Gikan sa Ubos PADULONG sa Taas
Kining batan-on nga babaye gikan sa Uruguay nasayud unsaon sa pag-adto sa dapit nga iyang gustong adtoan.
Kon ikaw adunay talento, ang mga tawo usahay moingon kanimo nga kini maoy maghatud kanimo ngadto sa kalampusan. Apan sa kaso ni Joselén Cabrera, ang iyang talento midala kaniya ngadto sa ubos sa kalibutan—Antarctica. Ug sa pagbuhat niini siya nakakat-on nga ang maayo nga mga damgo angayan nga kab-uton, ug uban niana nga mga damgo adunay mga tawo nga andam motabang kon sila gikinahanglan.
Sa dihang siya 14 pa, si Joselén nakadaug og kontest sa drowing nga gipasiugdahan sa Asociación Civil Antarkos sa iyang lumad nga nasud, sa Uruguay. Ang ganti: usa ka pagbiyahe ngadto sa Antarctica alang kaniya ug sa iyang magtutudlo sa eskwelahan, uban sa grupo sa laing mga estudyante ug mga magtutudlo. Ang iyang amahan ug ang babaye nga nagtudlo kaniya og art mitabang sa pagpakita kang Joselén unsaon sa paghuman sa drowing nga iyang gustong buhaton.
Ang iyang pagbiyahe usa ka kulbahinam nga tulo ka bahin nga pagsuroy-suroy: una, usa ka pagsakay sa military nga eroplano gikan sa Montevideo, Uruguay, ngadto sa Punta Arenas, Chile, dayon usa ka pagsakay sa eroplano padulong ngadto sa Chilean base sa Antarctica, gisundan og pagsakay sa bus padulong ngadto sa Uruguayan outpost, Artigas Antarctica Scientific Base, mga 3,000 ka mga kilometro gikan sa Montevideo. Daghang mga nasud ang adunay mga scientific base nga nagtipon sa King George Island duol sa baybayon sa Antarctica.
Ang drowing ni Joselén ug ang kasaysayan sa iyang pagbiyahe gipakita sa nasyonal nga magasin, nga Uruguay Natural.
Ang Antarctica dili gyud kaayo mao sa iyang gihunahuna niini, miingon si Joselén, nga nagpahiyum. Ang iyang drowing nagpakita og mga penguin ug mga yelo. Ting-init kadto sa dihang siya mibisita—snow nga nagbundo sa mga yuta nga walay tanom ug pipila ka mga penguin. Apan kadto naghatag kaniya og oportunidad nga makakita og mas daghan nga mga talan-awon. Siya nalingaw nga naglakaw-lakaw subay sa baybayon, diin iyang nakita ang Collins Glacier, ang Drake Passage, ug ang Lake Uruguay, diin ang iyang nasud nagkuha sa presko nga tubig. Siya usab nakahimo sa pagbisita sa uban pang mga base.
Ang pagbiyahe usa ka damgo nga natuman alang kang Joselén, kinsa karon 19 na ug miyembro sa Colonia Suiza Branch, Colonia Uruguay District. Sukad adto nga pagbiyahe, iyang nahimo nga ang uban niya nga mga damgo matinuod usab. Usa niana mao ang pagkompleto sa iyang mga kasinatian sa Personal nga Kauswagan ug pagdawat sa iyang Pahalipay sa Batan-ong Pagkababaye. Gisul-ob ni Joselén ang iyang medallion, siya miingon, aron siya mahinumdom unsa ang iyang nakab-ot ug unsa siya sa umaabut isip usa ka anak nga babaye sa Dios. Karon nga si Joselén nakahuman na sa iyang high school, siya nagplano nga magtuon og architecture sa unibersidad.
Sa pagkakaron, wala pay daghang mga oportunidad sa pagpakigbahin sa iyang pagpamatuod sa eskwelahan. Samtang ang mga higala nagrespeto sa iyang gituohan, sila dili kaayo maghisgut kabahin sa relihiyon. Si Joselén hilum lamang apan dili gayud mahadlok sa pagsulti unsa ang tinuod. Kana nahitabo kausa sa dihang ang usa ka estudyante misulti sa uban diha sa klase nga ang mga Santos sa Ulahing mga Adlaw gipugos sa pagbayad og ikapulo. Dili, dili kana mao ang paagi, siya mikorihir. “Kami mohatag nga wala pugsa,” siya miingon, nagpasabut nga ang ikapulo usa ka boluntaryo nga paghalad ngadto sa Dios.
