Ang Ikapulo Makapahupay Ba sa Akong mga Kabalaka?
Samtang ang akong dagko nga mga anak didto sa eskwelahan ug ang mga gagmay nakatagpilaw, akong gibutang ang mga lista sa bayronon sa balay diha sa lamesa sa kusina. Akong gisugdan ang makuyaw nga binulan nga buluhaton pinaagi sa pag-ampo alang sa kaalam sa pag-inat sa among gamay nga kinitaan. Ang tseke sa ikapulo, sa kanunay, mao ang unang sulatan.
Sa dihang nagpasakop ako sa Ang Simbahan ni Jesukristo sa mga Santos sa Ulahing mga Adlaw isip batan-ong asawa, mipasalig ako nga mobayad sa ikapulo. Wala gayud ako magduha-duha niana nga saad. Hinoon hilabihan ang akong kalisud, tungod sa kakulang sa kwarta nga magamit sa laing bulan sa mga bayronon sa balay, datahan, mga bayronon sa insurance.
Karon nag-inusara ako nga inahan sa unom ka mga anak. Kanunay akong mobati sa kabug-at sa trabahoon, pinansyal nga mga kabalaka, ug walay katapusan nga mga desisyon nga nalakip sa akong mga paningkamot nga mahimong inahan ug amahan nga walay kabanay nga makahatag kanako og kahupayan o suporta.
Samtang ako naglingkod diha sa may lamesa nangamuyo sa Ginoo alang sa Iyang panabang ug kalooy, ang Espiritu Santo miabli sa akong pagsabut sa usa ka matahum ug makapahupay nga pagpakita sa gugma sa Manluluwas. Akong nakita ang kwarta nga alang sa mga bayronon sa balay uban sa bag-o nga panglantaw isip sagrado nga mga prayoridad sa kinabuhi nga misantop sa akong hunahuna. Nasayud ako nga ang atong Langitnong Amahan buot nga ako makabaton sa mga panalangin nga gisaad niadtong kinsa matinud-anon nga mibayad sa mga ikapulo ug mga halad. Nasayud usab ako nga ang pagbayad sa ikapulo kinahanglang usa usab ka malipayong buhat sa gugma, walay kahadlok ug kabalaka.
Samtang ang Espiritu mipuno kanako, akong nakaplagan ang akong kaugalingon nga nagpamatuod sa konbiksyon nga dugay na nakong gihuptan nga lig-on ug sagrado. Ang akong tingog mibuak sa kahilom sa kusina sa dihang ako mipahayag nga mas maayo pa nga mawala ang tinubdan sa tubig sa akong balay kay sa mawad-an sa buhing tubig nga gitanyag sa Manluluwas. Mas maayo pa nga walay pagkaon sa among lamesa kay sa mawad-an sa Pan sa Kinabuhi. Mas palabihon pa nako ang kangitngit ug ang pagkadili komportable nga walay kuryente kay sa mawala ang Kahayag ni Kristo sa akong kinabuhi. Mas maayo pa nga makig-uban ako sa akong mga anak sa usa ka tolda kay sa mawala ang akong pribilehiyo sa pagsulod sa balay sa Ginoo.
Ang kabug-at sa kabalaka diha-diha nawala. Ang akong gugma sa Ginoo mibuntog sa kahuyang nga namugna tungod sa akong mga kahadlok. Ang atong Langitnong Amahan mao ang atong tigluwas, ang atong tigsuporta, ug ang atong tigpanalipod. Tinuod gayud nga siya mohatag sa atong mga panginahanglan. Ang iyang mga saad sigurado ug dili mapakyas. Misugo siya kanato sa pagbayad og ikapulo sa atong kinitaan aron Siya makabu-bu sa mga panalangin gikan sa langit—lakip ang kalinaw sa hunahuna, kagawasan gikan sa kalibutanon ug sa materyal nga kabalaka, ug pagsalig sa Iyang balaan nga ngalan.
Gikan niana nga adlaw akong giisip nga kalipay ang pagbayad sa akong ikapulo, nga walay kabalaka o kahadlok, ngadto Kaniya ug alang Kaniya kinsa unang nahigugma kanako.