Pagkaangayan ug Pag-ambit sa Pagsimba sa Templo

Itudlo kini nga mga kasulatan ug mga kinutlo o, kon gikinahanglan, lain nga baruganan nga mopanalangin sa mga sister nga inyong gibisitahan. Pagpamatuod kabahin sa doktrina. Dapita kadtong inyong gibisitahan sa pagpakigbahin unsay ilang gibati ug nakat-unan.

Unsaon Nako sa Pagpangandam alang sa Pagsimba sa Templo?

Silvia H. Allred, unang magtatambag sa kinatibuk-ang kapangulohan sa Relief Society: “Ang templo balay sa Ginoo. Siya ang nagdumala sa mga kondisyon diin kini mahimong gamiton, sa mga ordinansa nga kinahanglang ipahigayon, ug sa mga sumbanan nga motugot kanato sa pagsulod. … Ang personal nga katakus usa ka mahinungdanon nga panginahanglan aron matagamtam ang mga panalangin sa templo. Mangandam kita pinaagi sa pagsunod sa mga sugo ug maninguha sa pagbuhat sa kabubut-on sa Dios” (“Balaan nga mga Templo, Sagrado nga mga Pakigsaad,” Liahona, Nob. 2008, 113).

Elder David B. Haight (1906–2004) sa Korum sa Napulog Duha ka mga Apostoles: “Kita kinsa ganahang motambong sa templo kinahanglang magpuyo sa usa ka paagi nga makatabang kanato aron takus nga mosulod ug moambit sa tanan gayud. … Kita mo-eksamin sa atong pagkatakus sa pagsulod sa templo diha sa … mga interbyu uban sa mga lider sa priesthood. Ang atong pirma, uban sa ilaha, diha sa atong rekomend sa templo mopamatuod sa atong pagkatakus sa pagsulod sa templo” (“Come to the House of the Lord,” Ensign, Mayo 1992, 15).

Unsa man ang Mga Panalangin sa Pagkaangayan ug Pag-ambit sa Pagsimba sa Templo?

D&P 110:7:“Ako magpakita sa akong kaugalingon ngadto sa akong mga katawhan diha sa kalooy dinhi niini nga balay.”

Presidente Howard W. Hunter (1907–95): ‘Kita moadto sa templo sa kadaghan nga itugot sa panahon ug sa kwarta ug sa personal nga sirkumstansya. Dili lamang kita moadto alang sa atong mga nangamatay nga kaliwat, apan kita usab moadto alang sa personal nga panalangin sa pagsimba sa templo, alang sa kabalaan ug kaluwasan nga ihatag sulod niadtong gihalad ug gipahinungod nga mga bong-bong. Ang templo usa ka dapit sa katahum, kini usa ka dapit sa pagpadayag, kini usa ka dapit sa kalinaw” (“The Great Symbol of Our Membership,” Tambuli, Nob. 1994, 6).

D&P 38:32: “Ako mohatag nganha kaninyo sa akong balaod, ug didto kamo pagatugahan uban sa gahum nga gikan sa kahitas-an” (tan-awa usab sa D&P 95:8).

Elder Robert D. Hales sa Korum sa Napulog Duha ka mga Apostoles: “Ang mga panalangin sa pagtuga [endowment] sa templo sama ra ka importante alang sa matag usa kanato sama sa atong pagbunyag. Sa ingon niini nga rason kinahanglan nga atong andamon ang atong mga kaugalingon nga kita limpyo aron makasulod sa templo sa Dios. Ang buluhaton sa templo usa ka oportunidad sa pagbuhat sa atong personal nga mga pagtuga ug mga pakigsaad alang sa mga buhi ug usab sa pagbuhat niining sama nga mga ordinansa alang sa mga patay. Tungod niini nga rason kita gisugo sa mga kasulatan sa pagtukod og mga templo ug sa pag-andam sa atong mga kaugalingon nga takus sa pag-apil sa sagradong mga ordinansa ug mga pakigsaad sa templo. …

“Ang nag-unang baruganan sa templo mao ang pagsangkap og mga kinahanglanon nga mga ordinansa alang sa atong kahimayaan sa celestial nga gingharian. Ang mga ordinansa sa templo moggiya kanato ngadto sa atong Manluluwas ug mohatag kanato sa mga panalangin nga moabut kanato pinaagi sa Pag-ula ni Jesukristo” (“Temple Blessings,” sa Brigham Young University 2005–2006 Speeches [2006], 1, 4).

Presidente Gordon B. Hinckley (1910–2008): “Ang matag lalaki o babaye kinsa moadto sa templo uban sa espiritu sa pagkatim-os ug hugot nga pagtuo mobiya sa balay sa Ginoo nga usa ka mas maayo nga lalaki o babaye. Adunay panginahanglan sa makanunayon nga pagpausbaw sa tibuok natong kinabuhi. Adunay panginahanglan usahay sa pagbiya sa kasaba ug sa kasamok sa kalibutan ug motikang sulod sa sagradong balay sa Dios, didto aron mobati sa Iyang espiritu sa palibut sa kabalaan ug kalinaw.” (“Of Missions, Temples, and Stewardship,” Ensign, Nob. 1995, 53).

Gisukip: litrato sa Templo sa Mérida Mexico pinaagi ni Marcos Gonzalez; sa luyo: litrato sa Templo sa Nauvoo Illinois pinaagi ni John Luke