Ang mga Pioneer sa Ghana

Sa dihang si GayLynn Ribeira, usa ka estudyante sa art sa Brigham Young University, nakadungog sa talagsaon nga istorya sa mga Santos nga pioneer sa Ghana, siya gusto kaayo nga mobuhat og ilang mga larawan alang sa iyang proyekto sa paghulagway sa bachelor of fine arts. Sa tinglarag sa 2005, siya misugod sa paghimo og pamaagi sa pagbuhat niini. Ang resulta mao ang usa ka pagtugot kaniya ug sa tulo pa ka ubang mga estudyante nga sila si—Jesse Bushnell, Emmalee Glauser, ug Angela Nelson—sa pagpalabay sa bulan sa Mayo ug Hunyo 2006 didto sa Ghana. Ang magtutudlo sa BYU nga si Richard Hull mao ang nagdumala sa proyekto. Silang lima nagtigum og mga istorya ug mga litrato dili lamang sa mga Santos nga mga pioneer apan usab sa mas bag-o nga mga miyembro. Ang daghan kaayong natigum nga mga impormasyon nahimo nga mga painting pila ka bulan human sa pagbiyahe ug gibitay sa mga bong-bong sa B. F. Larsen Gallery sa BYU pagka Oktubre 2007. Ang mosunod mao ang pipila niana nga artwork.

1. Barug nga Mag-inusara–Alang sa Usa ka Butang, Adjoa, ni Angela Nelson

“Nindot kaayo nga mahimong miyembro kon kita anaa sa panimalay o taliwala sa mga katawhan,” miingon si Adjoa Amoa-Ampah, kinsa nagtuon para mahimong usa ka doktor. “Apan ang usa ka tinuod nga babaye nga Santos sa Ulahing mga Adlaw makatawag gihapon sa iyang kaugalingon nga usa ka miyembro bisan kon siya nag-inusara. Ang Simbahan usahay masaypan sa pagsabut, busa importante alang kanako nga mahimong usa ka ehemplo sa kamatuoran.”

2. Joseph William Billy Johnson: Pagkabalaan ngadto sa Ginoo, ni Emmalee Glauser

“Ang pagka mapasalamaton ug paghigugma nagagikan kaniya,” ang artist nga si Emmalee Glauser misulat kabahin kang Brother Johnson sa Cape Coast. “Siya mitudlo sa ebanghelyo sulod sa 14 ka tuig, ug labaw sa liboan ka mga tawo ang andam na alang sa pagpabunyag sa diha nga ang mga misyonaryo miabut pagka 1978. Siya usa ka tawo kinsa mipahinungod sa iyang kinabuhi ug kalag ngadto sa Dios. Siya nakapadasig kanako sa pagpaningkamot nga ang mga kinaiya nga sama kang Kristo sa paghigugma ug gugmang putli mahimong kabahin sa akong pagkatawo.”

3. Bitner Johnson: Apo nga Lalaki sa Patriarch, ni Jesse Bushnell

Gipanganlan gikan kang Presidente Gordon Bitner Hinckley, si Bitner Johnson mao ang anak nga lalaki ni Brigham Johnson ug apo ni Joseph William Billy Johnson.

4. Buntag sa Busua, ni GayLynn Ribeira

5. Tudloi ang Inyong mga Anak sa Kahayag ug Kamatuoran, ni GayLynn Ribeira

Sila si Bishop Kofi Sosu ug iyang asawa, nga si Linda, sa Kumasi milig-on sa ilang pamilya pinaagi sa makanunayon nga pag-ampo sa pamilya, pagtuon sa kasulatan, ug family home evening.

6. Dr. Emmanuel Kissi—“Siya Mipabarug sa Babaye,” ni Jesse Bushnell

Pagka 1983 usa ka pobre kaayo nga babaye nga may anak nga grabe kaayo ang sakit miduol sa usa ka Santos sa Ulahing mga Adlaw nga doktor nga si Emmanuel Kissi nga nangayo og tabang. Si Dr. Kissi adunay mga pagkaon nga gipadala ngadto kaniya gikan sa Simbahan aron iatiman niadtong may kakulangan sa kahimsog sa panglawas. Sa walay bayad, siya mihatag kaniya og bugas, mais, mga batong, ug mantika. Ang babaye miyukbo alang sa pagpasalamat sa atubangan sa doktor. Si Dr. Kissi mipabarug sa babaye pinaagi sa kamot ug miingon, “Kini nga pagkaon gipadala kanimo gikan sa Dios. Kinahanglan nga imong ihatag ang tanan nimong pasalamat ngadto Kaniya.”

7. Mga Sister sa Zion, Emma Boateng, ni Angela Nelson

“Mora og among nakit-an ang dugay na kaayong nawala nga igsoong babaye,” si artist Angela Nelson misulat mahitungod sa usa ka returned missionary nga si Emma Boateng. “Siya ang among tiggiya sa Kumasi ug anaa gihapon kaniya ang kahayag sa usa ka misyonaryo. Si Emma nagtuon og journalism, nagtambong sa institute, adunay problema ug paglaum kabahin sa pagpakig-deyt, ug maningkamot sa ebanghelyo nga mahimong sentro sa iyang kinabuhi. Siya nakaagi usab sa sama nga mga kasinatian nga among nasinati isip mga young single adult.”

