Haere mai e faaroo i te reo o te peropheta

Te Here o te hoê Peropheta

Na te peresideni Dieter F. Uchtdorf

Tauturu piti i roto i te Peresideniraa Matamua

No roto mai i te a‘oraa i te amuiraa rahi no te ava‘e Eperera 2007

Tau matahiti i ma‘iri a‘e nei, ua haere mai te Peresideni Thomas S. Monson i te hoê amuiraa retioni i Hambourg, i Purutia, e ua fana‘o vau ia arata‘i ia’na.

Ua ani te Peresideni Monson no ni‘a i te Taea‘e Michael Panitsch, te hoê peresideni tĭtĭ tahito tei riro ei hoê o te mau pionie itoito o te Ekalesia i te fenua Purutia. Ua parau atura vau ia’na e, e ma‘i rahi to te Taea‘e Panitsch, e tei ni‘a oia i te ro‘i e aita e ti‘a ia’na ia haere mai i ta tatou mau pureraa.

Ua ani maira te Peresideni Monson e, e nehenehe anei e haere e farerei ia’na.

Ua ite au e, hou to’na tere i Hambourg, ua tapuhia to’na avae e e mea mauiui no’na ia haere. Ua faaite atura vau e, te faaea ra te Taea‘e Panitsch i te pae o te tahua i roto i te hoê fare aita e matini hivi. Ua titauhia ia matou ia ta‘uma na ni‘a i te e‘a no te haere e hi‘o ia’na.

Tera râ, ua onoono te Peresideni Monson. No reira ua haere matou.

Te haamana‘o ra vau e mea fifi roa no te Peresideni Monson ia ta‘uma na ni‘a i te e‘a. E ta‘uma oia i te tahi mau taahiraa e i muri iho e faafaaea. Aita roa’tu oia i faahiti noa a‘e i te parau amuamu, e eita oia e otohe. No te teitei te aroaro o te fare, e au ra e, aita e hopearaa to te e‘a, tera râ, ua tamau noa te Peresideni Monson i te ta‘uma ma te oaoa e tae roa’tu ra matou i te piha o te Taea‘e Panitsch i te pae o te tahua.

I to matou taeraa i reira, e mea nehenehe roa te farereiraa. Ua haamauruuru te Peresideni Monson ia’na no to’na oraraa tavini e ua aroha ia’na ma te ataata. Hou a reva atu ai matou, ua horo‘a oia ia’na i te hoê haamaitairaa autahu‘araa nehenehe roa.

E nehenehe ta te Peresideni Monson e faaoti e faafaaea oia i ropu i te mau pureraa roa. E nehenehe ta’na e ani ia haere e hi‘o i te tahi mau vahi nehenehe no Hambourg. Ua feruri pinepine au e, e mea faahiahia mau i te mea e, i mua i te mau vahi nehenehe atoa o taua oire ra, ta’na i hinaaro rahi roa e hi‘o hau atu i te tahi maori râ te hoê melo paruparu e te ma‘ima‘i o te Ekalesia.

Ua haere mai te Peresideni Monson i Hambourg no te haapii e no te haamaitai i te taata o te hoê fenua. Tera râ i taua taime atoa ra, ua faatumu oia i ni‘a i te hoê noa iho.

Ia paraparau a‘era te Aposetolo Petero no ni‘a ia Iesu, ua horo‘a oia i teie faataaraa ohie roa: »(Ua) hamani maitai haere (Oia) » (Acts 10:38). E nehenehe atoa e parau mai te reira no te taata ta tatou i paturu ei peropheta no te Atua.

Te Ta‘umaraa i te e‘a

Ua titauhia i te Peresideni Monson ia ta‘uma e rave rahi e‘a no te haere e tauturu i te Taea‘e Panitsch. A feriro na e toru nau ohipa taa ê ta outou e nehenehe e rave no te tauturu i te hoê taata, i te fare hoa râ. A papa‘i i te hoê hoho‘a e aora râ, a papa‘i i ni‘a i te taahiraa tata‘itahi o te e‘a no te tauturu ia outou ia haamana‘o i to outou mau mana‘o.

Er Spricht Deutsch (« E reo Purutia to’na »)

O te Peresideni Uchtdorf te taata matamua no Purutia tei tavini i roto i te Peresideniraa Matamua. I to’na tamariiraa e parau oia i te reo Purutia. I teie nei ia paraparau oia i roto i te amuiraa rahi, e parau oia i te reo Peretane. A hi‘o i te mau mau parau i raro nei no roto mai i te hoê a‘oraa ta te Peresideni Uchtdorf i horo‘a i roto i te amuiraa rahi i te ava‘e eperera 2008. A hi‘o na mai te mea e, e nehenehe ta outou e iriti i te mau parau Purutia i roto i to outou reo.

« Te oaoa nei au i teie haamaitairaa rahi i te piiraa ia‘u iho ei melo no te Ekalesia a Iesu Mesia i te Feia Mo‘a i te mau Mahana Hopea nei ».

« Te pure nei au ia horo‘a mai te Atua ia‘u Kraft e te haroaroaraa Herz no te faaohiparaa i teie piiraa mo‘a ».

« Ua riro mau ei haamaitairaa no‘u i te raveraa i te ohipa i piha‘i iho i te Präsident Monson. … Oia te Prophet Gottes ».

Aui e atau i ni‘a:faahoho‘araa na Beth M. Whittaker; atau: faahoho‘araa na Sam Lawlor