Mga Sumbanan: Kini Magamit sa Tanan
Ang mga hamtong sa usa ka stake sa England nakadiskubre sa ilang kaugalingon sa mga panalangin nga naggikan sa paghatag og maayong pagtagad sa Alang sa Kalig-on sa mga Kabatan-onan.
Sila si Sarah Edwards, Emily Bowles, ug Eleanor McKee ganahan kaayo nga mag-shopping, ug kon sila makabisita og mga tindahan og mga sinina sa Northampton, England, kining mga batan-ong mga babaye nga mga Santos sa Ulahing mga Adlaw magdala og kwarta ug usa ka piho nga booklet. Kining sama nga booklet mogiya sa ilang mga ginikanan kon mopalit og mga sinina o motan-aw og salida sa sine.
Sa Northampton England Stake, ang mga hamtong ingon man usab ang mga batan-on naghimo sa Alang sa Kalig-on sa mga Kabatan-onan nga kabahin sa ilang kinabuhi. Kini nakatabang sa mga ginikanan sa pagtimbang-timbang sa mga salida sa sine ug mga programa sa TV nga ilang pagatan-awon ug mga kalihokan nga ilang apilan. Kini nakatabang sa uban nga mopuyo sa Igpapahulay nga mas hingpit ug makalingaw uban sa ilang mga pamilya. Gani, ang mga hamtong sa stake nagsugod sa pagtawag niini og “Alang sa ImongKalig-on” tungod kay kini magamit usab ngadto kanila.
Si Presidente Clive Joliffe, kinsa na-release isip presidente sa stake sa miaging tuig, miingon, “Kami naghisgot ug nag-ampo kabahin sa pagtabang sa mga pamilya nga molambo diha sa ebanghelyo ug pagtabang sa pag-andam sa among mga anak nga magmisyon ug magminyo sa templo, ug kami nadasig sa paggamit sa pamplet nga Alang sa Kalig-on sa mga Kabatan-onan. Kami gusto nga ang tibuok pamilya makasabut sa mga baruganan nga modala og hingpit nga kalipay sa tanang miyembro sa pamilya.
Ang mga kabatan-onan sa stake nakabantay—ug mapasalamaton—sa kalainan nga nahimo niining gihatagan og gibug-aton nga programa ngadto sa ilang kaugalingon nga pamilya. “Importante gayud kaayo ang paghupot sa mga baruganan, ug sa ingon kami nga mga batan-on molantaw ngadto sa mga hamtong, busa ang Alang sa Kalig-on sa mga Kabatan-onan nagpahinumdom kanila sa mga baruganan nga kinahanglang sundon natong tanan,” miingon si Eleanor McKee, 19. “Maayo alang kanatong tanan nga mapahinumduman unsa ang gilauman gikan kanato ug sa pagsiguro nga walay doble nga mga baruganan.”
Ang dise syete anyos nga si Daniel Kitsell sa Huntingdon Ward midugang, “Ako ganahan sa Alang sa Kalig-on sa mga Kabatan-onan tungod kay dili lamang kini para sa kabatan-onan, apan ako nasayud nga ang akong ginikanan nakadungog usab niini, ug kini nagtabang kanila sa pagsunod sa mga sumbanan.”
Usa ka pamilya nga mibati sa epekto sa pagsunod niini nga tambag mao ang pamilya ni Bishop Richard Auger sa Banbury Ward; ang iyang asawa, nga si Gill; ug ilang duha ka mga anak nga babaye, sila si Hannah ug Charlotte, ang duha bag-ohay lang nga naminyo sa Templo sa London England. Si Bishop Auger, usa ka inspektor sa Thames Valley Police, nakahibalo gayud sa bati kaayong baruganan sa kalibutan ug sa mga epekto niini ngadto sa mga kabatan-onan ug sa ilang mga batasan. “Si Gill ug ako migamit sa Alang sa Kalig-on sa mga Kabatan-onan sa pagkat-on kabahin sa pagkaginikanan aron kami makanunayon ug nakabase sa mga kasulatan,” siya miingon.
“Sa tibuok tuig sa pagkabatan-on sa akong anak nga mga babaye, kami migamit niini isip andam nga giya ug sa daghan pang nagkalain-laing mga pamaagi. Kon ang among mga anak nga babaye mopalit og ilang kaugalingong mga sinina, kini nakapabalaka kanamo, busa amo silang papaliton dala ang pamplet nga Alang sa Kalig-on sa mga Kabatan-onan aron sila mobasa niini pag-usab kon sila mohimo sa ilang mga pagpili.”
Si Hannah, 21, miingon, “Among ibutang ang booklet sa among mga pitaka kay kini klaro nga nagsulti unsa ang angayan ug dili angayan.” Ang managsuon nakakat-on nga sila makahimo sa sinina nga mas ligdong pinaagi sa gamay nga pagtahi o pinaagi sa pagdugang og mga accesory. Si Charlotte, 19, midugang, “Si Hannah ug ako wala gayud mobati nga ang among mga ginikanan mihimo og desisyon para kanamo. Kami nasayud nga ang among mga ginikanan misunod sa propeta ug sa Manluluwas, ug busa pinaagi sa pagsunod sa among mga ginikanan, kami sa kanunay nagpuyo usab sa mga pagtulun-an sa Manluluwas.”