8. Si Bishop Kofi ug ang Iyang Amahan: Pagpasayloay sa Amahan ug sa Anak, Emmalee Glauser

Pagkahuman sa iyang misyon, si Kofi gusto nga mouli sa ilang panimalay, apan wala na siya ilha sa iyang amahan. Siya mibati og kadasig sa pag-adto bisan pa. Sa dihang siya miabut, ang iyang amahan nakakita kaniya ug miingon, “Hunong.” Busa siya mihunong.

“Si kinsa ka?” nangutana ang iyang papa.

“Ako ang imong anak nga lalaki.”

“Akong anak nga lalaki?”

“Oo, ang imong anak nga lalaki, si Kofi.” Dinhi iyang nakita ang mga luha nga midagayday sa nawong sa iyang amahan. Ang iyang amahan mibarug ug migakos kaniya.

“O, akong anak, akong anak. Pasayloa gayud ko. Ako nasayud nga imong gibuhat ang sakto. Ako midawat kanimo nga akong anak.”

9. William ug Charlotte Acquah: OUsa ka Kasingkasing ug Usa ka Hunahuna, ni Emmalee Glauser

Sila si William ug Charlotte (ikaduha nga henerasyon nga mga Santos sa Ulahing mga Adlaw) dungan nga nagtubo sa ebanghelyo sulod sa daghang katuigan sa kalisud ug sa hingpit nga kalipay. Niining tanan, sila nagkahiusa diha sa Dios ug sa usag usa. Sila nagkupot sa ilang mga kamot aron sa pagpakita sa ilang gugma sa usag usa—usa ka butang nga nakat-unan ni William gikan sa mga magtiayon nga misyonaryo kinsa nagtudlo kaniya sa pag-ampo ug sa pagkat-on nga siya usa ka anak sa Dios.

10. Bunyaganan nga Dagat, ni Jesse Bushnell

Kini nga malinawon nga dagat mao ang dapit diin ang gatusan ka mga taga-Ghana nabunyagan.

11. Theodora Acquah: TIkatulong Henerasyon nga Anak nga Babaye, ni Jesse Bushnell

Si Theodora mao ang ikatulo nga henerasyon nga Santos sa Ulahing mga Adlaw sa Cape Coast, salamat sa hugot nga pagtuo sa iyang lola kinsa nagpamiyembro sa Simbahan ug mitudlo sa iyang mga anak ug mga apo kabahin sa ebanghelyo. Isip usa ka bag-o nga Santos sa Ulahing mga Adlaw, ang lola ni Theodora miangkon sa mga buluhaton sa pagpanilhig sa balay tigumanan, magsag-ub og binalde nga tubig aron ilimpyo sa sawog, ug mosiguro nga ang tanang mga butang limpyo sa dili pa magsugod ang pagsimba.

12. Unsa ka Lig-on sa Tukuranan, Pamilya Kaku, ni Angela Nelson

“Sa dihang si Brother ug si Sister Kaku midapit kanamo sa ilang panimalay sa Cape Coast, ako mibati nga ako naglakaw padulong sa akong kaugalingong panimalay sa Utah,” misulat ang artist nga si Angela Nelson. “Ang akong paborito nga bahin mao nga pagkahuman sa gubot nga panihapon, ang tanang mga bata nagpundok uban sa ilang mga ginikanan nga nagdala og inablihan nga mga kasulatan. Dili gayud nako makalimtan nga nakauban niini nga pamilya ug nagtan-aw sa mga bata nga naglantaw sa ilang mga ginikanan alang sa giya ug ang ilang mga ginikanan mipakli sa mga kasulatan alang sa mga tubag.”

13. Hannah, ni Richard Hull

Niini nga larawan ni Hannah Bafuh, usa ka Santos sa Ulahing mga Adlaw didto sa Kumasi, ang artist miingon, “Ako naningkamot sa paghulagway sa iyang mahayag, madasigon nga personalidad.”

14. Nag-andam og Panihapon, Emma Boateng, ni Angela Nelson

“Mora og sama kini nga nagtan-aw og sayaw, sila hingpit kaayo nga nagkatakdo sa usag usa,” misulat si Angela Nelson nga naghulagway giunsa sa pamilyang Boateng ang paghimo sa nag-unang pagkaon, nga fufu, gikan sa gamot sa balanghoy. “Ang usa moisa sa taas nga kahoy [alho] ug kusog kini nga ilubok samtang ang usa abtik kaayo nga mobutang sa balanghoy ngadto sa usa ka butangan sa sakto gyud nga panahon nga ang lain molubok niini pag-usab. Adunay ritmo sab ang ilang inadlaw nga kinabuhi, kamakugihon sa pagsunod sa mga sugo. Ang panahon dinhi gisukod pinaagi sa pagpakigrelasyon, sa pagtabang sa mga higala ug pamilya, dili sa mga butang nga nakab-ot. Ako nakakita nga sila makanunayon—ilabi na sa ilang mga pagpamatuod.”