Usa ka Higayon sa Pag-usab
Ako miyembro na sa Simbahan sulod sa pito ka tuig. Nianang panahona, ako sa kanunay nahibalo nga kini mao lamang ang tinuod nga Simbahan ni Ginoong Jesukristo, apan sa usa ka higayon sa akong kinabuhi, ako dili kaayo aktibo.
Ang problema nagsugod dihang ang among pamilya mibalhin ngadto sa usa ka bag-o nga lungsod. Miabut og pipila ka mga buwan aron mahibaloan ang dapit sa balay tigumanan nga kinahanglan namong adtoan ug pipila pa ka mga semana aron sa pagsugod og tambong. Ako wala kaayo ganahi kabahin sa kausaban, ug human sa pipila ka mga semana, ako mihunong sa pagtambong.
Usa ka adlaw ako nakadawat og wala damha apan maabi-abihon nga bisita gikan sa akong bishop. Siya midapit kanako sa pagbalik og simba sa umaabot nga mga Dominggo ug motambong og seminary. Ako mihukom sa pagdawat niining mga imbitasyon.
Human sa pipila ka semana sa akong pagbalik og simba, ang bishop mipaila-ila sa programa sa Katungdanan ngadto sa Dios ngari kanako. Siya mipasabut unsa ang naa sa sulod niini, ug ako nainteresado sa pagsugod niini.
Ako misugod sa pagsulat ug pagkompleto sa mga tumong diha sa pamplet. Ako nagsugod sa pagkaamgo nga ang programa sa Katungdanan ngadto sa Dios nagtabang kanako nga mausab ang akong kinabuhi ngadto sa mas maayo. Ako nahimong mas aktibo sa Simbahan ug ganahan nga moadto sa seminary. Ako naningkamut nga mas mopuyo sa mga sumbanan sa Simbahan, ug ako ganahan nga mobasa sa mga kasulatan ug sa Liahona.
Sa dihang ako misugod sa programa sa Katungdanan ngadto sa Dios, ako naghimo og mga tumong sama sa pag-adto og misyon ug sa pagtambong sa Latter-day Saint preparatory school Benemérito de las Américas, uban semana sa daghan pa nga mga tumong. Sa miaging tinglarag, ako nakadawat sa Duty to God Award ug sa Melchizedek Priesthood, ug ako hapit na molarga padulong sa misyon.
Ako nagpasalamat sa akong Langitnong Amahan matag adlaw sa paghatag kanako og higayon sa pag-usab ug nahimong takus nga miyembro sa Iyang Simbahan. Ako mapasalamaton sa mga programa ug sa mga lider sa Simbahan nga mitabang kanako nga mausab.