The Joseph SmithPapers Ang mga Sinulat ni Ang Manuskrito sa mga Basahon sa Pagpadayag
Ang manuskrito sa mga basahon sa pagpadayag naglangkub og daghan sa kinaunhan nga nailhang mga kopya sa mga pagpadayag nga nadawat ni Joseph Smith ug naghatag og mga importanting bahin sa proseso sa pagpadayag.
Niadtong mga 1970 ang Santos sa Ulahing mga Adlaw nga mga eskolar misugod sa pag-ila sa mga kaayohan sa pagpangolekta ug sa pagbutang niini sa mga pampublikong dokumento nga may kalabutan sa kinabuhi ug mga buhat ni Propetang Joseph Smith. Ang Joseph Smith Papers Project [Proyekto sa mga Sinulat ni Joseph Smith] mao ang lintunganay niining daghan na nga mga dekada nga mga paningkamot. Ang mga eskolar sa proyekto adunay tumong sa pagkolekta sa tanan nga mga journal, mga diary, mga sulat, mga diskurso, mga pagpadayag, sinulat nga mga kasaysayan, mga pahibalo, ug legal nga mga papeles—tanan nga sinulat ni Joseph Smith o sa iyang gisugo nga isulat.
Kon mahuman, The Joseph Smith Papers [Ang mga Sinulat ni Joseph Smith] molangkub og 30 ka volume nga adunay labaw sa 2,000 ka mga dokumento. Ang mga volume pagatungaon ngadto sa unom ka mga serye nga gibase sa mga dapit nga gihatagan og gibug-aton: mga dokumento, kasaysayan, mga journal, mga papeles sa pag-administrar, legal ug pangnegosyo nga mga buluhaton, ug mga pagpadayag ug mga paghubad. Pinaagi sa pagsangkap og mga transkripyon (gi-type nga bersyon) sa tanang orihinal nga mga dokumento, The Joseph Smith Papers [Ang mga Sinulat ni Joseph Smith] mohatag sa mga eskolar ug sa uban pang interesado nga mga tawo nga mabasa ang mga teksto samtang maminusan usab ang pagkatandog niini ug ang posibilidad nga makaguba sa mga talandugon nga mga dokumento sa kasaysayan. Ang matag transkripsyon moagi og tulo ka lakang nga mga proseso nga makaabut sa mga sumbanan sa mga eskolar nga gidesinyo sa pagsiguro nga tukma gayud ang gisulat nga mga teksto.
Ang pagtuon niining makasaysayanong mga kapanguhaan, ilabi na sa ilang kinaunhan nga mga porma, makahatag sa mga estudyante nga nagtuon kabahin ni Joseph Smith og mabungahong panabut kabahin sa kinabuhi sa Propeta ug sa paglambo sa gipahiuli nga Simbahan. The Joseph Smith Papers [Ang mga Sinulat ni Joseph Smith] makapasayon usab sa detalyadong pagsiksik sa kasaysayan. Ang mga dokumento nga gitipigan sa nagkalain-laing mga dapit—lakip na ang mga koleksyon nga gikuptan sa Simbahan, mga unibersidad, mga grupo sa kasaysayan, ug pribado nga mga nanag-iya—imantala ug maanaa sa daghang mga dapit ug sa kadugayan diha sa Internet. Tungod kay kining malukpanon nga proyekto mohatag og daghang mga nag-unang mga kapanguhaan, lakip sa daghan nga dili gayud unta makit-an sa mga eskolar, The Joseph Smith Papers [Ang mga Sinulat ni Joseph Smith] mopataas sa mga sumbanan ug kahusto sa mga pagtuon ug pagsiksik sa umaabut mahitungod ni Joseph Smith ug sa una nga kasaysayan sa Simbahan.
