Mga Istorya sa Kasulatan isip mga Sumbanan sa Atong mga Kinabuhi

Ni Elder Jay E. Jensen

Sa Kapangulohan sa Seventy

Ako naggiyahan ngadto sa usa ka importante nga sumbanan sa pagtuon sa mga kasulatan nga makatabang kanato nga mas makasabut sa mga kasulatan.

Isip batan-ong mga ginikanan ang pagbasa sa mga kasulatan uban sa among mga anak, ako ug ang akong asawa nanglimbasug sa paghimo niining balaang mga pulong nga mapuno sa kadasig ug adunay kahulugan ngadto kanila. Usahay kami adunay mga malampuson nga mga kasinatian, ug usahay wala. Usa ka buntag usa sa among mga anak miingon, “Pa, kini dili makalingaw! Ako wala makasabut unsa ang atong gibasa.” Siguro kamo adunay susama nga mga kasinatian. Maayo na lang, sukad niadto ako naggiyahan ngadto sa usa ka importante nga sumbanan sa pagtuon sa mga kasulatan nga nakatabang kanamo sa tinagsa-tagsa ug isip usa ka pamilya nga mas makasabut sa mga kasulatan.

Paghimo og Koneksyon

Akong nakat-unan kini nga sumbanan sa dihang ako anaa sa ikaduhang tuig sa pagtudlo sa programa sa seminary sa Simbahan. Ako gipahibalo nga si Leland Andersen, usa ka banggiitan nga magtutudlo ug usa ka propesyonal nga tigbansay sa mga magtutudlo sa programa sa seminary ug institute, mobisita sa among klase nianang adlawa. Kami nasayud nga amo lang siyang dapiton sa pagsulti og gamay ngadto sa mga estudyante, iya dayong hapit hutdon ang tibuok panahon sa klase. Ingon niana ang nahitabo sa dihang siya mitambong sa akong klase sa Daang Tugon nianang buntaga. Siya misugod sa pagkuha og usa ka piraso sa chalk ug misugod sa istorya ni David ug ni Goliath. Sulod lamang sa pipila ka segundo ang tibuok atensyon sa klase anaa na kaniya, apan ang mas importante, ako nasayud nga ako nagtan-aw og usa ka banggiitan nga magtutudlo nga nagtrabaho samtang siya mitudlo sa klase ug kanako og usa ka sumbanan nga may kalabutan sa mga kasulatan gamit ang konsepto nga akong gitawag nga “paghimo og koneksyon.”

Paghunahuna og usa ka taytayan. Ang usa ka bahin sa taytayan nakaangkla sa nangagi ug gihimo sa tulo ka mga bahin: (1) sila—ang mga propeta ug mga tawo sa nangagi, (2) didto—ang lugar diin kini nga mga tawo nagpuyo, ug (3) kaniadto—ang panahon nga kining mga tawhana nagpuyo.

Ang lain nga bahin sa taytayan nakaangkla sa karon ug gihimo sa tulo ka kapareha nga mga bahin: (1) Ako—kinsa nagpuyo sa karon, (2) diri—ang lugar diin ako nagpuyo, ug (3) karon—ang panahon nga ako nagpuyo.

Ang tumong mao ang pagtukod og usa ka taytayan gikan sa sila-didto-kaniadto ngadto sa ako-diri-karon, pag-ila og komon nga kapareha sa ilang panahon ug sa atoa.

Mao kini kon giunsa ni Brother Andersen paghimo niini samtang siya misaysay sa istorya ni David ug ni Goliath. Una, iya kaming gipaabli sa 1 Samuel 17 ug mipakita kanamo sa panghitabo sa dili pagkasinabot sa mga Israelite ug sa mga Filistehanon. Iya kaming gipahinumduman sa hagit sa pagpangita og usa ka tawo sa Israel nga mosukol kang Goliath. Puno sa hugot nga pagtuo, ang batan-ong si David miboluntaryo. Niana nga istorya, si Brother Andersen mipaila og usa ka sumbanan nga naglangkob og upat ka hugpong sa mga pulong gikan niadtong mga kapitulo nga susama sa atong panahon. Sila naghimo og usa ka taytayan gikan sa nangagi ngadto sa karon (tan-awa sa table 1).

