Ang Atong Pamilya Magmalig-on

Ni Cheryl Esplin

“Ug kamo dili makabaton og hunahuna sa pagpasakit sa usag usa, apan sa pagpuyo nga malinawon” (Mosiah 4:13).

Ang pisi adunay daghang mga lanot nga hugot nga pagkabugkos. Kon ang usa ka lanot maputol, makapahuyang kini sa pisi.

Ang inyong pamilya mahimong itandi ngadto sa usa ka pisi. Ang matag sakop nagrepresentar sa usa ka lanot. Kon kamo magtambayayong sa pagbuhat og maayo, ang tibuok pamilya mas molig-on. Ang matag sakop sa pamilya adunay responsibilidad sa pagtabang sa paglig-on sa usag usa.

Hunahunaa ang mahitungod ni Nephi ug giunsa niya sa pagtabang nga malig-on ang iyang pamilya. Samtang sila mipanaw sa kamingawan, ang gapasan ni Nephi nabali. Dili sila makakuha og pagkaon, ug silang tanan gikapoy ug gigutom. Daghang mga sakop sa pamilya nasuko ni Nephi, ug sila nagbagulbol batok sa Ginoo.

Si Nephi wala magbagulbol o masuko. Nagbuhat siya og laing gapasan gikan sa kahoy ug usa ka pana gikan sa tul-id nga kahoy. Nangutana siya sa iyang amahan, nga si Lehi, asa siya moadto aron mangayam og pagkaon. Dayon si Nephi nakakuha og pagkaon alang sa iyang pamilya. Malipayon sila, ug sila nagpaubos sa ilang mga kaugalingon ug nagpasalamat ngadto sa Ginoo. (Tan-awa sa 1 Nephi 16:18–32).

Kamo ug ang mga sakop sa inyong pamilya makatabang sa usag usa nga malig-on pinaagi sa pag-ampo og dungan, pagtinabangay sa usag usa, pagpakita og kamabination ug gugma, pagbasa og dungan sa mga kasulatan, paglingaw-lingaw og dungan sa mga kalihokan, ug paghimo og family home evening.

Kalihokan

Tangtanga ang pahina H5 gikan sa magasin, ug ipapilit kini sa baga nga papel. Sa family home evening, hisguti ang mga butang nga makapalig-on sa inyong pamilya. Isulat kini nga mga ideya sa tsart. Duha ka mga ideya ang gisugyot na. Ibitay ang tsart sa dapit nga makita sa inyong pamilya ug makagamit niini kanunay.

Ang Atong Pamilya Magmalig-on

1. Ang atong pamilya makaampo og dungan.

2. Ang atong pamilya dungan nga makagahin og panahon.

Mga Ideya sa Panahon sa Pagpakigbahin

Ang pamilya nga pag-ampo makapalig-on sa akong pamilya. Samtang ang mga klase sa mga dagko mobasa sa 3 Nephi 18:21 og kusog, hangyoa ang ubang mga bata sa pagpaminaw unsay gisugo ni Jesukristo kanato (pag-ampo diha sa atong mga pamilya). Pangayo og mga tubag. Hangyoa ang unom ka mga bata sa pag-anha sa atubangan sa kwarto. Ipapilit ang mosunod nga ginunting nga mga pulong sa matag bata sa random nga paagi: pamilya, pag-ampo, makapalig-on, sa akong, pamilya. Hangyoa ang ubang mga bata sa pagtabang sa pagsagol-sagol sa mga bata aron ang mga pulong mahan-ay sa sakto. Ipasulti ang hugpong sa mga pulong nga magdungan. Ipakita ang Pakete sa Hulagway sa Ebanghelyo 606 (Pag-ampo sa Pamilya), ug ipasabut nga kita giawhag nga maghimo og pag-ampo sa pamilya kada gabii ug kada buntag. Pasugyuta ang mga bata og mga butang nga ilang mabuhat nga makatabang sa ilang mga pag-ampo sa pamilya. Isulat ang ilang mga sugyot sa pisara. Ipapiyong sa mga bata ang ilang mga mata ug ipahulagway sulod sa hunahuna ang ilang mga pamilya nga nagluhod sa pag-ampo samtang imong kantahon ang kanta o himno mahitungod sa pag-ampo. Ihatag ang mga lapis ug mga piraso sa papel nga nag-ingon “Pamilya nga pag-ampo makapalig-on sa akong pamilya.” Hangyoa ang mga bata sa pagdrowing sa ilang mga pamilya nga nagluhod sa pag-ampo. Awhaga sila sa pagdala sa litrato ngadto sa ilang balay ug ibitay kini sa usa ka lugar nga kini mopahinumdom sa ilang mga pamilya nga maghimo og pag-ampo sa pamilya.
Ang pagbasa sa mga kasulatan makapalig-on sa akong pamilya. Ipakita ang Biblia, Basahon ni Mormon, Doktrina ug mga Pakigsaad ug Perlas nga Labing Bililhon. Pagdula og tag-an tag-an pinaagi sa paghatag og mga clue sa pagtabang kanila nga makatag-an hain sa upat ka mga basahon ang inyong gipasabut. Pananglitan: “Kini nga basahon naghisgot mahitungod sa kasaysayan ni Joseph Smith ug adunay mga Artikulo sa Hugot nga Pagtuo” (Perlas nga Labing Bililhon). Samtang matag-anan ang matag basahon sa kasulatan, ipasubli og sulti sa mga bata ang pangalan niini. Itudlo nga ang mga kasulatan mao ang pulong sa Dios. Kini nagtudlo mahitungod ni Jesukristo ug sa Iyang ebanghelyo. Ang mga kasulatan makapalig-on sa atong mga pamilya kon kita mobasa niini kanunay. Ipanghatag ang usa sa mosunod nga mga pakisayran sa kasulatan ngadto sa matag klase: Exodo 20:12; Juan 13:34; Mga Taga-Efeso 4:32; 1 Nephi 3:7; 3 Nephi 18:21; Doktrina ug mga Pakigsaad 59:7. Hatagi ang matag bata og blangko nga ginunting nga papel ug lapis. Sultihi ang mga bata sa pagsunod samtang ang ilang magtutudlo mobasa sa kasulatan. Dayon ang matag bata kinahanglang mangita sa usa ka butang nga giingon sa kasulatan nga makatabang sa iyang pamilya nga magmalig-on ug magmalipayon. Ipasulat sa mga bata diha sa ginunting nga papel ug dayon ipakigbahin sa mga sakop sa klase. Dapita ang matag klase sa pagbasa sa ilang ginunting nga papel ngadto sa uban sa Primary. Isulti ang usa ka kasinatian sa dihang ang mga kasulatan nakapalig-on sa inyong pamilya. Awhaga ang mga bata sa pagbasa sa mga kasulatan sa indibibwal ug isip usa ka pamilya.

Paghulagway pinaagi ni Dilleen Marsh