E Vahi no te Hau
No teie mau tamahine apî no te fenua Dominican Republic, e ere te hiero i te hoê fare nehenehe noa, ua hau atu râ i te reira. Ua riro atoa râ ei faahaamana‘oraa i to ratou mau ti‘aturiraa e to ratou mau moemoea au roa a‘e.
Te haamana‘o noa nei â o Dilcia Soto, 16 matahiti, i te mahana a haamaitaihia ai te hiero i roto i to’na oire o Santo Domingo i roto i te Dominican Republic: « E iva noa to‘u matahiti i taua taime ra, tera râ, ua parau vau e, ‘Wow! Hoê hiero i ô nei! ‘Ua matau vau ia hi‘o i te taata ia haere i te tahi atu mau fenua ia taatihia ratou e ia rave ratou i te mau fafauraa. Ua feruri au e, ‘I teie nei aita e titau-faahou-hia i to‘u utuafare ia reva i te tahi atu fenua no te mea te vai ra to matou iho hiero e ere i te mea atea. ’ »
I teie mahana te ti‘a nei taua hiero ra ma te hanahana e te rahi i roto i te oire pû, ma te faahiahia e to’na mau oeoeraa e te aua nehenehe, a parau ai te taata e haere mai na reira e, e cathedral paha te ra‘e. E oaoa roa o Dilcia ia parau e, e mea mo‘a roa’tu â oia i te reira. I roto i te aua o te hiero e itehia te hanahana tei taa ê roa i te aehuehu o te mau aroa e te oire makete.
Aita i maoro a‘e nei ua haere mai o Dilcia e to’na hoa o Kelsia St. Gardien 14 matahiti, i roto i taua vahi o te hau ra. E melo raua no te Paroita no Mirador no te Tĭtĭ no Santo Domingo Dominican Republic Independencia. Ua haere a‘e na raua toopiti i te hiero na mua a‘e no te rave i te bapetizoraa no tei pohe. I teie mahana râ ua haere mai raua no te orihaere noa na roto i te aua, no te paraparau, e no te farii i te Varua e vai ra i roto i te hiero.
Te mau Hinaaro o Dilcia
« E here rahi to‘u i te Fatu, e te mauruuru nei au no Ta’na ohipa i rave i roto i to‘u oraraa », te parau ïa a Dilcia. « E melo to‘u utuafare no te Ekalesia, to‘u râ mau tati e te mau tonton e te mau cousin, aita ïa. Ia haere ana‘e mai ratou i to‘u fare, ua ineine noa ta‘u hoê Buka a Moromona no te mea te vaira paha te hoê taime e faaitehia te evanelia ia ratou ». E faaite atoa oia i te evanelia i te mau hoa e « i te mau taata atoa ta‘u e farerei tei anaanatae ». E i te mau taime atoa e rave oia, te na ô ra oia e, « E ite papû vau i te Varua. I te mau taime atoa e faaite au i to‘u iteraa papû, e ite faahou vau i te parau mau o te Ekalesia ».
Te haamana‘o ra oia i te hoê haapiiraa séminaire no ni‘a i te faanahonahoraa o te faaoraraa. Ua parau oia e, « Hou a faatumuhia ai teie ao, ua ti‘a tatou i roto i te hoê Apooraa Rahi i te Ra‘i ra, e ua ma‘iti tatou ia pee i to tatou Metua i te Ao ra e ua farii i te tusia ta Iesu Mesia e rave no tatou », « Ua faaite mai to matou orometua haapii e, e nehenehe ta tatou e parau e, ua haapa‘o tatou i te parau a to tatou Metua i te Ao ra i taua taime ra no te mea tei te fenua nei tatou i teie nei ma te tino i‘o e te ivi. I to’na parauraa i te reira, ua ite a‘era vau e, e parau mau. I taua po ra, i roto i ta‘u pure, ua ta‘i au e ua haamauruuru vau i te Atua no taua iteraa ra ».
