Pe Tatau Ona Ou Tuua le Aoga mo se Misiona?
Na ou faauu mai le aoga maualuga i le 1992 ma na sosoo ai lava ma le tuuina i totonu o o’u pepa mo le faia o se misiona talai. E taunuu mai lo’u valaauga, ae faatoa taliaina foi a’u i se tasi o iunivesite aupito lelei lava i Nigeria ou te aoga ai faafomai.
I Nigeria o le taliaina i se aoga faafomai e matuā faigata ona maua ma e le tatau ona faamelea. Ina ua ou maua ni uunaiga mai nisi o uo ma aiga ina ia taatia lo’u valaauga faamisiona, sa ou ta’u atu ia i latou e faapea, na i ai so’u tiutetauave o le auauna atu ma sa ou tulimatai atu foi mo le faia o lea auaunaga talu lava ona ou auai i le Ekalesia i le ono tausaga na muamua atu. Sa ou mautinoa lava e mafai ona toe taliaina au i aoga faafomai pe a uma la’u misiona, ae na manatu le toatele o le a ou faanoanoa i la’u filifiliga.
Ou te faafetai lava i faiaoga o aiga, tagata o lo’u aiga, ma uo i le Ekalesia o e na lagolagoina la’u filifiliga ou te auauna atu. O le auai i le seminare, suesueina o tusitusiga paia, ma le ola i le talalelei na mafai ai ona ou tu malosi i o’u talitonuga.
A o o’u avea ai ma se faifeautalai, na ou faatutuina ni sini patino ma sa ou galue malosi. O le luasefulufa masina mulimuli ane, na ou mauaina ai se faamalologa aloaia mai le misiona. E faamanuiaina e le Alii ia faifeautalai ua ma’ea misiona ae e le’i folafola mai o le a latou le oo i ni tofotofoga. Mo le faifeautalai Nigeria ua ma’ea lana misiona, o na tofotofoga na aofia ai le leai o se galuega ma le lelava o se tupe mo le aoga.
O le tolu tausaga muamua talu ona ma’ea la’u misiona, sa ou sueina ma pasi ai ni suega ulufale se tolu, ae sa le mafai ona toe taliaina a’u i le aoga faafomai. O na lava foi tausaga e tolu, na le mafai ona ou maua se galuega. Sa faaosoosoina a’u e talitonu atonu na sa’o lava nisi o a’u uo ma o’u aiga, ma o se measese le faamelea o lo’u avanoa i le aoga faafomai.
I la’u misiona na ou aoao ai e lafo la’u avega i le Alii, o lea na ou tuu atu ai ia te Ia na te taitaia lo’u olaga i le mea e finagalo i ai o Ia. O le taimi lava na ou faia ai, na amata ai ona galulue mea uma mo a’u—ae sa le o le mea lea na ou fuafuaina.
I se tasi Aso Sa anapogi, na ou filifili ai e anapogi ma tatalo faatauanau mo le fesoasoani a le Alii. O le afiafi lena na tu’itu’i mai ai le faitotoa. Ina ua ou tatalaina le faitotoa, sa ou te’i i lo’u vaaia o se tagata na ou masani i ai i le taimi o aoaoga faamasani mo le puipuiga na ou auai i le ono masina ua te’a. Na fai mai o ia, na i ai se avanoa mo le taulimaina o le puipuiga i se kamupani na faigaluega ai lona uso matua, ma na manaomia vave lava e le kamupani se tagata e faigaluega ai. Ma sa na o a’u lava le tagata na mafaufau i ai.
O le isi aso na sosoo ai, na faafaigaluegaina ai a’u e le kamupani. O lenei aafiaga e tasi na faamautuina ai ia te au e faapea, e le’i tuulafoaiina a’u e le Tama Faalelagi ma na manaomia lo’u faalagolago atu ia te Ia. O le galuega na faamaonia le avea ma se auala na oo atu ai i isi galuega.
O faamanuiaga faalelagi e le fuatia i na o ausiga faaletino lava ia. Sa ou tauivi mo le tele o tausaga ina ua uma la’u misiona e su’e se tulaga mautu faaletino, ae na faamanuiaina a’u e le Alii i le faaleagaga. O lo’u faamanuiaga faapeteriaka na taialaina a’u ina ia ou faaipoipo ma faapea mai, o le a oo mai avanoa mo ni aoaoga maualuluga atu. Na faapena lava.
E ui ina ou te le’i alu lava i le aoga faafomai, ae ua ou mauaina ni faailoga e tutusa lava le maualuluga i le faatausitusi ma le matematika. Na iu lava ina faamanuiaina a’u e le Alii i le mautu i mea o le olaga nei ma na faapea foi ona ou faaipoipo.
Afai tatou te faia ni misiona faamamaluina, ua noatia le Alii e faamanuia i tatou a o tatou saili mulimuli ane mo ni avanoa mo aoga maualuluga atu. E leai se mea i le olaga o se alii talavou po o se tamaitai talavou e sili atu i aafiaga, aoaoga, ma faamanuiaga o se auaunaga faamisiona talai.