatasi ai lo matou aiga. O loo i ai lava sa’u malaga umi e fai, ae ou te fiafia lava e mafaufau o le a ou vaai i lo’u tamā i le faaiuga o lena malaga.