Na iSolisoli ni Vuli
E taleitaka o neirau ulumatua tagane na vuli ena kidi ka vinaka toka na nona vuli. Ni sa kalasi dua sa vaka me laurai ni sega ni dau wili vola. E rawa ni wilika rawa eso na vosa ia e dredre vua na vakatekivu ni iwiliwili e soli mai vua. Ni toso na gauna, se sega tikoga ni vinaka na nona wiliwili. Keirau sa lomaleqa sara kina vakaveiwatini.
Ena dua na siga a votu mai vei au na ka a vakavulica o noqu peresitedi ni kaulotu. Au a laki kaulotu ki na dua na matanitu tani. E a bolebole vei keimami na daukaulotu na vosa vaka-Rusia, ka a vakasalataki keimami o peresitedi ni kaulotu me keimami wilika na iVola i Momani ena veisiga. A yalataka ni na vukei keimami na kaukauwa ni iVola i Momani me keimami kila na vosa vaka-Rusia. A dina o koya. A mani yaco meu cavuta ka kila vakavinaka na nodra vosa, ka qaqaco kina na noqu ivakadinadina.
Ni oti e vica na yabaki na noqu kaulotu, au a vakasamataka, “Keu sa cakava rawa mai Rusia, ena sega vakacava ni rawa vei luvequ ena vosa vaka-Valagi?” Niu sa talanoataka vei luvequ na noqu vulica rawa na vosa vaka-Rusia kei na ivakasala nei peresitedi ni kaulotu, keirau sa mani solia vua na bolebole me na wiliwili ga vakai koya mai na iVola i Momani ena veisiga. Sa qai dau makataka o koya na vosa Kalou kei na Turaga ni sa raica. A makataka sara na Jisu. E qai dau raica eso na vosa ka taroga na kedra ibalebale. A gugumatua tikoga ena wiliwili ena veisiga, ni qai cava na yabaki keirau sega ni namaka na kena totoka.
Ia sa kalasi ono tiko oqo o koya. Sa totoka sara na nona wiliwili ka vakavulici iratou na tacina e lima me baleta na isolisoli a ciqoma ni a wilika na iVola i Momani. Sa matata dina na nodratou wiliwili na luvei keirau ka makutu na wilika na iVola i Momani. Eratou sa vakila na kaukauwa tabu ni dina ni sa qaqaco cake na nodratou ivakadinadina.