Higala ngadto sa Higala
Pag-ampo ug Pagkanta ngadto sa Langitnong Amahan
“Ang awit sa mga matarung mao ang usa ka pag-ampo ngari kanako, ug pagatubagon uban sa usa ka panalangin diha sa ilang mga ulo” (D&P 25:12).
Sa bata pa ako, kanunay ko nga mawad-an og mga butang. Akong pangitaon sa palibut, pero dili nako makit-an. Human makapangita sa balay makaduha o makatulo ka mga higayon nga walay mahimo, mag-ampo ako ngadto sa Langitnong Amahan sa pagtabang kanako. Kon magsugod na usab ako sa pagpangita, akong makit-an ang nawala. Nahitabo kana kanako makadaghan nga higayon sa bata pa. Kadtong mga higayon nakatabang kanako nga makat-on sa pagsalig nga ang Langitnong Amahan naminaw ug motubag sa akong mga pag-ampo.
Sa dako na ako, ang akong pagpamatuod nalig-on samtang gitubag sa Langitnong Amahan ang akong mga pag-ampo. Ang Langitnong Amahan dili mopakyas kaninyo. Ang mga kasulatan nag-ingon, “Pangayo, ug kamo pagahatagan; pangita, ug kamo makakaplag; pagtuktok, ug kamo pagaablihan” (Mateo 7:7). Ako nasayud nga kon kamo mangayo sa kinasingkasing ug uban sa tinuod nga katuyoan, ang Langitnong Amahan mohatag kaninyo sa mga tubag nga inyong gipangita.
Sa gamay pa ako, ganahan ko sa mga kanta sa Primary. Ganahan ko nga mokanta niini, bisan og ako wala makasabut sa tanang mga pulong. Samtang ako nagdako, akong mahinumduman ang mga kanta, ug kini nakatabang kanako sa pagbuhat sa matarung nga mga butang. Ganahan pa gihapon ko nga mokanta sa mga kanta. Nahinumdom ko “Ang atong mga kolor sa Primary mao ang usa, duha, tulo—pula, yelo, ug blue. May mensahe ni nimo ug nako. Tanan may simbolo!”1 Nahinumdom usab ako “Kon ikaw nakakita, tawong nagkusmod. Palabya ug bakwia pahiyumi siya.”2 Ang kanta mahitungod sa tawong maalamon ug tawong walay kaalam usa sa akong paborito.3
Kahibalo ko nga ang mga kanta sa Primary usa ka tinubdan sa kalig-on alang kanako. Karon nakapalipay kini kanako nga makakita sa mga bata nga makat-on sa mga kanta sa Primary. Ako nasayud nga ang mga kanta makatabang kaninyo sama nga kini nakatabang kanako.
Ang pag-ampo ug pagkanta sa mga kanta sa Primary sa gamay pa akong bata nakatabang kanako nga makaila sa Langitnong Amahan. Nasayud ako nga ako anak sa Dios. Nakahibalo gyud ko niini. Bisan og makabuhat ako og mga sayop, mahigugmaon Siya ug manggihatagon ngari kanako. Akong nakat-unan nga kon kamo mohimo og bisan usa ka yano, gamay nga matarung nga butang, Siya mobu-bo sa mga panalangin diha kaninyo. Walay duha-duha niini. Siya nakaila kanako. Siya nahigugma kanako. Ako Iyang anak.
Sama kanako, kamo anak sa atong Langitnong Amahan. Bisan unsa pay mahitabo, bisan kon ang uban motalikod kaninyo, ang atong Langitnong Amahan dili motalikod kanato. Anaa Siya kanunay. Siya nahigugma kaninyo.
Paghulagway pinaagi ni Matt Smith.
Mga litrato sa maayong kabubut-on ni Elder Teh