Lagasere kei na Talanoa
Ena gauna keirau sa kacivi kina kei Sandra na watiqu me keirau laki veiqaravi ki na Tabana ni Kaulotu e South Africa Durban, keirau sa saga me keirau cakava e dua na veivakatorocaketaki raraba. Sa 20 na yabaki na noqu lewena tu mai na Mormon Tabernacle Choir, ka dau veivuke ena valenivola o watiqu, ka daunitalanoa vei ira na gone e koronivuli. Ena gauna sa via dolava kina o peresitedi ni kaulotu na cakacaka ni kaulotu ena dua na tauni voleka, keirau sa kila ni oqo sa neirau madigi.
Keirau laki sikova sara na tauni o ya ka raica ni sega tu na valenivola ena veikoronivuli, ia e dua toka ga na ka ni lewenivanua ena loma ni tauni. Rau a vakatakilaitaki keirau na cauravou daukaulotu vei dairekita ni valenivola o ya. Keirau a kerea vua me keirau dautalanoa vei ira na gone, vakadua ena veimacawa. A lomalomarua vakalailai o koya, ia a mani vakadonuya me na laki vakaraitaka ka me keirau tekivu.
Era a tiko rawa e lima na gone ena imatai ni siga. Ka ra sa lewe levu tikoga mai. Ni oti e vica na vula sa mai vukei keirau e dua na marama, lewenilotu vou, e totoka sara na nona vosa Vakavalagi kei na Zulu. Sa tosocake tikoga na lewe ni vakarorogo, ka marau o dairekita kei ira na itubutubu ena ka oqo.
Era dau taleitaka na lagasere na kai Zulu, ka lagati na sere ena neirau gauna ni italanoa. Ni mai cava na neirau ilesilesi, sa laki yacova na rua se tolu na gauna ni lagasere kei na talanoa ena veimacawa vei ira e 100 na gone era mai vakarorogo. E veivakalougatataki dina ni keirau raici ira na gone ena veivanua me ra lagata na neimami sere ka cavuqaqataka na irorogo vei keirau.
E dua tale na veivakalougatataki mai na neirau veiqaravi ena vanua o ya. Ni toso na iwiliwili ni lewe ni Lotu e kea sa gadrevi me dua na vanua me vakayacori kina na lotu ena Sigatabu, ka sa solia wale kina o dairekita ni valenivola me keimami vakayagataka na valenivola.
Keirau a vakavinavinaka ni a vukei keirau na Turaga me keirau kunea na sala me vakayagataki na neirau taledi, qaravi ira na lewenivanua, ka vukea na kena dolavi e dua na tabana ni kaulotu.