Ang mga Serye sa mga Pagpadayag ug mga Paghubad
Ang mga volume diha sa mga serye nga giulohan og “Revelations and Translations” [Mga Pagpadayag ug mga Paghubad] gidugangan og kopya sa kinaunhan nga mga manuskrito nga gisulat isip mga pagpadayag ug mga paghubad ni Joseph Smith, uban sa opisyal nga edisyon niini nga mga dokumento sama sa pagmantala niini sa dihang buhi pa siya. Kini nga mga pagmantala o publikasyon naglakip sa unang edisyon sa Basahon ni Mormon (1830); ang unang pagmantala sa usa ka koleksyon sa mga pagpadayag ni Joseph Smith, gitawag og Basahon sa mga Sugo (1833); ug nag-una nga edisyon sa Doktrina ug mga Pakigsaad (1835).
Usa sa mga prayoridad sa Propeta human maorganisar ang Simbahan niadtong 1830 mao ang pag-rekord ug pag-preserbar niini nga mga pagpadayag. Bisan og daghang malukpanon nga pagtipig sa mga rekord wala magsugod hangtud pagka 1832, si Joseph Smith ug si John Whitmer misugod niini niadtong ting-init sa 1830 sa pagpundok sa mga pagpadayag nga nadawat sa Propeta nianang panahona. Sa labing minus pagka Marso sa 1831, si John Whitmer misugod sa pagpakopya niining una nga koleksyon sa mga manuskrito sa pagpadayag nga giulohan og “Book of Commandments and Revelations” [“Basahon sa mga Sugo ug mga Pagpadayag”]. Kini nga manuskrito sa basahon, diin ang mga editor sa Sinulat mitawag niini og Revelation Book 1 [Basahon sa Pagpadayag 1], naglangkob sa mga aytem nga gikopya gikan sa mga Marso 1831 hangtud sa tunga-tunga sa 1835.
Gisugo panahon sa Nobyembre 1831 nga komperensya sa Simbahan sa Ohio sa pagmantala sa nakolekta nga mga pagpadayag, sila si John Whitmer ug Oliver Cowdery midala sa “Book of Commandments and Revelations” [Basahon sa mga Sugo ug mga Pagpadayag] ngadto sa Missouri diin, uban ni W. W. Phelps, misugod sa proseso sa pagmantala sa Basahon sa mga Sugo (tan-awa sa D&P 67). Sa sayo sa 1832, uban sa unang mga manuskrito sa pagpadayag didto sa Missouri, si Joseph ug ang iyang mga tigsulat naghimo og laing basahon nga naglangkob sa kopya sa mga pagpadayag. Nailhan nga “Kirtland Revelation Book,” [“Basahon sa Pagpadayag sa Kirtland”] kini nga basahon gimarkahan isip Revelation Book 2 [Basahon sa Pagpadayag 2] sa mga editor sa Sinulat. Kini nahimo sa katapusan sa Pebrero o sa sayo sa Marso niadtong 1832 hangtud sa katapusan sa 1834. Ang unang volume sa Revelations and Translations Series [Ang mga Serye sa mga Pagpadayag ug mga Paghubad] mopakita niining duha ka mga basahon sa mga manuskrito sa pagpadayag.
Pinaagi sa mabinantayong pagtuon, ang mga eskolar sa Joseph Smith Papers Project [Proyekto sa mga Sinulat ni Joseph Smith] mitino nga ang “Book of Commandments and Revelations” [“Basahon sa mga Sugo ug mga Pagpadayag] nagsilbi isip nag-unang kapanguhaan sa 1833 nga pagmantala sa Basahon sa mga Sugo ug ang duha nga “Book of Commandments and Revelations” [“Basahon sa mga Sugo ug mga Pagpadayag”] ug ang “Kirtland Revelation Book” [“Basahon sa Pagpadayag sa Kirtland”] nahimong basihan sa unang edisyon sa Doktrina ug mga Pakigsaad niadtong 1835. Kini nga mga basahon sa manuskrito wala na magamit pagkahuman og mantala sa Doktrina ug mga Pakigsaad apan maayo nga pagkatipig uban sa lain nga mga rekord sa Simbahan. Ang misunod nga mga pagpadayag narekord sa mga journal ug mga record book ni Joseph Smith, ingon man mga sulat para sa mga bishop, mga Apostoles, ug uban pa nga mga manununod.
