Ang Among Gagmay nga Piraso sa Langit
Human nga kami nabunyagan niadtong 1992, ang akong pamilya mibuhat sa tanang mga butang nga mag-uban, apil ang pagtambong sa mga miting sa Dominggo, mga komperensya sa Simbahan, ug uban pang mga kalihokan. Apan paglabay sa panahon, ang mga butang nangausab, ug sa kaulahian akong nakita ang akong kaugalingon nga nag-inusara sa simbahan—ang ubang mga miyembro sa among pamilya nahimong dili kaayo aktibo. Pagkahuman niini, kon ako makadungog sa usa ka tawo sa simbahan magtudlo kabahin sa mahangturong pamilya, masakitan ang akong kasingkasing ug grabe nga kagul-anan ang moabut kanako.
Pagka 1995 ako mihukom nga mokuha sa akong patriyarkal nga panalangin aron sa pagkat-on kon unsa pa ang gusto sa Ginoo alang kanako ug sa pagdawat og kalig-on. Ang mga panalangin naglangkob sa mosunod nga mga saad: pinaagi sa pagpuasa, pag-ampo, ug family home evening, akong mapabalik ang akong pamilya “sa ebanghelyo.” Ako kanunay nga nag-ampo ug nagpuasa para sa akong pamilya, apan ako wala mosunod sa tambag sa pagbuhat og family home evening.
Sa kaulahian ako mibiya sa akong panimalay ngadto sa São Paulo, Brazil, aron sa pag-alagad og misyon. Samtang nangalagad, ako nakakita og daghang mga pamilya nga nagkatibulaag, apan samtang ako nagtuon sa akong patriyarkal nga panalangin, ako nakakita og solusyon para niadto nga mga panimalay: family home evening. Pinaagi sa pagtudlo sa mga katawhan kabahin sa family home evening, akong nakita nga ang mga pamilya nalig-on, mga magtiayon nagkauli, ug mga anak nagkahiusa. Sa mubo nga pagkasulti, akong nakita ang mga panimalay nausab ngadto sa gagmay nga mga piraso sa langit.
“Kon kini nahimo sa mga pamilya dinhi sa akong misyon,” ako naghunahuna, “nganong dili man sa akong kaugalingong pamilya?”
Human sa akong misyon ako determinado nga maghimo og family home evening uban sa akong pamilya. Sa sinugdanan, ang tanan miapil nga napugos, ug ako adunay problema sa paghuman sa akong leksyon nga akong giplano. Apan ako nasayud nga ang Ginoo dili motambag kanako sa pagbuhat og usa ka butang nga dili mahimong usa ka panalangin, busa ako wala mohunong. Sa kaulahian, ang saad sa akong patriyarkal nga panalangin natuman.
Kon ako dili maghimo og family home evening, ako makadungog og mga reklamo gikan sa akong pamilya. Ang tanang miyembro sa pamilya moapil dala ang mga opinyon, mga ideya, ug mga tambag, ug sila naminaw gayud sa mensahe. Bisan kami mga tigulang na, kon panahon na sa tigdula, kami mora og nagparty.
Ang resulta mao, ang mga miyembro sa akong pamilya nagsugod na usab sa pagsunod sa mga sugo nga ilang gibaliwala, ug sila nahimong mas aktibo sa Simbahan.
Ako tinud-anay nga makasulti nga ang akong panimalay nahimo nga usa ka gamay nga piraso sa langit, salamat sa usa ka dinasig nga programa nga kinahanglang mahimong usa ka tradisyon sa matag balay: ang family home evening.