Table 1. NAPRUWEBAHAN nga Taming sa Dios alang sa Iyang Katuyoan (tan-awa sa 1 Samuel 17)
Mga Bersikulo	Mga Hugpong sa mga Pulong gikan sa mga Kasulatan	Pagkaparehas sa Atong Panahon
29	“Wala bay usa ka hinungdan?”	Adunay daghan nga mga hinungdan sa atong panahon.
39	“Wala pa ako makasulay niini [ang taming].”	Unsa nga mga taming ang akong napruwebahan, o nasulayan na?
45	“Ako mianhi kanimo sa ngalan sa Ginoo.”	Isip mga katawhan sa pakigsaad, kita moadto ug mosulong sa pangalan sa Ginoo.
46	“Ang tibuok yuta unta mahibalo nga adunay usa ka Dios sa Israel”	Ang atong katuyoan mao ang pagtabang sa uban nga masayud nga adunay usa ka Dios sa Israel.

Pag-ila sa mga Pagkaparehas sa Istorya

Kita mahimong mosunod sa sama nga sumbanan sa atong mga pagtudlo. Ang pag-ila og mga kaparehas sa istorya usa ka espirituhanon nga butang. Samtang ikaw magbasa ug magtuon sa mga kasulatan, pag-ampo kanunay. Pag-ampo sa dili pa magsugod sa pagtuon ug, siyempre, pagsunod og usa ka sesyon sa pagtuon. Hunong panagsa samtang ikaw magtuon, ug ipahayag ang imong pasalamat alang sa imong nakat-unan. Pangayo og dugang nga kahayag ug kamatuoran. Kon kamo magbasa og mga istorya gikan sa mga kasulatan, pag-ampo aron makakita og mga kaparehas nga mosumpay sa nangagi ngadto sa karon. Kadaghanan sa akong mga nakit-an miabut pinaagi sa pag-ampo, pagtuon, pagsiksik, pagpamalandong, ug pagpaminaw sa Espiritu.

Si Brother Andersen mipalambo sa matag upat ka mga kaparehas gikan sa kasaysayan ni David ug Goliath pinaagi sa pagpasabut og maayo sa mahinungdanon nga hugpong sa mga pulong, ug dayon iya kining ihulagway uban sa mga ehemplo sa atong panahon. Ang pagtan-aw sa usa ka banggiitan nga magtutudlo nga nagpalambo niining upat ka punto miabli sa pultahan alang kanako sa pagtuon sa kasulatan—nianang pagpangita og mga sumbanan nga kaparehas sa mga istorya.

Ang mosunod nga mga elemento sa kasagaran anaa sa mga istorya sa kasulatan ug dali ra nga ibalhin kalabut sa atong panahon karon:

Usa ka dagan sa istorya ang gisunod.
Ang dagan sa istorya adunay usa ka sinugdanan ug katapusan.
Ang mga hugpong sa pulong o mga han-ay sa pulong gikan sa istorya mga baruganan nga naghulagway sa walay katapusan nga mga kamatuoran.
Kini nga mga hugpong sa pulong o mga han-ay sa pulong nagpakita sa mga kamatuoran nga magamit sa nangagi ug sa atong panahon karon.

Usa ka Istorya nga may Kaparehas gikan sa Bag-ong Tugon

Usa sa magamit kaayo nga mga paghulagway sa usa ka dagan sa istorya miabut kanako samtang ako mitabang sa pagsulat og usa ka leksyon sa Bag-ong Tugon alang sa mga magtutudlo sa seminary. Sa diha nga ang Manluluwas misugod sa Iyang pagpangalagad, Siya nagpuasa og 40 ka adlaw ug 40 ka gabii ug miadto sa kamingawan aron makig-uban sa Dios (tan-awa sa Mga Pinili Gikan sa Hubad ni Joseph Smith sa Biblia, Mateo 4:1–11). Unsay Iyang nasinati para kanako nahimong usa ka tinuod nga sumbanan sa espirituhanong pagtubo:

