Te Moora Hairiiri e aora râ, te Tenesemata Nehenehe Tei ia Outou Noa!
I to‘u tamarii-rii-raa te haamana‘o nei au i to‘u metua vahine i te tai‘oraa mai i te aamu no « Te Moora Hairiiri, « na Hans Christian Andersen. No te mea paha e, e mea mamahu vau e ua feruri au e, aita o‘u e faaauraa, tera râ, te haamana‘o tamau nei au i te haapiiraa o taua aamu ra.
I roto i te aamu ta‘u e haamana‘o ra, ua tia‘i maoro te hoê mai‘a moora ma te faaoroma‘i ia pata to’na mau huero e ia matara mai te mau fanau‘a moora. E mea maoro i muri iho ua matara maira te mau fanau‘a rearea huruhuru i roto ma te oaoa rahi o te mai‘a moora. Tera râ, te vai ra hoê huero huru rahi rii a‘e, aitâ i pata. Ua tia‘i e ua hi‘o noa te mai‘a e te mau fanau‘a. I te pae hopea râ ia parari taua huero ra, ua ite a‘era te mau fanau‘a moora rearea e, e mea taa ê rii teie melo apî o te utuafare. Ua haati a‘era ratou ia’na e ua parau ana‘e atura i to ratou mama e te papa e, « E ere oia mai ia tatou. E mea hairiiri oia ». Ua faaru‘e maira ratou ia’na oia ana‘e iho i roto i te ofaaraa e ua au ana‘e atura i te atea ê. Ua haere ê atura te moora hairiiri i rapae i te ofaaraa e ua tamata i te tapuni. Ua riro te mau farereiraa atoa ei farereiraa au ore e te pe‘ape‘a. E mea pinepine oia i te feruri e, « Pauroa te taata e riri ia‘u no te mea, e mea hairiiri au ».
E i muri iho ua tupu te hoê semeio i roto i to’na oraraa. Ua ite oia ia vetahi ê i te faariroraa e i te haaraa mai ia’na te huru! Ua riro mai oia ei hoa no ratou, e ua arata‘i atura ratou ia’na i to ratou mama ra e ua ui atura, « E mama, mama, ua itehia mai ia matou te hoê teina! E nehenehe anei ta’na e faaea i piha‘i iho ia tatou e amuri noa’tu ? » Ua tauahi maira te mama tenesemata haviti i to’na pererau uouo i ni‘a iho i te moora hairiiri e ua parau maira ia’na ma te reo maru, « e ere roa’tu oe i te moora! E tenesemata fanau‘a oe, e ia tae i te hoê mahana e riro mai oe ei arii no teie roto ».
E mea au roa na‘u ia faaroo i taua aamu ra i to‘u na‘ina‘iraa. Ua ite a‘era vau e, te mau haapiiraa ta‘u i apo mai ua tauturu te reira ia‘u i roto i to‘u mau tau apîraa. Ua bapetizohia vau ei melo no te Ekalesia i te vauraa o to‘u matahiti, tera râ, ua haamata to‘u utuafare i te paruparu i roto i te Ekalesia.
I roto i te oire na‘ina‘i i Idaho to‘u paariraa, e te vai ra i reira te hoê fare teataraa e pata i te teata pauroa te mahana maa avatea. Pauroa te taime e haere au na muri iho e piti e aora râ, e toru hoa to‘u. E patahia te hoê hoho‘a teata poto no ni‘a i te tuaro e te tahi atu hoho‘a no ni‘a ïa i te mau ohipa e tupu ra i te reira taime. Te hoho‘a rahi i te rahiraa o te taime e hoho‘a cowboe ïa, e ta ratou mau ha‘uti e rave rahi.
I te hoê mahana maa, i te taime faafaaearaa, ua tura‘i maira te mau rave ohipa i te hoê pereoo taataahi 10 tauiraa, i rapae. E pereoo uteute, e mea nehenehe roa, e te horo‘a ra ratou i te reira i te hoê taata i roto i te mau taata mataitai tei roaa ia’na te titeti re! Aue to‘u hinaaro i taua pereoo taataahi ra!