Si Joselén nagdako sa Simbahan, apan siya nakabaton og iyang kaugalingon nga pagpamatuod sa dihang siya mag 12 anyos na ug nakasabut nga siya dili mahimong kanunay nga magsalig sa kahibalo sa iyang mga ginikanan. Siya miingon nga ang pagbaton og usa ka pagpamatuod “dili usa ka ‘Kalit!’ nga hitabo. Apan ako nasayud nga ang ebanghelyo nakahatag kanako og hingpit nga kalipay.”
Siya kanunay nga mouban sa mga sister missionary panahon sa bakasyon sa ting-init. Usahay, makahigayon siya og pakigbahin sa pagpamatuod ngadto sa mga tawo nga iyang nailhan. Usa ka adlaw ang leksyon sa misyonaryo nahitabo uban sa iyang labing suod nga higala sa eskwelahan. “Ako gyud siyang gisultihan unsa ang akong tinuod nga gibati,” miingon si Joselén. Si Joselén malipayon nga siya nakahimo sa pagpakigbahin sa iyang pagpamatuod ngadto sa iyang higala.
“Ako ganahan sa istorya ni Joseph Smith, sa dihang siya nag-atubang og lisud nga higayon didto sa Sagradong Kakahoyan ug nagpadayon gihapon sa iyang pag-ampo,” siya miingon (tan-awa sa Joseph Smith—Kasaysayan 1:15–17). “Ako nadani kaayo sa iyang kaisug.” Siya midayeg sa paagi nga ang batan-ong propeta nagpabiling matinud-anon sa unsay iyang nahibaloan, bisan kon gikataw-an siya sa uban.
Si Nephi lain usab niya nga bayani. “Ako ganahan kaayo sa kaisug ni Nephi sa dihang wala niya tuguti nga pugngan siya sa iyang mga igsoong lalaki,” siya miingon (tan-awa sa 1 Nephi 3:14–21; 4:1–4).
Adunay lain nga pangandoy nga iyang gitrabaho karon, ug kini may kalabutan sa lain niya nga paboritong kalingawan: ang musika. Si Joselén ug iyang igsoon nga babaye, nga si Ileana, bag-ohay lang nakakompleto sa ilang sertipiko isip mga magtutudlo sa organ. Si Joselén ganahan kaayo nga motugtog og musika—gikan sa mga kanta sa Primary ngadto sa mga musika sa salida—ug siya ganahan nga maminaw og musika, ilabi na sa Mormon Tabernacle Choir.
“Kon ako adunay problema, usa ka himno ang mosulod sa akong hunahuna,” siya miingon. “Ang mga himno nakatabang kanako sa pagpangita og mga tubag.” Siya mitambong og seminary kada adlaw sa tingklase didto sa balay tigumanan sa branch nga dili kaayo layo gikan sa iyang panimalay. “Usahay moadto ako og sayo ug molingkod sa piano ug motugtog og mga himno,” siya miingon.
Kon adunay broadcast sa kinatibuk-ang komperensya, siya sayo nga moadto aron siya makalingkud ug makapaminaw sa prelude nga musika sa Tabernacle Choir.
Karon nga si Joselén nakaadto na sa Antarctica—usa ka dapit diin gamay lang ang mga tawo sa kalibutan ang makakita gayud niining dapita—aduna pa bay laing espesyal nga dapit nga iyang gustong bisitahan?
“Ako ganahan nga motambong sa kinatibuk-ang komperensya ug maminaw nga manganta ang choir,” siya miingon.
Kinsay nasayud? Kon si Joselén makahimo sa pag-adto sa ubos nga bahin sa kalibutan, unsay makapugong kaniya sa pagkab-ot sa bisan unsa nga iyang gustong buhaton.
Gilitratohan ni Don L. Searle ug sa maayong kabubut-on sa pamilyang Cabrera; mapa pinaagi ni Thomas S. Child
Mga talan-awon gikan sa pagbisita ni Joselén ngadto sa Antarctica.
Ubos: Si Joselén (nakapula) uban sa iyang mama, nga si Raquel; iyang papa, nga si Ruben; ug iyang igsoon nga babaye, nga si Ileana. Sa tunga: Si Joselén uban sa iyang mga handumanan sa iyang pagbiyahe. Sa tuo: Si Joselén nagpraktis sa keyboard.