Usa ka Eksamin sa Pagkamatinuoron
Kadto dili usa ka eksamin sa among kahanas sa math o sa among pagkahigala; kadto usa ka eksamin sa among pagkamatinuoron.
Patricia: Ang akong labing suod nga higala, si Francini, ug ako mao lamang ang pipila sa mga miyembro sa Simbahan sa among eskwelahan sa Brazil, ug kami sa kanunay makakita nga ang gagmay nga mga butang nga among buhaton makahimo og dako nga kalainan.
Usa ka sama niini nga butang ang nahitabo namong duha ni Francini pagka Sabado sa among klase sa math. Niining piho nga adlaw, si Francini wala motunga sa klase. Atol sa klase, ang mga eksamin nga among gitubagan sa nangaging mga adlaw gipangbalik na. Ako wala gayud kaayo magpakabana sa diha nga ang magtutudlo mibutang sa resulta sa eksamin ni Francini sa akong lamesa ug naghangyo kanako nga ihatag kini ngadto kaniya.
Tungod kay si Francini ug ako naghisgut nang daan kon giunsa namo pagtubag ang eksamin, ako natingala nga ang iyang grado mas dako pa kompara kaysa akong gituohan. Akong gitan-aw ang iyang papel sa eksamin ug nakakita ko nga gi-tsekan sa magtutudlo ang sayop nga tubag. Sa walay paghunahuna, akong giingnan ang magtutudlo nga ang grado ni Francini taas ra kaayo.
Wala lang ko nakabantay nga ang tibuok klase nagtan-aw. Sa dihang ako nakasulti na, ang klase misugod sa pagdaot kanako, nag-ingon nga sayop kadtong akong gibuhat ngadto sa usa ka higala ug nga gusto lamang ako nga mas motaas ang akong grado kay sa iyaha.
Ako naglibug ug naglagot sa mga reaksyon. Ako sigurado nga akong gibuhat kon unsa unta ang buhaton ni Francini. Apan adunay usa ka tawo nga miingon nga imposible kaayo alang ni bisan kinsa nga magmatinuoron nga moabut sa punto nga iyang pagamyan ang iyang grado. Ang tanan nagtan-aw kanako isip usa ka traydor ngadto sa akong higala. Ako naningkamot sa pagsulti kanila nga si Francini mahimong matinuoron sa iyang grado ug ingon man aduna pay matinud-anon nga matinuoron nga mga tawo ang anaa sa kalibutan.
Human sa dakong panaglalis, ang magtutudlo ug ang klase mihukom nga ila kaming sulayan. Ang magtutudlo miingon nga iyang padayunon ang sayop nga grado ni Francini ug kami magpaabot ug tan-awon ang iyang reaksyon sa Lunes.
Ako wala ganahi sa ideya. Ako mibati nga ang pagsulay kang Francini dili makiangayon. Apan ang magtutudlo nakahimo na sa iyang desisyon, ug dili na ako makausab niini.
Nianang tapos sa semana ako nabalaka kaayo kabahin sa unsa ang mahitabo, bisan ako adunay pagsalig nga si Francini mobuhat unsa ang sakto. Ako nag-ampo gayud nga iyang mabantayan ang sayop sa iyang eksamin.
Sa klase sa math pagka Lunes, ang tibuok klase alerto kaayo samtang sila nagtan-aw kang Francini nga nagkuha sa iyang papel sa eksamin.
Francini: Pagkataud-taud human sa pagsugod sa klase pagka Lunes, ang magtutudlo mihatag kanako sa akong eksamin sa math. Ako mohipos na unta niini nga dili gayud tan-awon, apan ako nakabantay nga ang akong grado mas taas kaysa akong gituohan. Ako mipataas sa akong kamot ug miadto sa lamesa sa magtutudlo. Ako nangutana kon sakto ba ang iyang paggrado sa eksamin, ug siya mitubag nga sakto man. Ako dayong gitudlo ang akong papel sa eksamin ug miingon, “Apan ako adunay sayop.” Nianang higayona si Patricia miduol usab sa lamesa sa magtutudlo ug miingon kaniya nga siya usab adunay natsekan nga sayop nga tubag sa iyang eksamin ug tungod sa tanang pagkalibog pagka Sabado, wala siya makabantay niini.
Ang klase nagsugod dayon sa pag-istoryahanay sa usag usa. Ang ubang mga tawo nagsugod sa pagreklamo nga ako gisultihan ni Patricia, ang uban adunay mga hilaw nga mga pahiyum. Ako naglibog sa tanan nga nagkalain-lain nga mga reaksyon niining hitabo.
Sa kaulahian, si Patricia mipasabut unsa ang nahitabo pagka Sabado. Ako natingala sa pagkasayud nga ako miagi og usa ka eksamin nga dili kalabut sa math ug ang akong mga klasmeyt mitratar sa akong higala sa ingon ato nga paagi. Hinoon, ako malipayon nga ako nahimong matinuoron ug ang mga pag-ampo ni Patricia nakatabang kanako nga ako giaghat nga makabantay sa sayop sa akong eksamin. Ako usab mapasalamaton nga ang akong higala mituo kanako.
Patricia ug Francini: Kaming duha nakakat-on og usa ka dako nga leksyon niini nga kasinatian. Ang among mga pagpamatuod mitubo kabahin sa importante nga tahas nga anaa sa mga Santos sa Ulahing mga Adlaw nga mahimong mga saksi ni Jesukristo ug mga ehemplo sa Iyang mga baruganan. Kami mapasalamaton ngadto sa Ginoo sa Iyang ebanghelyo, nga naghatag kanamo sa oportunidad nga maghimo og usa ka kalainan.
Paghulagway pinaagi ni Natalie Malan