Te Bapetizoraa i Mama Ruau

Marilena Kretly Pretel Busto, São Paulo, Brazil

I te 30 no tiunu 2001, te hamani ra vau i te hoê faraoa monamona no te mahana oro‘a fanauraa o ta‘u tamahine, ua ta‘i maira te niuniu. O to‘u ïa tuahine i Beresilia, te faaite maira ia‘u e, ua pohe to matou mama ruau.

E parau apî pe‘ape‘a teie, tera râ aita vau i oto. Aita atoa e pe‘ape‘a, i te mea e, ua ora to‘u mama ruau fatata 102 matahiti te paari. Ua oaoa vau i te mea e, ua ti‘amâ oia i teie nei i to’na tino paari e te pohe e ua haere i te ao varua.

E ua haamata a‘era vau i te feruri i te tuatiraa to’na poheraa i te mahana oro‘a fanauraa o ta‘u tamahine, e ua feruri au e, aita anei e auraa to te reira i roto i te parau no te taime. A ma‘iri noa ai te mahana, ua ite a‘era vau e, eaha te reira: e mea ohie roa na‘u ia haamana‘o ia bapetizo ia‘u no to‘u mama ruau hoê matahiti i muri a‘e i to’na poheraa. Ua rave a‘era i te reira hopoi‘a, ma te ite e, e tia‘i au e tae roa’tu i te mahana oro‘a fanauraa o ta‘u tamahine.

Ua tere vitiviti te matahiti. Aita i taimehia to‘u ia haere i te hiero i te mahana oro‘a poheraa o to‘u mama ruau, i te mea e, te faaea ra vau i Portugal e e haere au i te Hiero no Madrid i te fenua paniola. Tera râ aita e mahana e aita vau e haamana‘o i ta‘u hopoi‘a ia haere e bapetizo ia‘u ei mono no mama ruau Josefina.

Haere roa i te ava‘e atopa 2002 i reira i ti‘a ai ia matou ia haere i te hiero. Ua haere ta‘u tane e o vau na muri iho i ta maua tamaiti, o Mathew, o te haere nei no te rave i to’na oro‘a hiero no te faaineine ia’na no ta’na misioni. Ua oaoa vau ia haere i te hiero, e ua feruri au e, e farii paha vau i te hoê mea taa ê ia bapetizohia vau ei mono no to‘u mama ruau.

Na ta‘u tane i bapetizo, tera râ, aita vau i farii i te hoê mea. Na ta‘u tamaiti i rave i te haamauraa, tera râ, aita atoa vau i farii i te hoê mea. Ua ore to‘u mana‘ona‘o pe‘ape‘a i te oreraa e farii i te hoê mea, e ua oaoa vau i te mea e, ua ravehia te mau oro‘a no to‘u mama ruau.

I muri iho i te oro‘a hiero, ua haere atu matou i roto i te piha taatiraa no te taati ia mama ruau i ni‘a i to’na na metua. I to matou tuturiraa i mua i te fata no te rave i te oro‘a e i te taime a haamata ai te taata taati i te paraparau, ua ite a‘era vau i te hoê mea mai te tupai i ni‘a i te upoo e ua tere na roto i to‘u tino. E ere i te mea ohie ia faataa i te reira, tera râ, i taua taime ahu ra, ua ite papû a‘era vau e, ua oaoa o mama ruau ia taatihia oia i ni‘a i to’na na metua.