Mensahe sa Unang Kapangulohan
Asukal nga Rimulatsa [Sugar Beets] ug ang Bili sa Kalag
Daghang mga tuig na ang milabay, si Bishop Marvin O. Ashton (1883–1946), kinsa mialagad isip counselor sa Presiding Bishopric, mihatag og usa ka paghulagway nga akong ganahan nga ipakigbahin diha kaninyo. Paghunahuna uban kanako, kon inyong gusto, ang usa ka mag-uuma nagmaneho og usa ka dako nga truck de karga puno sa asukal nga rimulatsa [sugar beets] padulong ngadto sa hashasanan og asukal [sugar refinery]. Samtang ang mag-uuma nagmaneho subay sa libaongon abog nga kalsada, ang pipila sa mga asukal nga rimulatsa [sugar beets] nahulog gikan sa truck ug nagkatag diha sa kilid sa kalsada. Sa dihang iyang namatngonan nga nawad-an siya og pipila sa mga rimulatsa [beets], iyang giingnan ang iyang mga katabang, “Adunay sama usab ka daghan nga nangatagak nga asukal. Mamalik kita ug kuhaon kini!”
Sa akong paggamit niini nga paghulagway, ang mga asukal nga rimulatsa [sugar beets] nagpresentar sa mga miyembro niini nga Simbahan kang kinsa kita nga gitawag isip mga lider adunay mga responsibilidad; ug kadtong nangatagak gikan sa truck nagpresentar sa mga lalaki ug sa mga babaye, kabatan-onan ug mga bata kinsa, sa bisan unsa nga rason, nawala gikan sa dalan sa pagka-aktibo. Pagsulti og balik sa mga pulong sa mag-uuma kabahin sa mga asukal nga rimulatsa [sugar beets], ako moingon nga kini nga mga kalag, bililhon sa atong Amahan ug atong Agalon: “Adunay sama usab ka dako nga bili niadtong mga nangatagak. Mamalik kita ug kuhaon sila!”
Karon gayud, pipila kanila ang dili na aktibo tungod kay nadala sa sikat nga opinyon sa kalibutan sa atong panahon. Ang uban nadala tungod sa mga kalisud sa panahon. Ang uban nadala ug nalunod sa lilo sa sala.
Dili kini angayan nga mahitabo. Anaa kanato ang mga doktrina sa kamatuoran. Anaa kanato ang mga programa. Anaa kanato ang mga katawhan. Anaa kanato ang gahum. Ang atong misyon labaw pa kaysa mga miting. Ang atong pangalagad mao ang pagluwas sa mga kalag.
Atong Pangalagad: Pagluwas sa mga Kalag
Ang Ginoo mihatag og gibug-aton sa bili sa matag lalaki o babaye, batan-on o bata sa dihang Siya miingon:
“Ang bili sa kalag mahinungdanon sa panan-aw sa Dios.” …
“Ug kon kini mahimo nga ikaw manlimbasog sa tanan nimo nga mga adlaw sa pagsangyaw og paghinulsol ngadto niini nga mga katawhan, ug magdala, bisan usa ka kalag ngari kanako, unsa ka dako ang imong hingpit nga kalipay uban kaniya diha sa gingharian sa akong Amahan!
“Ug karon, kon ang imong hingpit nga kalipay dako tungod sa usa ka kalag nga imong gidala ngari kanako diha sa gingharian sa akong Amahan, unsa kaha kadako ang imong hingpit nga kalipay kon ikaw makadala og daghan nga mga kalag ngari kanako!” (D&P 18:10, 15–16).
Hinumdumi nga ikaw may katungod sa mga panalangin sa atong Amahan niini nga buluhaton. Siya wala motawag kanimo aron ikaw mag-inusara sa imong calling, sa walay paggiya, nga magsalig lamang sa moabut nga swerte. Hinoon, Siya nasayud sa imong kahanas, Siya motabang nga mabuhat ang imong debosyon, ug Iyang himoon nga ang imong gituhoan nga kahuyang ngadto sa pag-ila sa mga kalig-on. Siya misaad: “Ako molakaw diha sa inyong atubangan. Ako anaa sa inyong tuo nga kamot ug sa inyong walà, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo” (D&P 84:88).
Mga lider sa primary, nakaila ba kamo sa mga bata nga inyong giserbisyohan? Mga lider sa Young Women, nakaila ba kamo sa inyong mga batan-ong babaye? Mga lider sa Aaronic Priesthood, nakaila ba kamo sa mga batan-ong lalaki? Mga lider sa Relief Society ug Melchizedek Priesthood, nakaila ba kamo sa mga babaye ug mga lalaki diin kamo gitawag nga modumala? Kamo ba nakasabut sa ilang mga problema ug sa ilang mga kalibug, sa ilang mga pangandoy, mga ambisyon, ug mga paglaum? Kahibalo ba kamo unsa ka layo ang ilang nabiyahe, ang mga kasamok nga ilang nasinati, ang palas-anon nga ilang gipas-an, ug ang mga kasakit nga ilang giantus.
Giawhag ko kamo sa pagduol niadtong imong giserbisyohan ug sa paghigugma kanila. Kon inyo gayud nga gihigugma ang inyong mga giserbisyohan, dili nila makita ang ilang kaugalingon sa gikahadlokan nga “Never, Never Land”—dili gayud sila ang butang nga angay hisgutan, dili gayud sila ang dumadawat sa gikinahanglan nga tabang. Mahimong dili imong pribelihiyo nga moabli og mga gate sa mga siyudad o sa mga pultahan sa mga palasyo, apan ang tinuod nga kalipay ug mahangturon nga tinuod nga kalipay moabut kanimo ug sa matag usa nga imong giserbisyohan sa imong pagtabang kanila ug sa pag-impluwensya sa ilang kinabuhi.
