Me Wawa Beka na Vuli Meu Kaulotu?
Au a qeretueti mai koronivuli torocake ena 1992 kau sa laki kerea sara vakaivola meu laki kaulotu tudei. Ni sa yaco mai na noqu ivola, au se qai curu wale sara ga ki na dua na univesiti vinaka e Nigeria meu vuli vuniwai.
Na vuli vuniwai e Nigeria e taleitaki vakalevu ka me kakua ni calati. Ni ra sa vosa vei au na itokani kei na noqu matavuvale meu kakua ni laki kaulotu, au a vakamacalataka ni o ya sa noqu ilesilesi kau sa namaka tiko mai ena ono na yabaki sa oti niu a mai lewena kina na Lotu. Au sa kila tu niu na mai vuli vuniwai tale ni oti na kaulotu, ia e vuqa era kaya niu na veivutunitaka.
Au sa vakavinavinaka vei ira na dauveituberi ni matavuvale, matavuvale, kei ira na itokani lewe ni Lotu era a tokoni au meu laki kaulotu. Na noqu vuli ena semineri, vulica na ivolanikalou, ka bulataka na kosipeli a rawa kina meu tudei tiko kina.
Niu kaulotu tiko au a nakinaki ka cakacaka vakaukauwa. Ni qai oti e 24 na vula au a qai vakacegui ena lagilagi. E dau vakalougatataki ira na daukaulotu na Turaga ia a sega ni yalataka ni ra na sega ni vakatovolei. Vei koya na daukaulotu ni Nigeria sa suka mai, na veivakatovolei e oka kina na tawa cakacaka kei na sega na ilavo ni vuli.
Ena tolu na yabaki ni oti na noqu kaulotu, au a taura ka rawata rawa e tolu na veitarogi, ia au a sega ni vakacurumi tale ki na koronivuli ni vuniwai. Ena tolu na yabaki oqori, au a sega talega ni kunea kina e dua na cakacaka. Au a tekivu vakabauta ni ra a rairai dina beka o ira na itokani kei na noqu matavuvale ni a cala na noqu biuta na koronivuli ni vuli vuniwai.
Niu kaulotu tiko au sa vakararavi tu ga vua na Turaga, ka meu sa vakatarai Koya me liutaka tikoga na noqu bula ena Nona lewa. Niu cakava oqori, sa vinaka mai na veika baleti au—ia a sega ni vaka au a namaka.
Ena dua na Sigatabu ni lolo au a lolo sara ka masumasu me vukei au na Turaga. Ena yakavi sa rogo sara ena katuba e dua na tukituki. Niu dolava, au kurabui niu raica e dua na itokani au a sotava ena dua na vuli ni tataqomaki ena ono na vula sa oti. A kaya ni galala tiko e dua na itutu ni dauveitaqomaki ena dua na kabani e cakacaka tiko kina o tuakana ka sa gadreva na kabani me tawani totolo na itutu o ya. Sa nanumi au sara tikoga mai o koya.
Ena siga tarava sa tauri au na kabani o ya. Na ka a yaco o ya sa vakadeitaka vei au ni Tamada Vakalomalagi e sega ni biuti au ka meu na vakanuinui tikoga Vua. Na cakacaka o ya sa idewadewa sara ga ni cakacaka tale eso.
Na veivakalougatataki vakalou e sega walega ni vakarautaki ena rawa ka vakayago. E vica vata na yabaki na dredre ni noqu bula ni oti mai na kaulotu, ia a vakalougatataki au vakayalo na Turaga. E veivakasalataki na noqu veivakalougatataki vakapeteriaki meu sa vakamau ni na yaco ga meu na vuli torocake. A yaco dina.
E dina ga niu sega ni lesu i koronivuli vuli vuniwai, au sa rawata talega na koroi ni qaravi akaude kei na vika. A qai vakalougatataki au na Turaga meu rawa ka vakalevu kau vakamau rawa kina.
Ni da kaulotu ena lagilagi, ena vakalougatataki keda na Turaga ni da cakacakataka me da vuli torocake ni oti o ya. E sega ni dua na ka me uasivia cake vua e dua na cauravou se goneyalewa, o ya me vakila, vulica, ka vakalougatataki ena cakacaka ni kaulotu.