Human sa pagmantala sa Doktrina ug mga Pakigsaad niadtong 1835, kining duha ka manuskrito sa mga basahon wala kaayo panumbalinga sa kadaghanan tungod kay ang gimantala nga mga volume anaa man. Apan, ang mga eskolar sa atong panahon karon adunay mas dakong interes sa pagtuon sa una nga mga manuskrito sa mga pagpadayag ni Joseph Smith. Ang Revelation Book 2 [Basahon sa Pagpadayag 2] wala gayud madali-dali og gamit hangtud ang Simbahan mimantala og mga litrato sa orihinal nga mga manuskrito isip bahin sa 2002 nga Selected Collections from the Archives [Pinili nga mga Koleksyon gikan sa Archive] koleksyon sa DVD.1 Usab, sa bag-ohay lang nga katuigan ang mga eskolar misugod sa pagtimbang-timbang sa bili sa [Revelation Book 1] Basahon sa Pagpadayag 1, nga anaa sa Unang Kapangulohan.
Ang Revelation Book 1 [Basahon sa Pagpadayag 1] naglangkob sa kinaunhan nga mga nailhang mga kopya sa daghang mga pagpadayag ug, sa pipila ka sitwasyon, ang bugtong naluwas nga mga kopya sa una nga manuskrito. Kini mao ang tinubdan alang sa mga pagpadayag nga gimantala sa unang isyu sa mga peryodiko sa Simbahan nga The Evening and the Morning Star. Upat ka mga palid nga gitangtang sa basahon nga sa pagkakaron gipanag-iya sa Community of Christ Library-Archives sa Independence, Missouri, ug gipakopyahan og usab nga may pagtugot sa The Joseph Smith Papers [Ang mga Sinulat ni Joseph Smith].
Ang Revelation Book 1 [Basahon sa Pagpadayag 1] usa ka hapit makompleto nga koleksyon sa una nga mga pagpadayag, naglangkob og 64 sa 65 ka mga aytem nga gimantala niadtong 1833 sa Basahon sa mga Sugo2 ingon usab 95 sa 103 ka mga seksyon nga gimantala pagka 1835 sa Doktrina ug mga Pakigsaad. Napulo lamang ka mga aytem gikan sa manuskrito nga basahon ang dili makita bisan hain nga Basahon sa mga Sugo o sa 1835 nga Doktrina ug mga Pakigsaad.
Pagpangandam sa mga Basahon sa Pagpadayag alang sa Pagmantala panahon sa kapanahunan ni Joseph Smith
Usa sa mga buluhaton ni Joseph Smith sa pagribyu sa mga manuskrito sa dili pa kini imantala mao ang “pag-eksakto niadtong mga sayop nga iyang madiskubrihan pinaagi sa Balaang Espiritu.”3 Si Joseph nasayud gikan sa kasinatian nga ang tawhanong proseso sa pagsulat sa mga pagpadayag, ang pagkopya niini gikan sa manuskrito nga mga basahon, ug dayon ang pagpasa niini ngadto sa nagkalain-laing mga kamot aron maandam sa pagmantala makahimo og dili gayud malikayan nga mga sayop nga wala tuyoa. Usahay adunay mga kausaban nga gikinahanglan aron sa pagklaro sa pulong. Panagsa, ang mas ulahi nga mga pagpadayag mopuli o mobag-o sa daang nadawat nga mga pagpadayag, nagkinahanglan gayud nga iusab ang mga dokumento aron sa pag-usab sa daan nga bersyon. Daghang lain pa nga mga kausaban ang gihimo matag karon og unya. Kadaghanan niini, sama sa pagtunga sa mga teksto ngadto sa mga bersikulo o sa pagtino sa kahulugan, wala maglakip og dinagkong mga koreksyon.
