Kanunay nga Maningkamot
Sa dihang 15 pa ang akong panuigon, ang mga misyonaryo naanad nga mokaon kauban sa among mga silingan. Ang akong maguwang nga babaye makakita kanila nga moadto ug molakaw matag adlaw, ug siya nangutana kanila kon sila namaligya ba og usa ka butang. Sila miingon og wala, ug mao kadto ang paagi nga sila naila-ila sa among pamilya. Ang akong papa, akong mama, ug akong mga igsoong lalaki ug babaye nakadawat sa mga leksyon ug ang tanan nabunyagan. Apan ako wala magpamiyembro. Nianang panahona ako nag-imbistigar og lain nga simbahan, apan ako kinasingkasing nga nagpangita.
Ang ika-10 sa Mayo sa Mexico mao ang Mother’s Day. Nianang adlawa, ang akong mama nangutana kanako kon ako nahigugma ba kaniya. Ako miingon, “Oo, ako nahigugma kanimo.”
Siya mipakigbahin sa iyang pagpamatuod ngari kanako ug mihangyo kanako nga ako magpabunyag. Ako mihukom sa pagpabunyag nianang adlawa. Pagkasunod Dominggo, ako nakumpirmahan ug nakadawat sa gasa sa Espiritu Santo. Nianang panahona ang akong kinabuhi hingpit nga nausab. Ako nagsugod sa pagbasa sa tanan nga akong mahimo kabahin sa Simbahan, ilabi na sa mga pagtulun-an ni Joseph Smith. Ako adunay hugot nga pagtuo, ug samtang ako nagtuon, akong gidawat ang mga pagtulun-an sa Simbahan. Ang akong hugot nga pagtuo mitubo samtang ako mitubo diha sa ebanghelyo.
Pagbuhat sa Paningkamot
Sa dili pa nako isulti kaninyo ang duha ka mga istorya kabahin sa akong kinabuhi, ako ganahan nga mohatag og gibug-aton sa usa ka butang nga kanunay nakong ihisgut sa akong mga misyonaryo sa dihang ako mialagad isip presidente sa misyon. Sa Isangyaw ang Akong Ebanghelyo, si Presidente Ezra Taft Benson (1899–1994) mikutlo nga nag-ingon: “Kanunay kong moingon nga usa sa labing mahinungdanong mga sekreto sa misyonaryo nga buhat mao ang pagtrabaho! Kon ang usa ka misyonaryo magtrabaho, makabaton siya sa Espiritu; kon makabaton siya sa Espiritu, magtudlo siya pinaagi sa Espiritu; ug kon magtudlo siya pinaagi sa Espiritu, matandog niya ang mga kasingkasing sa mga tawo ug magmalipayon siya. Walay mahitabo nga kamingaw, walay kabalaka kabahin sa mga pamilya, kay ang tanang panahon ug mga talento ug mga interes nakasentro man diha sa buhat sa pangalagad. Trabaho, trabaho, trabaho—walay lain pang makatagbaw nga hulip, ilabi na diha sa misyonaryo nga buhat.”1
Sa Spanish nga bersyon sa Missionary Guide, nga among gigamit sa wala pa ang Isangyaw ang Akong Ebanghelyo, ang pulong trabaho gihubad ngadto sa paningkamot. Dugang sa pagbuhat sa paningkamot, kinahanglan nga imong ipahinungod ang tanan nimong panahon, mga talento ug mga interes. Kini nga pokus kinahanglan alang sa kalampusan. Kon ikaw magmalipayon imbis nga masuko o mosumpaki, ang imong trabaho modala kanimo sa maayo nga mga butang.
Ako nakakat-on niini nga pormula sa akong kaugalingon nga kinabuhi. Ako misugod sa pagtrabaho sa usa ka dako nga kompanya sa lana sa mubong panahon human sa akong bunyag. Kini nga mga kamatuoran kabahin sa trabaho miabut sa akong kinabuhi ug midala sa akong pag-uswag diha sa kompanya.
Ang Pagbansay Makahimo og Oportunidad
Usa ka piho nga manedyer sa kompanya gamhanan gyud siya kaayo. Siya mihangyo nga ang matag departamento mopadala og duha ka mga tawo aron sa pagtabang kaniya sa pag-inbentaryo. Ug siya miingon nga ang kinahanglanon lamang mao nga kini nga mga tawo kahibalo sa accounting.
Ako nagtungha sa usa ka trade school, ug ako adunay usa ka sertipiko gikan sa akong mga klase sa accounting. Ang akong agalon sa departamento miingon, “Lakaw og ingna siya nga ikaw motabang kaniya sa pag-inbentaryo ug nga ikaw usa ka accountant. Gusto niyang makita ang reaksyon sa lain nga tawo tungod kay ako batan-on pa kaayo.
