Ang Dili Makita nga Bisita
“Buhati ang mga tawo sa bisan unsay buot ninyo nga ilang pagabuhaton kaninyo” (Mateo 7:12).
Ang kasingkasing ni Julia mikuba sa dihang mili-li siya sa kwarto nga walay sulod. Ang klasehanan sa Primary, nga adunay mga lingkuranan nga mapilo-pilo nga giporma og tunga nga lingin, sama gayud kaayo didto sa iyang balay. Pero naglain ang tiyan ni Julia samtang siya misulod agi sa pultahan. Ang mga butang morag susama, pero si Julia nasayud nga kini lahi. Karon siya usa ka bisita.
Milingkod si Julia sa lingkuranan nga kinalay-an gikan sa pultahan. Ganahan kaayo siya sa pagbisita sa iyang pamilya sa mga ig-agaw ug mga apohan, gawas lang sa pagkahimong bisita sa lahi nga ward. Ang pagkanta og mga kanta sa Primary ug pagkat-on mahitungod sa Manluluwas nindot, pero dili siya ganahan nga maglingkod nga siya ra ug walay nailhan.
Si Julia dili ganahan nga maminaw sa laing mga bata nga mag-istoryahanay ug mangatawa samtang walay usa nga motan-aw kaniya. Alang kaniya, ingon og walay naghunahuna kon moanha ba siya o dili. Mora og dili makita nga—Julia, ang katingalahan nga dili makita nga bisita!
Gituyok-tuyok ni Julia ang iyang taas nga bulagaw nga buhok ug nangandoy nga makapauli na ngadto sa iyang kaugalingong titser sa Primary, nga si Sister Johnson, ug sa iyang suod nga higala, nga si Hanna. “Tingali karon lahi na,” iyang gisultihan ang iyang kaugalingon samtang iyang gitarung ang iyang mga antyohos ug gihapyod ang iyang sayal makausa pa. “Tingali kon maningkamot gayud ako, makahimo ko og kalainan.”
Nangandam dayon si Julia sa pag-abli sa pultahan. Tulo ka mga babaye misulod sa kwarto, madasigong nagsultihanay. Misunod ang duha ka batang lalaki. Miginhawa og dali si Julia ug naningkamot nga makapahiyom.
“Hi!” mitingog siya. Diha-diha ang tanang mga mata anaa na kaniya. Namula ang nawong ni Julia.
“Uh, hi,” hinay nga sulti sa usa sa mga batang babaye.
“Bag-o ka?” laing batang babaye ang nangutana.
Miigham si Julia. “Dili, mibisita ra ko sa akong lola.”
“O!”
Tanan nagpili og lingkuranan. Ang pahiyom ni Julia milubad sa dihang iyang nakita nga ang tanan nga lingkuranan gikuha gawas ang anaa sa iyang tupad. Walay misulti ngadto ni Julia. Iyang gitutokan ang iyang mga kamot. “Ang katingalahan nga dili makita nga bisita mibalik na usab,” siya naghunahuna. Miagas sa aping ang iyang luha.
Paglabay sa usa ka semana ang kasingkasing ni Julia ingon og milutaw samtang nagdali siyang naglakaw sa hallway sa simbahan. Nindot kaayo nga makapauli na! Sa dihang misulod siya sa iyang klasehanan, si Hanna diha na.
“Hi, Julia! Nalipay kaayo ko nga nakabalik kana!” Miingon si Hanna.
Milingkod si Julia tupad ni Hanna. Sa wala madugay nangatawa na sila ug nagsultihanay. Si Julia nakasugod na sa pagsulti ni Hanna sa tanan mahitungod sa iyang semana uban ni Lola sa dihang usa ka taas, niwangon nga batang babaye nga may pagkabulagaw og buhok diha sa may pultahan. Gitan-aw ni Julia ang batang babaye nga milingkod didto sa pinakalayo nga lingkuranan gikan sa pultahan nga nag-inusara.
“Bisita tingali siya,” hunahuna ni Julia. “Maayo gani, dili na ako niining higayona!” Ang batang babaye mianinaw sa palibut ug dayon mitan-aw sa iyang mga kamot. Dili maayo ang gibati ni Julia nga walay usa ang nakigsulti sa bisita. “Nanghinaut ako nga ang pagkahimong usa ka bisita dili unta lisud kaayo,” naghunahuna siya. “Lahi unta gayud!” Ang miagi nga Dominggo misulod sa iyang hunahuna sa makadiyot sa dihang nahinumdom siya usa ka nagmagul-anon, dili makita nga bisita. Mikipat ang iyang mata. Kadiyot lang—makahimo siya og kalainan niining higayona!
Mitindog si Julia. “Hi,” misulti siya uban ang pahiyom. Milakaw siya ug milingkod sa lingkuranan tupad sa batang babaye. “Nagbisita ka ba karon?”
Mitan-aw ang batang babaye, ug misanag ang nawong. “Oo, mibisita ako sa akong iyaan. Bisita ka ba usab?”
Milingo-lingo si Julia. “Wala, pero kahibalo ko unsa kini,” mipasabut siya. “Ako si Julia. Unsay imong ngalan?”
“Ella.”
“Gusto kang makig-uban ug motupad ni Hanna ug nako?”
Si Ella mipahiyom ug miyango. Samtang mibalhin ang duha ka batang babaye diha sa kwarto, gibati og kainit si Julia sa kaugalingon. “Walay dili makita nga bisita ang gitugutan!” naghunahuna siya. “Ipaniguro ko kini!”
Mga paghulagway pinaagi ni Jennifer Tolman