Si Joseph miisip nga ang manuskrito sa mga pagpadayag mao ang iyang pinakamaayo nga paningkamot sa pag-rekord sa tingog sa Ginoo nga nakig-angay aron sa pagpakig-istorya sa unsay gitawag ni Joseph nga “baliko, putol-putol, nagkatibulaag, ug dili perpekto nga pinulongan” sa katawhan.4 Ang gipadayag nga pasiuna sa gimantala nga mga pagpadayag daw nagpakita usab niini nga baruganan: “Ako Dios ug namulong niini; kini nga mga sugo gikan kanako; ug gihatag ngadto sa akong mga sulugoon diha sa ilang kahuyang, subay sa paagi sa ilang pinulongan” (D&P 1:24).
Si Joseph ug ang iyang mga kauban gipili pinaagi sa mga desisyon diha sa mga komperensya sa Simbahan aron sa pagpangandam sa mga pagpadayag alang sa pagmantala pinaagi sa pag-eksakto sa mga teksto. Ang mga bag-ong pag-analisar mahitungod sa duha ka manuskrito sa mga basahon sa pagpadayag nagpakita giunsa ug kanus-a ang daghang mga kausaban gipanghimo. Sama pananglit, ang pipila sa mga kausaban gihimo sa wala pa ang mga napili nga aytem imantala sa Missouri, samtang ang uban gihimo sa Ohio sa wala pa ang 1835 nga pagmantala sa Doktrina ug mga Pakigsaad.
Usa sa komon nga ehemplo nga naapil niini nga kausaban mao ang gihimo ni Sidney Rigdon. Iyang giusab kanunay ang pinulongan sa pagpadayag nga naa sa biblia nga “thee,” “thy,” ug “thine” ngadto sa modernong “you,” “your,” ug “yours.” Daghan niini nga mga kausaban sa kaulahian gibalik. Iyang gi-eksakto usab ang grammar ug miusab sa pipila ka mga pinulongan aron sa pagklaro ug pag-usab sa mga pulong ug kahulugan.
Sa pipila ka mga panghitabo, daghan nga makahuluganong mga kausaban ang gihimo samtang ang mga pagpadayag gibag-o para sa 1835 nga Doktrina ug mga Pakigsaad. Pananglitan, ang seksyon 20 sa orihinal nadawat niadtong 1830, sa wala pa mapadayag ngadto kang Joseph Smith ang daghang pamaagi sa pagpangulo sa Simbahan sama sa atong nahibaloan karon. Pagka 1835 si Joseph miorganisar og daghang mga katungdanan ug mga korum pinaagi sa pagpadayag. Aron sa pag-apil niining bag-ong gipadayag nga ecclesiastical order, pipila ka mga kausaban sa teksto ug mga pagdugang ang gilakip ngadto sa seksyon 20. Ang mga bersikulo nato karon sa 65–67 kabahin sa pag-orden sa mga katungdanan sa priesthood, pananglit, gipadayag pagkahuman sa 1833 nga pagmantala ug dayon gidugang sa 1835 nga pagmantala.
Si Joseph Smith miribyu sa daghang mga editoryal nga mga kausaban sa iyang mga kauban ug mihimo og gamay nga kausaban nga iyang agi mismo sa wala pa ang pagmantala sa Basahon sa mga Sugo niadtong 1833. Siya mihimo og dugang pa nga mga kausaban, lakip niini ang pagdugang sa mga apelyido niadtong mga indibidwal nga gihisgutan sa mga pagpadayag, sa wala pa gayud imantala ang Doktrina ug mga Pakigsaad niadtong 1835.