Sa dihang ako miabut, ang manedyer nangutana unsa ang akong tuyo. Ako mitubag, “Ako motabang kanimo sa paghimo sa inbentaryo.” Ako mibuhat sama sa giingon sa akong agalon ug ako siyang giingnan nga ako usa ka accountant. Siya mikatawa.
Dayon siya miingon, “Nan, Mr. Accountant, duol ngari sa akong lingkuranan. Dad-a kining adding machine, ug isuma kining tanan sa matag lista sa mga numero nga paspas kutob sa imong mahimo.”
Ako nagsugod sa usa ka tudlo, hinay kaayo. Siya mituklod kanako pagpahawa sa lingkuranan ug miingon, “Ikaw walay nahibaloan bisan usa ka butang, ikaw pagasilutan. Ikaw maglingkud niana nga lingkuranan sa akong atubangan sulod sa duha ka semana, magtan-aw unsaon nako pagbuhat ang trabaho.”
Ako mibalhin sa lain nga lingkuranan. Siya miingon, “Tan-awa ko.” Siya misugod sa pagsuma nga pas-pas kaayo, nga dili gani motan-aw sa iyang mga kamot. Ako nahingangha. Ako nagtuo nga siya nagbinuang nga magtan-aw lamang ako kaniya nga magtrabaho sulod sa duha ka semana, apan wala diay.
Sa unang adlaw ako milingkod didto sulod sa unom o pito ka oras. Nianang gabhiona ako nagpabilin pagkahuman sa trabaho ug nagpaabut sa tanan nga mobiya sa bilding. Dayon ako miadto sa iyang opisina ug miilis sa rolyo sa papel sa adding machine ug misugod sa pagpraktis sa pagsuma sa kaparehas nga lista sa mga numero nga iyang gibuhat. Sulod sa daghang mga oras ako mitrabaho ug nahimong mas pas-pas ug mas pas-pas ug mas pas-pas. Sa dihang ako nang gibati nga makabuhat na ako niini nga pas-pas o mas pas-pas kay sa iyang gibuhat, ako natulog sulod sa usa o duha ka oras.
Sa sunod buntag ako nanghilam-os ug miadto sa pultahan sa atubangan dihang sayo nilang giablihan, dayon misulod na usab og balik pag-abut sa manedyer. Ako mituk-tuk sa iyang pultahan. Siya miingon, “OK, lingkud diha ug tan-awa unsa ang akong buhaton.”
Sa dihang misugod na siya sa adding machine, mora og hinay ra siya para nako. Ako nagpraktis og diretso sulod sa pito ka oras. Ako siyang hinay-hinay nga gituklod sa kilid ug naghangyo kaniya sa paglingkud sa akong lingkuranan. Ako misugod sa pagsuma nga pas-pas kaayo. Siya nasurprisa.
Siya miingon, “Unsa ang imong gibuhat?” Gipugos ko niya sa pagpasulti. Siya miingon, “Sugod karon, tungod kay nakakat-on ka niini, ikaw motrabaho uban kanako, ug ako kang tudloan sa tanan nakong nahibaloan.”
Ako mibalhin og departamento. Human sa pipila ka tuig siya mi-resign, ug ako ang mipuli sa iyang lugar tungod sa iyang rekomendasyon. Ako migamit sa paningkamot ug pagpahinungod, ug ako nalipay sa unsay akong nahimo. Ako wala masuko tungod kay iya kong gisilutan sa sinugdanan.
Ang Sekreto sa Paglampus
Ikaw makahimo sa bisan unsa nga maayo nga butang. Kinahanglan lang nga imong buhaton ang paningkamot, ang pagpahinungod, ug magmalipayon.
Ang kompanya asa ko nagtrabaho nanirado. Ako mibalhin sa Siyudad sa Mexico, ug tungod kay ako ganahan nga motrabaho, ako mi-apply og usa ka temporaryo nga trabaho sa usa ka internasyonal editoryal nga kompanya. Sila gusto nako nga ako ang mag-inbentaryo, usa ka butang nga akong kinamaayohan. Akong nahimo ang pag-inbentaryo sulod sa duha ka semana. Sila mihatag kanako og permanente nga trabaho ug nindot nga sweldo, ug ako kining gidawat.
Ako dili makasulti og Iningles niadtong panahona. Ang among direktor, usa ka tawo nga taga Texas kinsa dili makasulti og Spanish, miingon sa akong agalon, “Kining bataa maayo nga motrabaho. Kon siya kahibalo pa lang og Iningles, kami mobayad niya og mas dako. Amo siyang ipadala sa New York alang sa pagbansay, ug sa katapusan mahimo siyang usa ka manedyer dinhi.”