Ua patia a‘era te taata faaite i to’na rima i roto i te afata e ua huti maira i te hoê titeti. I to’na tai‘oraa i te numera i ni‘a i te titeti, ua ite a‘era vau e, tei ia‘u nei taua titeti re ra. Aita vau i ha‘uti e aora râ, i parau noa a‘e. Ua haama roa vau. Aita i rava‘i to‘u ti‘aturi i roto ia‘u no te ti‘a i ni‘a e ia faaite i te mau taata atoa e, tei ia‘u ra te titeti re. Ua faaite faahou a‘era oia i te numera re e piti faahou taime, e pauroa te taime e tahuna noa vau i te titeti eiaha te taata ia ite. E i te pae hopea ra, ua tai‘o te taata faaite i te tahi atu numera. Te numera apî, te numera ïa a te hoê hoa tei haere mai na muri iho ia‘u. Ua ou‘a a‘era oia i ni‘a, ua tuo, e ua horo atura i ni‘a i te tahua no te ani i te pereoo taataahi. No‘u ho‘i tera pereoo taataahi!
I to‘u ho‘iraa i te fare i taua mahana maa ra, ua feruri a‘era vau i te aamu o te moora hairiiri. Ua feruri au e, e au vau mai te tenesemata fanau‘a. Ua feruri au e, e au e, te orihaere noa ra vau na roto i te uru raau ma te tamata i te tapuni e aita e taata e au mai ia‘u. Aita vau i ite e, o vai au e aora râ, e riro mai au mai ia vai. Ia tae au i te fare, ua ite a‘e ra vau e mea ti‘a i te hoê mea ia taui. Te haamana‘o nei au i to‘u feruriraa e, « Ua tae i te taime no te tupuraa i te rahi. Eita tera huru e tupu faahou i ni‘a ia‘u ».
Ua haamata a‘era vau i te ite e, e taata atoa tei piha‘i iho ia‘u tei here e tei haapa‘o ia‘u. E mea haapa‘o roa te episekoporaa ia‘u, na reira atoa to‘u peresideni tĭtĭ, te ora ra oia i te hopea o to matou purumu. Ua haapii mai ratou ia‘u i te evanelia. Ua faaite mai ratou i to ratou iteraa papû ia‘u no ni‘a i te parau mau o te Faaora e To’na Taraehara tao‘a rahi e te ohipa ta te reira e faatupu i ni‘a ia‘u. Ua tai‘o pinepine ratou ia‘u i te aamu o Iosepha Semita e ta’na orama i roto i te Uru Raau Mo‘a. Na roto i taua ohipa ra, ua tupu te peu nehenehe i roto ia‘u ia tai‘o i te aamu – o Iosepha Semita pauroa te hepetoma. Na roto i te reira, ua ite au e, e nehenehe te puai e roaa ia‘u no te upooti‘a i te mau mea atoa e tuuhia i mua ia‘u i taua hepetoma ra.
I taua taime ra i roto i to‘u oraraa, ia hinaaro rahi au i te hoê taata, ua haamaitai to‘u Metua i te Ao ra ia‘u. Ua ite oia e o vai au, e ua tono mai Oia i To’na mau tavini no te tauturu ia‘u ia ite i te reira na roto ia‘u iho. Ua tauahi maira ratou i to ratou mau rima i ni‘a ia‘u e ua parau maira ia‘u na roto i ta ratou ohipa e, e ere au i te moora hairiiri e mai te mea e, e haapa‘o vau i te mau faaueraa a te Atua, e riro mai au « ei arii no te roto ». Na te haamaitairaa o te Taraehara e te iteraa i te auraa o te reira i haamata i te horo‘a ia‘u i te puai e te ti‘aturi.
Ia tae to‘u matahiti i te 16, ua faaitoito mai teie mau taata maitai ia‘u ia farii i te hoê haamaitairaa patereareha. Ia farii au i ta‘u parau faati‘a, ua ta‘uma vau i ni‘a i to‘u pereoo taataahi tahito e ua tere au e rave rahi maire i te atea e tae roa’tu i te fare o te patareareha. Ua faataa faahou maira oia eaha te hoê haamaitairaa patereareha, e e nahea te reira i te haamaitai i to‘u oraraa. Ua tuu maira oia i to’na rima i ni‘a i to‘u upoo. I muri a‘e i te reira ohipa, ua taui roa to‘u oraraa.
Ua farii au i te hoê piiraa misioni i te fenua Etotia, e ua farii au i te hoê iteraa nehenehe roa. Hoê hepetoma i muri iho i to‘u ho’iraa mai i te fare, ua farerei au i ta‘u vahine i roto i te hoê pureraa a te Ekalesia. Ua farerei pinepine maua, e ua ani au ia’na ia faaipoipo maua. Ua faaipoipohia maua i roto i te Hiero no Roto Miti.