Iyang gibati ang Iyang balaanong responsibilidad ug nagtinguha nga makig-uban sa Dios.
Ang pagpadayag ug paglamdag miabut ngadto Kaniya.
Hilabihan ang Iyang pagsulay.
Nakapasar sa pagsulay, Siya nagpadayon uban sa dugang nga kahayag ug kamatuoran.¹

Kini nga sumbanan makita sa daghan pang ubang mga istorya sa kasulatan. Pananglitan, si Lehi nangita og panabang (tan-awa sa 1 Nephi 1:5); ang tabang miabut (tan-awa sa 1 Nephi 1:6); hilabihan ang iyang pagsulay (tan-awa sa 1 Nephi 1:19–20); ug siya mipadayon uban sa dugang nga kahayag ug kamatuoran (tan-awa sa 1 Nephi 2:1).

Si Propeta Joseph Smith nakasinati og sama nga sumbanan:

Siya nangita sa pagpakig-uban sa Dios (Asa ang tinuod nga simbahan ?)
Ang tubag miabut human niya mabasa ang Santiago 1:5 ug nag-ampo.
Hilabihan ang iyang pagsulay.
Nakapasar sa pagsulay ug nagpadayon uban sa dugang nga kahayag ug kamatuoran.

Ako usab adunay daghang mga kasinatian sa akong kinabuhi nga nasubay niini nga sumbanan, ang akong tawag isip usa ka miyembro sa Seventy mao ang usa ka paghulagway. Ang tawag miabut sa unang semana sa Hunyo 1992, ug ang akong unang buluhaton mao ang pag-alagad isip miyembro sa Central America Area Presidency sugod pagka Agosto 1. Panahon sa akong pagbakasyon sa Hulyo, akong gigugol ang akong kaugalingon sa mga kasulatan, ilabi na sa Basahon ni Mormon, ug migugol og daghan nga mga oras sa pagtuon, pag-ampo, ug pagpamalandong aron sa pagtabang kanako nga maandam ug makabuntog sa akong mga pagbati nga pagkakulang.

Basi sa Mateo 4:1–11 ug sa Mga Pinili Gikan sa Hubad ni Joseph Smith sa Biblia sa Mateo 4:1–11, akong giila ang pagkaparehas nga makita sa table 2.

Table 2. Usa ka Sumbanan alang sa Espirituhanong Paglambo (tan-awa sa Mateo 4)
Mga Bersikulo	Mga Hugpong sa Pulong gikan sa mga Kasulatan	Pagkaparehas sa Atong Panahon
1	Ang Manluluwas mibati sa Iyang balaanong responsibilidad ug nagtinguha nga makig-uban sa Dios.	Ako mibati sa akong balaanong responsibilidad ug nagtinguha nga makig-uban sa Dios.
1	Siya nakig-uban sa Dios.	Ang paglamdag miabut samtang ako nagtuon, nagpuasa, namalandong, ug nag-ampo.
3–10	Siya gitintal ug gihagit.	Ako nahagit uban sa mga pagbati nga pagkakulang ug pagka dili angay.
11	Ang mga anghel nangalagad ngadto Kaniya.	Ang Espiritu Santo mihupay, mitudlo, milamdag, ug mipalig-on kanako aron makapadayon sa unahan uban sa balaanong pag-abag.

Ang mga Pinili Gikan sa Hubad ni Joseph Smith sa Biblia sa Mateo 4:11 nga managlahi gikan sa Mateo 4:11; apan, ang kamatuoran sa kaulahian—nga “ang mga anghel miabut ug mialagad kaniya”—usa ka tinuod nga baruganan.

Ikaw, usab, mahimong mosusi sa imong kaugalingong kinabuhi ug hinuktukan ang mga panahon nga ikaw nakasinati niini nga sumbanan sa espirituhanong paglambo.

Usa ka Istorya nga Kaparehas gikan sa Basahon ni Mormon

Samtang ako nagserbisyo isip bishop, usa ka miyembro sa ward kinsa nakahimo og grabe nga kalapasan miduol kanako nangayo og tambag ug direksyon. Mahimo siyang matangtang sa iyang pagkamiyembro sa Simbahan, ug ang iyang pagkumpisal ngari kanako, isip usa ka maghuhukom sa Israel, makatabang kaniya sa proseso sa paghinulsol. Usa ka istorya gikan sa Alma 36 nakatabang niini nga miyembro sa ward nga makasugod sa paghinulsol (tan-awa sa table 3).