Sulod ining mga tuiga sa 1834–35 didto sa Kirtland, Ohio, ang Revelation Book 2 [Basahon sa Pagpadayag 2] gigamit alang sa pagpangandam sa 1835 nga Doktrina ug mga Pakigsaad, ug ang tanan gawas sa walo ka mga aytem nga anaa sa manuskrito nga basahon gimantala niadtong 1835 nga volume. Sa kalahian, tulo lamang sa mga pagpadayag nga nakopya didto sa basahon ang gimantala sa Basahon sa mga Sugo niadtong 1833. Duha sa mga pagpadayag diha sa manuskrito nga basahon maoy unang gimantala sa 1844 nga Doktrina ug mga Pakigsaad.
Sunod-sunod nga mga kausaban sa pag-edit hangtud sa 1981 nga edisyon sa Doktrina ug mga Pakigsaad naglakip sa panagsa nga kausaban sa mga pulong, apan ang labing dako nga makahuluganong mga kausaban nahitabo ubos sa paggiya ni Propetang Joseph mao ang 1835 nga edisyon.
Bag-o nga Impormasyon
Sa pag-edit niining manuskrito nga basahon, ang mga editor sa Sinulat mibutyag og bag-o nga impormasyon. Pananglit, ang mga eskolar nga interesado sa pagkasunod-sunod sa hitabo sa kinabuhi ni Joseph Smith dugay na kaayong nagsalig lamang sa tiningub nga buwan sa pagpetsa sa daghang mga una nga mga pagpadayag. Ang Revelation Book 1 [Basahon sa Pagpadayag 1] makahatag og piho nga mga petsa alang niining daghan nga mga pagpadayag. Agig dugang, ang mubo nga pasiuna sa kasaysayan ni John Whitmer ngadto sa daghang mga pagpadayag naghatag usab og kinatibuk-ang kahulugan sa kasaysayan ngadto sa mga eskolar.
Pinaagi sa mabinantayong pag-analisar, ang mga editor nakahimo sa pag-ila sa sinulatan sa kadaghanan sa mga marka sa pag-edit diha sa mga pahina sa manuskrito. Sa dihang ang Revelations and Translations Series [Ang mga Serye sa mga Pagpadayag ug mga Paghubad] imantala, ang mga imahe sa dokumento pagaapilon uban sa trans-kripsyon sa atbang nga mga pahina. Sa ingon, ang mga magbabasa mahimong makakita sa orihinal nga sinulatan, marka sa pag-edit, ug bisan ang grano sa mga dokumento apan dili magkinahanglan nga eksperto sa pagsabut sa sinulatan. Ang mga kausaban nga nahimo sa orihinal nga mga dokumento butangan og kolor nga timaan aron ang mga magbabasa makaila sa agi o sinulatan sa indibidwal nga maoy misulat sa matag pahina.
Lain pa nga makapainteres nga kalamboan sa buluhaton sa Revelation and Translation Series [Ang mga Serye sa mga Pagpadayag ug mga Paghubad] mao ang pag-ila sa daan nga wala pa imantala nga mga pagpadayag aron sa pagkuha og katungod sa sinulat [copyright] alang sa Basahon ni Mormon didto sa Canada. Si David Whitmer, human siya mibiya sa Simbahan, nahinumdom nga ang pagpadayag nagsaad nga ang pagbaligya sa katungod sa sinulat magmalampuson, apan sa pagpamauli sa mga tawo kinsa gitahasan sa buluhaton, si Joseph Smith ug ang uban nawad-an og gana nga sa ilang tan-aw daw pakyas. Ang mga magsusulat nagsalig lamang sa mga istorya ni David Whitmer, Hiram Page, ug William McLellin sulod sa daghang mga dekada apan wala gayuy tinuod nga teksto sa pagpadayag. Ang Revelation Book 1 [Basahon sa Pagpadayag 1] makahatag niini.