Te vai ra hoê parau i roto i to‘u haamaitairaa patereareha te na ô ra e, e faati‘ahia vau ia ora i te tahuti nei i piha‘i iho i te hoê melahi. I te taime a horo‘a mai ai te patereareha i taua haamaitairaa ra, aita vau i ite e, eaha te hoê melahi, tae noa’tu i te auraa o te reira parau. I to‘u faaru‘eraa ‘tu i te hiero i te mahana a taatihia ai maua o ta‘u vahine, ua ite a‘era vau i te auraa o te reira. Ua riro oia ei mori no to‘u oraraa. Mauruuru ia’na, ua ti‘a ia‘u ia ora i roto i te hoê vahi maramarama. Ua hopoi mai oia i te oaoa e te poupou i roto i ta maua na tamarii e 8, e 25 mootua, e e 2 hina. Ua pii pauroa ta‘u mau tamarii ia’na ei maitai. Te haamauruuru nei au i te Atua no te mau haamaitairaa o te evanelia e te mau haamaitairaa mure ore o te mau fafauraa e te mau oro‘a o te hiero mo‘a.
E imi Satane i te rave‘a ia ti‘aturi tatou e, e mau moora hairiiri tatou, aita e rave‘a e riro ai mai to tatou Metua i te Ao ra e Ta’na Tamaiti mo‘a. Te faaite papû nei au e, te here nei te Atua ia tatou tata‘itahi ia au i te tahi mau rave‘a taa ê. Mai ta Elder Neal A. Maxwell (1926–2004) no te Pŭpŭ Tino Ahuru Ma Piti Aposetolo i parau pinepine ra, « E itehia te faaururaa a te Atua i roto i to tatou oraraa ».1E mau tamarii tatou Na’na. Ua itehia ia‘u e, e nehenehe ta tatou e ta‘uma i ni‘a a‘e i to tatou huru i teie taime e ia riro mai « ei mau arii e ei mau arii vahine no te roto » na roto i te haapa‘oraa i te mau faaueraa o te evanelia.
Ua ite au i te tahi atu mea. Ua ite au e o vai outou e nohea mai outou. Te faahaamana‘o mai nei te mau heheuraa ia tatou i to tatou haapa‘o i roto i te oraraa hou te tahuti nei (a hi‘o Apokalupo 12:7–11; PH&PF 138:56; Aberahama 3:22–23). Ia taamu tatou i to tatou iteraa papû i ni‘a i taua parau rahi ra, e riro mai te mahana tata‘itahi ei haamaitairaa nehenehe no tatou tata‘itahi.
A ti‘a noa i te pae reni o te Fatu. Mai te mea e, e nehenehe Ta’na e haapa‘o i te hoê tamaiti mamahu e te haama haere noa mai ia‘u, e haapa‘o Oia ia‘u i teie nei e a muri a‘e. E tamaiti e aora râ, e tamahine ma‘itihia outou na te Atua. A faaoti ia ora ia tae‘ahia te puai hanahana e vai ra i roto ia outou.
E tamaiti e aora râ, e tamahine ma‘itihia outou na te Atua. A faaoti ia ora ia tae‘ahia te puai hanahana e vai ra i roto ia outou.
I Raro i ni‘a ia Outou iho
A feruri i teie: E tamarii outou na te Atua. Na roto i Ta’na tauturu e tae‘ahia ia outou to outou puai rahi. (A hi‘o Roma 8:16–17.)
Ua tura‘i maira te rave ohipa o te fare teataraa i te hoê pereoo taataahi hoê 10 tauiraa to’na. E mea uteute, e mea nehenehe roa, e te faaineine ra ratou no te horo‘a. Ua hinaaro roa vau i taua pereoo taataahi!
Ua ite a‘era vau e, tei ia‘u ra te titeti re. Tera râ, aita vau i hauti noa a‘e, aita atoa i parau noa a‘e. Ua haama roa vau.
Na te haamaitairaa o te Taraehara e te iteraa i te auraa o te reira i haamata i te horo‘a ia‘u i te puai e te ti‘aturi.
Faahoho‘araa na Jerry Harston, maori râ ua faaitehia; hoho‘a o te pererau © Te mau hoho‘a na Getty; hoho‘a o te mau manu na Graham Ford, © Hoho‘a na Getty
Te faataaraa no roto mai i te Mesia i Getesemane, na Heinrich Hofmann, na roto i te maitai a C. Harrison Conroy Co.