Table 3. Paghinulsol ug Pagpasaylo (tan-awa sa Alma 36)
Mga Bersikulo	Mga Hugpong sa Pulong gikan sa mga Kasulatan	Pagkaparehas sa Atong Panahon
6	Si Alma nagtinguha sa paglaglag sa Simbahan.	Kini nga miyembro nagpadayon sa pagpakasala.
6–11	Ang Dios midala sa Iyang anghel sa pagsanta kang Alma.	Siya nasakpan sa iyang sala.
11–16	Si Alma giabut og dako nga kahadlok, siya gisakit uban sa kahasol.	Siya gihasol, nahadlok, nagbasol, ug naghinulsol.
17	Si Alma nakahinumdom nga nakabati sa iyang amahan nga nanagna kabahin sa Pag-ula.	Siya nakahinumdom nga ang iyang amahan ug inahan mitudlo kaniya kabahin sa Pag-ula diha sa family home evening.
18	Si Alma nag-ampo alang sa kalooy.	Siya nag-ampo alang sa kapasayloan.
19	Si Alma wala na mahinumdom sa iyang mga kasakit.	Wala na niya mabati ang mga kasakit sa iyang mga sala.
21–23	Si Alma nakadawat og hingpit nga kalipay, kahayag, ug kalig-on.	Siya nakadawat og hingpit nga kalipay, kahayag, ug kalig-on.
24	Si Alma naghago sa walay paghunong sa pagluwas sa mga kalag.	Siya naghago sa pagluwas sa mga kalag.
27	Si Alma gibuligan sa iyang mga pagsulay.	Siya gibuligan sa iyang mga pagsulay.

Hinumdumi nga human nga si Alma napasaylo, wala na siya makahinumdom sa iyang mga kasakit, o siya gisamok sa iyang mga sala. Apan, siya nakahinumdom sa iyang mga sala (tan-awa sa b. 16). Apan sa dihang iya kining nahinumduman, wala na kini magsamok kaniya. Ang Ginoo mihatag kanato og panumduman sa mga sala aron sa pagtabang nga kini malikayan sa pagkahitabo og usab, apan Iya nang gitangtang ang kasakit.

Alang sa Atong Kaayohan ug sa Pagkat-on

Ang mga pagkaparehas sa istorya magsugod sa mga istorya diha sa mga kasulatan o sa mga panghitabo nga naglibut niini. Samtang ikaw magbasa ug magtuon niini nga mga istorya, ikaw makakita og usa ka pulong, hugpong sa mga pulong, o usa ka baruganan nga magamit nato karon sama sa nangagi. Samtang ikaw magpadayon sa imong mainampuong pagtuon, ang ubang mga baruganan magkaanam og kaklaro. Kon inyong usahon ang mga baruganan, kamo nagsugod sa paghimo og koneksyon sa mga propeta ug sa mga tawo kinsa nagpuyo sa nangagi—sila-didto-kaniadto—ug sa atong panahon—ako-diri-karon. Siguro mao kini ang gipasabut ni Nephi sa dihang siya miingon nga siya “mipahisama sa tanan nga mga kasulatan ngari kanato, nga kini unta mahimo alang sa atong kaayohan ug sa atong pagkat-on” (1 Nephi 19:23). Dugang pa, pinaagi sa pagbuhat sa ingon atong gibahandi ang mga pulong sa Dios (tan-awa sa Joseph Smith—Mateo 1:37).

Gihulagway ni Richard Hull

Sa tuo: mga painting pinaagi ni Jerry Thompson; PAGPAMINAW, pinaagi ni Michael Jarvis Nelson; SI JOSEPH SMITH NANGITA OG KAALAM GIKAN SA BIBLIA, pinaagi ni Dale Kilbourn

Unsay nasinati sa Manluluwas sa dihang Siya misugod sa Iyang pangalagad nahimong usa ka tinuod nga sumbanan sa espirituhanong pagtubo para kanako, usa ka sumbanan nga makita sa daghang mga istorya sa mga kasulatan, apil niini ang mga kasinatian nila ni Lehi ug Joseph Smith.