Mga Leksyon nga Gikulit sa Kasingkasing
Kon ikaw mawagtangan man og gana sa imong mga paningkamot, hinumdumi nga usahay ang panahon sa Dios dili motakdo sa atoa. Sa dihang ako usa ka bishop daghan nang mga tuig ang nanglabay, usa sa mga lider sa mga batan-ong babaye, si Jessie Cox, miduol kanako ug miingon, “Bishop, ako usa ka pakyas!” Sa dihang siya akong gipangutana ngano nga siya mibati sa ingon niini nga paagi, siya miingon, “Ako walay nahimo ni bisan kinsa sa akong mga batan-ong babaye nga mag-apilan sa Mutual nga maminyo sa templo, ingon nga mahimo sa usa ka maayong magtutudlo. Ako mibuhat sa akong labing maayo, apan ang akong labing maayo dili pa gayud igo.”
Akong gihupay si Jessie pinaagi sa pagsulti kaniya nga ako, isip iyang bishop, nasayud nga iyang gibuhat ang tanan niyang mahimo. Ug samtang akong gipanid-an kadtong mga babaye sulod sa mga nanglabay nga tuig, akong nakita nga ang matag usa kanila sa kaulahian nasilyo sa templo. Kon ang leksyon nakulit sa kasingkasing, kini dili mawala.
Akong nakat-onan nga samtang ako nagtan-aw sa mga matinud-anong mga sulugoon sama ni Jessie Cox nga ang matag lider mahimong usa ka matinud-anon nga magbalantay, moserbisyo ubos sa direksyon sa atong halangdon ug Maayo nga Magbalantay, adunay pribelihiyo sa pagdumala ug pagpangga ug pag-atiman niadtong kinsa nasayud ug nahigugma sa Iyang tingog (tan-awa sa Juan 10:2–4).
Nangita sa Nahisalaag nga Karnero
Tuguti ako nga mopakigbahin og dugang nga kasinatian nga akong nasinati isip usa ka bishop. Akong gitiman-an usa ka Dominggo sa buntag nga si Richard, usa sa among mga priest nga panagsa ra nga motambong, karon wala na usab motambong sa miting sa priesthood. Akong gibiyaan ang korum ubos sa pagbantay sa adviser ug mibisita sa panimalay ni Richard. Ang iyang inahan miingon nga siya nagtrabaho sa lokal nga garahian nga moayo sa mga sakyanan. Ako nagdrayb padulong sa garahian aron sa pagpangita ni Richard ug nangita bisan asa apan wala gyud makakita kaniya. Sa kalit lang, ako nakadawat og inspirasyon sa pagli-li sa ubos sa karaan nga lungag sa grasa nga nahimutang sa kilid sa bilding. Gikan sa kangitngit ako nakakita og duha ka mga nagsiga nga mata. Ako nakadungog kang Richard nga miingon, “Nakit-an gyud ko nimo, Bishop! Mosaka na ko.” Samtang si Richard ug ako nag-istoryahanay, siya akong giingnan kon unsa kami gimingaw kaniya ug nagkinahanglan kaniya. Ako nakakuha og pasalig gikan kaniya nga siya motambong na og mga miting.
Ang iyang pagka-aktibo talagsaon kaayong milambo. Siya ug ang iyang pamilya sa kadugayan mibalhin, apan duha ka tuig ang milabay ako nakadawat og imbitasyon nga mamulong sa ward ni Richard sa wala pa siya molarga og misyon. Sa iyang pagpamulong niadtong adlawa, si Richard miingon nga ang nakapausab sa iyang kinabuhi mao kadtong siya nakit-an sa iyang bishop nga nagtago sa lungag sa grasa ug mitabang kaniya nga mobalik sa pagka-aktibo.
Akong mga kaigsoonan, ang ato mao ang responsibilidad, gani ligdong nga buluhaton, sa pagduol sa tanan niadtong mga kinabui nga kita gitawag sa pag-impluwensya. Ang atong buluhaton mao ang paggiya kanila padulong sa celestial nga gingharian sa Dios. Unta kita gayud makahinumdom nga ang pandong sa pagkapangulo dili kupo sa kaharuhay apan mao ang toga sa responsibilidad. Kita unta motabang sa pagluwas niadtong kinsa nanginahanglan sa atong tabang ug sa atong paghigugma.
Samtang kita nagmalampuson, sa pagdala og usa ka babaye o lalaki, usa ka batang babaye o lalaki balik sa pagka-aktibo, kita nakatubag sa kinasingkasing nga pag-ampo sa usa ka asawa o igsoon nga babaye o inahan, nagtabang nga matuman ang dakong tinguha sa usa ka bana o igsoon nga lalaki o amahan. Kita nagtahud sa direksyon sa usa ka mahigugmaong Amahan ug nagsunod sa ehemplo sa usa ka masulundon nga Anak (tan-awa sa Juan 12:26; D&P 59:5). Ug ang atong mga pangalan sa kahangturan pagatahuron niadtong kinsa atong gitabangan.
Sa akong tibuok kasingkasing ako nag-ampo nga ang atong Langitnong Amahan kanunay nga moggiya kanato samtang kita maningkamot nga moserbisyo ug moluwas sa Iyang mga anak.
Mga paghulagway pinaagi ni Jeff Ward; gilitratohan ni David Newman