Daghan sa mga hamtong ang miingon nga gawas sa paghatag og sumbanan sa pagkaligdong ug maalamong pagpili sa medya, ang booklet makatabang kanila sa pagpaminaw sa tambag sa propeta kabahin sa pagsunod sa Igpapahulay. Si Sue Preece, presidente sa Relief Society sa Kettering Ward, naglantaw sa Alang sa Kalig-on sa mga Kabatan-onan isip usa ka “himan para kanamo nga gamiton samtang kami nanglimbasug padulong sa pagkahingpit. Kami wala mohunong sa panginahanglan niadtong mga sumbanan sa dihang kami miabut na og 18. Kini mopahinumdom kanako sa pagtimbang-timbang kon kumusta ang akong gipangbuhat, ug aduna nay daghan nga mga kausaban sa akong kinabuhi nga modala kanako nga mas maduol sa akong Amahan sa Langit. Pananglitan, ang Igpapahulay nahimong usa ka panahon alang sa espirituhanong paglig-on alang kanako, pinaagi lamang sa pagbuhat og ginagmay nga kausaban sa akong pamaagi sa pagbalaan niini nga adlaw.”
Si Sister A. J. Hough, sa Kettering Ward usab, misulti kon sa unsang paagi nga ang gihatagan og gibug-aton nga programa sa Alang sa Kalig-on sa mga Kabatan-onan nagtabang kaniya nga mahimong mas maayo nga ginikanan: “Tungod kay ako adunay tulo ka mga tinedyer, ako gusto nga mosiguro nga ako, usab, hingpit nga nagpuyo sa mga sumbanan. Ako determinado sa pagpangita og mga pamaagi aron akong ‘ikapataas ang sumbanan’ ug mahimong usa ka maayo nga ehemplo. Ako mihukom sa seksyon sa ‘Pagtuman sa Adlaw nga Igpapahulay’ ug mihimo sa akong kaugalingon og bag-o nga mga tumong aron sa pagpalambo sa akong personal gayud nga ehemplo. Ako naglaum nga ako mahimong usa ka mas maayo nga impluwensya ngadto sa mga gihigugma nako kaayo —ang akong pamilya. Kami karon naggamit sa booklet panahon sa family home evening. Ug kon kami mamugnaon sa among mga kalihokan sa pamilya o magplano nang daan aron hingpit nga mabalaan ang Igpapahulay, kami mogamit niini nga mga sumbanan sa paggiya kanamo.”
Kadtong mga matang o klase sa ehemplo wala gayud mawala sa mga kabatan-onan sa stake. Sama sa daghang mga batan-ong mga lalaki, ang 16 anyos nga priest nga si Josh Reynolds gikan sa Kettering Ward ganahan kaayo og football ug sa sinugdanan nakakita og kalampusan isip usa ka batan-on. Apan ang panagsumpaki mitumaw sa dihang siya gusto nga moduwa uban sa iyang mga higala sa lokal nga team diin ang mga dula himoon sa Dominggo. “Ang akong mama ug papa mipasabut kon ngano ug unsaon nga kita isip mga miyembro sa Simbahan kinahanglan nga mobalaan sa adlaw nga Igpapahulay. Ako midawat niini ug pagkataud-taud ako wala na mobati og kahiubos. Ako malipayon kaayo sa akong mga ginikanan sa pagpakita og maayong ehemplo ngari kanako ug pagtudlo kanako sa pagbalaan sa adlaw nga Igpapahulay.”
Usa ka ginikanan sa lima ka mga bata, si Heather Slattery, sa Kettering Ward, miingon, “Usahay isip mga ginikanan ug isip mga hamtong kita maghunahuna nga kining mga sumbanan mga mithi lamang alang sa mga kabatan-onan ug nakalimut nga kita usab diay dali nga matintal sama sa mga kabatan-onan. Ang Alang sa Kalig-on sa mga Kabatan-onan usa ka kanunay nga pahinumdom nga kita kinahanglan nga mokupot sa gunitanan nga puthaw kauban sa atong mga kabatan-onan ug magtinabangay, maglig-on ug magsuporta sa usag usa isip mga anak sa atong Langitnong Amahan.”
Sa walay pagduha-duha ang mga miyembro sa Northampton stake mibati nga sila mas nalig-on nga mga indibidwal ug mga pamilya pinaagi sa pagsunod sa mga sumbanan sa Alang sa Kalig-on sa mga Kabatan-onan. Si Presidente Joliffe mitibuok sa iyang mga pagbati: “Ang pamplet usa ka dinasig ug yano nga gisulat aron ang matag usa kanato makakita og klaro unsa ang gilauman sa Langitnong Amahan gikan sa Iyang mga anak. Ako naningkamot sa pagsunod sa mga sumbanan aron ang akong mga anak madasig sa pagsunod sa akong ehemplo. Ako adunay lig-on nga pagpamatuod nga kita gipanalanginan nga makabaton og klaro nga tambag kon unsaon nato sa pagpuyo aron makasarang sa tanan nga giandam sa atong Amahan para kanato.
Sa dihang si Josh Reynolds miatubang og usa ka pagpili kabahin sa pag-apil og sport matag Dominggo, ang maayong ehemplo ug pagtudlo sa iyang mga ginikanan nakatabang kaniya sa paghimo og sakto nga desisyon.
Sila si Sarah Edwards, Eleanor McKee, ug Emily Bowles nakakita nga ang Alang sa Kalig-on sa mga Kabatan-onan usa ka giya nga madala-dala kon sila mamalit og mga sinina.
Ang pamilyang Auger—sila si Charlotte, Gill, Richard, ug Hannah—dugay na nga miila nga importante alang sa mga ginikanan ug mga anak nga anaa sa sama nga pahina kon ang sumbanan ang pagahisgutan.
Gilitratohan ni Simon Jones