Sa dihang gisultihan ko sa akong agalon kabahin niini, ako nangutana, “Ang ako ra bang buhaton mao ang pagkat-on sa Iningles?”
Ako naminyo na nianang panahona. Ang akong asawa makasulti og Iningles tungod kay siya natawo sa mga kolonya sa Simbahan sa Mexico. Sa unang higayon nga ako misulti og pipila ka mga pulong sa Iningles, usa ka tawo ang misulti kanako nga dili na lang mosulay. Kini dili akong talento.
Karon ako nadasig sa akong hunahuna sa pagpalambo sa akong posisyon sa trabaho ug sa pagka-adunay oportunidad sa pagbiyahe ngadto sa New York. Ako miadto sa usa ka eskwelahan para sa pinulongan ug miingon kanila nga ako gusto nga makakat-on og Iningles sa labing dali kutob sa akong mahimo.
Sila nangutana, “Unsa man ka daghan ang imong nahibaloan?”
Ako miingon, “Wala bisan usa ka pulong. Bisan gani ‘Good morning.’”
Sila miingon, “Kami adunay usa ka hilabihan ka pokus strikto nga kurso: duha ka semana, 16 ka oras matag adlaw. Walo ka oras dinhi uban sa mga magtutudlo ug walo ka oras sa inyong balay gamit ang mga tape rekord. Kini mogasto og $1,000.”
Ako miingon, “Ako nang mahimo. Ako mohangyo sa akong bakasyon, ug ako magtuon sa 16 ka oras matag adlaw sulod sa duha ka semana.”
Ako miduol sa akong agalon ug miingon, “Ako mahimong makat-on og Iningles sulod sa duha ka semana, ug mobayad lamang og $1,000.” Siya mikatawa ug miingon, “Kana imposible. Ako nakakat-on sulod sa duha ka tuig.”
Ako miingon sa akong agalon, “Hangyoa ang direktor sa paghatag kanako og duha ka semana nga bakasyon ug mobayad para sa kurso. Kon inig ka human niining duha ka semana dili ako makasulti kaniya og Iningles, dayon mahimo nimong ikaltas ang bayad niini sa akong sweldo.”
Siya mihatag kanako sa pagtugot.
Ako miadto sa eskwelahan. Matag 45 minutos sulod sa walo ka oras, sila mag-ilis og mga magtutudlo. Sila mopraktis gyud sa bokabularyo, mga han-ay sa mga pulong, ug sa pagpakig-istorya.
Human sa walo ka oras sa eskwelahan, ako moadto sa mga kadalanan mangita og mga turista nga makasulti og Iningles aron akong makaistorya. Dayon ako maminaw og dugang walo ka oras sa mga tape.
Ang pinakarason nganong ako mieskwela dili sa pagkat-on og Iningles. Ako gusto gayud nga mahimong usa ka manedyer ug mobiyahe sa Siyudad sa New York. Tungod kay ako nadasig kaayo, ang pagkat-on sa Iningles dili lisud alang kanako. Ako nalingaw sa matag segundo niini.
Sa dihang akong nahuman ang 224 ka mga oras sa pagtuon, daw makasulti na ako og Iningles. Ako nasayud nga ang eksamin mao ang pagpakig-istorya uban sa akong direktor. Kon dili ni nako mahimo, ako kinahanglan nga mobayad sa $1,000. Busa ako naghimo og usa ka plano. Ako siyang istoryahan sa tanan nakong nakat-unan. Sa dihang misulod na ako sa iyang opisina, ako nagsige ra og istorya sulod sa 20 minutos nga wala nako siya pasultiha bisan usa ka pulong. Siya miingon, “Paigo na kana. Ipadala siya sa New York.” Ug ako mibiyahe padulong sa New York!
Usa ka Kasinatian sa Pagkat-on
Ako mosulti nganha kaninyo nga kon kamo gusto nga molampus sa bisan unsa nga butang, kamo kinahanglan nga mopahinungod, maningkamot, ug magmalipayon sa unsay inyong gibuhat. Kini nga pamaagi makahatag kaninyo sa tanang butang. Kamo mahimong makakat-on og daghan ug makab-ot ang bisan unsa nga angayan nga tumong. Paglingaw unsa ang inyong gibuhat, bisan kon kini lisud. Himoa kini didto sa misyon o bisan unsa nga aspeto sa inyong kinabuhi. Sama sa giingon ni Presidente Benson, “Trabaho, trabaho, trabaho.”
Mga paghulagway pinaagi ni John Zamudio