Bisan og kita wala pa gihapon masayud sa tibuok istorya, ilabi na sa kaugalingong panghunahuna ni Joseph Smith sa sitwasyon, kita nasayud nga ang pagtawag sa usa ka balaanong pagpakig-istorya nga usa ka “pakyas nga pagpadayag” dili resonable. Ang kabubut-on sa Dios tataw kaayo nga nagkondisyon nga ang malampuson nga pagbaligya sa katungod sa sinulat nag-agad sa katakus niadtong kinsa mamaligya og ingon man usab sa espirituhanong pagdawat sa potensyal nga mamalitay.5
Ang Bag-ong Panabut sa Propeta
Ang pag-usab ug pag-bag-o sa mga teksto sa pagpadayag sa una nga katuigan sa Simbahan mipakita sa proseso sa padayon nga pagpadayag ngadto kang Joseph Smith. Ang mga manuskrito sa pagpadayag mipadayag kon giunsa sa pagpaningkamot sa mga lalaki sa pagsiguro nga ang mga ideya ug mga doktrina nga nadawat ni Joseph nahisulat ug naimprinta sa saktong paagi—usa ka proseso nga diha sa pagmantala sa bisan unsa nga buluhaton adunay risgo sa pagkasayop. Sa pipila ka mga hitabo, kon ang usa ka bag-o nga pagpadayag usbon o bag-ohon kon unsa ang nadawat sa miagi, ang Propeta mo-edit sa mas nag-una nga sinulat nga pagpadayag aron sa pagpakita og bag-o nga panabut. Sa ingon, ang iyang doktrinal nga kahibalo maklaro ug mapalapad, ingon man usab ang mga na-rekord nga mga pagpadayag. Kini gihulagway pinaagi sa pagkausab sa kinaiyahan sa iyang panabut niadtong sagrado nga hilisgutan. Ang Propeta dili motuo nga ang pagpadayag, kon ma-rekord na, dili na mahimong usabon pinaagi sa dugang mga pagpadayag.
Ang pagpreserbar ug pagmantala niining manuskrito nga mga basahon sa pagpadayag naghatag og talagsaon nga kapanguhaan alang sa mga tawo nga nagtuon sa kasaysayan sa Simbahan. Kini nga proyekto modala ngadto sa mas dako nga panabut kon sa unsang paagi ang atong giimprinta nga mga pagpadayag naorganisar ug namantala, ingon man usab mas dako nga panabut ngadto sa hunahuna ug tinguha ni Joseph Smith. Ang pagtuon niini nga mga basahon sa pagpadayag modugang dili lamang sa atong kahibalo apan usab sa atong pagpamatuod sa pag-ila sa plano sa Dios sa padayon nga pagpadayag nga naghatag og walay katapusan nga kausaban sa mga panginahanglan sa nagtubo nga Simbahan.
Si Joseph Smith Jr. Pagdawat sa Pagpadayag, ni Daniel Lewis
Mga litrato sa manuskrito nga mga basahon sa maayong kabubut-on sa Joseph Smith Papers Project [Proyekto sa mga Sinulat ni Joseph Smith]; litrato sa Basahon sa mga Sugo ni Eldon K. Linschoten; Joseph Smith Jr., ni Dan Weggeland, sa maayong kabubut-on sa Church History Museum
Usa sa mga prayoridad sa Propeta human maorganisar ang Simbahan niadtong 1830 mao ang pag-rekord ug pag-preserbar niini nga mga pagpadayag.
Ubos: Revelation Book 1 [Basahon sa Pagpadayag 1]. Ibabaw sa tuo: Revelation Book 2 [Basahon sa Pagpadayag 2]. Ubos sa tuo: Unang edisyon sa Basahon sa mga Sugo.
Si Joseph miisip nga ang manuskrito sa mga pagpadayag mao ang iyang pinakamaayo nga paningkamot sa pag-rekord sa tingog sa Ginoo.
KINULIT NGA HULAGWAY NI JOSEPH SMITH PINAAGI NI
Dan Weggeland, SA MAAYONG KABUBUT-ON SA church history museum
Si John Whitmer
Si Sidney Rigdon
Si Joseph Smith
Si William W. Phelps