Ua faahiti o Dilcia i te 1 Korinetia 3:16: « Aita outou i ite e, o te hiero outou o te Atua, e te parahi ra te Varua o te Atua i roto ia outou na ? » « Mai te mea e, e hiero atoa vau », ta’na ïa parau, « e mea ti‘a ïa ia‘u ia riro ei taata mâ e te nehenehe mai te hiero te huru. Aue te faahiahia o te haamaitairaa ia vai i roto i teie Ekalesia e ia riro ei tamahine viivii ore! »
Ua parau oia e, to’na hinaaro rahi roa o te ora faahou ïa i piha‘i iho i to’na Metua i te Ao ra i te hoê mahana. Te na ô ra oia e, « Ua mauruuru roa vau i te mea e, ua horo‘a mai oia i te hoê hiero no matou ia ti‘a ia matou ia rave i te mau mea atoa e titauhia no te ho‘i faahou Ia’na ra ». « Te rave‘a maitai roa a‘e no te haamauruuru Ia’na o te oraraa ïa mai Ta’na i ani mai ia tatou ».
Ua parau o Dilcia e, « Te hinaaro nei te Fatu ia tomo tatou i roto i To’na fare, ia haapii no ni‘a Ia’na, e ia rohi no te ora mure ore i piha‘i iho Ia’na ». Ua parau oia e, e mea oaoa roa na’na ia haere i te bapetizoraa no te feia i pohe no te mea « o te rave‘a ïa no te tauturu i te feia o te tia‘i nei i ô mai i te paruru, no te rave i te hoê mea no ratou o te ore e ti‘a ia ratou ia rave no ratou iho ».
Te mau Titauraa a Kelsia
Ua farii o Kelsia. Te parau ra oia e, « te hinaaro nei to tatou mau tupuna ia tatou ia rave i te ohipa, e ua ite au e, e oaoa roa ratou ia tatou ». « Te hinaaro nei au ia ite i to‘u mama ruau ta‘u i ore i ite i roto i teie oraraa. E haapapû matou e, ua ravehia te mau ohipa atoa o te hiero no’na ».
Ua riro te paraparauraa no ni‘a i te hiero ei faatupuraa i te mau mana‘o puai i roto ia Kelsia. « Ua fafau vau ia rave i te mau faaotiraa o te tauturu ia‘u ia taatihia i to‘u utuafare », ta’na ïa parau. « E mea ti‘a ia tatou ia faatura i te evanelia e ia haapa‘o i te mau faaueraaal pie de la letra [ia au i te ture] », ta’na ïa parau. « Te na reira nei tatou no te mea ua here tatou i to tatou Metua i te Ao ra, e te haapa‘o o te huru ïa no to tatou faaiteraa i to tatou mauruuru Ia’na ».
Ua tomo mai to’na utuafare i roto i te Ekalesia i te ava‘e titema 2006, e ono matahiti i muri iho i te faaru‘eraa to’na na metua i te fenua Haiti no te haere i Dominican Republic. « Te mauruuru nei au i te mau misionare tei patoto mai i to matou uputa fare. E mea faahiahia mau ia farii i te Varua e ia ite i te parau no ni‘a iho i te faanahonahoraa a to tatou Metua i te Ao ra no tatou. Mai te taime a ô mai ai te evanelia i roto i to matou oraraa, ua rahi atu te hoêraa o to matou utuafare. Te mauruuru nei au i te mea e ua horo‘a mai Oia i te hoê utuafare hoê no‘u, noa’tu i te mau taime fifi mau. Ia feruri ana‘e au e e nehenehe matou e farii i te haamaitairaa ia taatihia e a muri noa’tu, ua riro te reira mai te hoê haamaitairaa tei hau i te rahi i te mau haamaitairaa atoa ».
Tei roto to’na na metua i te haapiiraa faaineineraa hiero i teie nei, e na te reira e faahaamana‘o ia’na ia faaineine ia’na no te mahana e faaipoipohia ai oia i roto i te hiero. « Te reira ta‘u opuaraa tumu, oia ho‘i, ia ti‘amâ ta‘u tane e o vau no te tahi e te tahi e ia ti‘amâ no te riro ei utuafare mure ore ».
Te Faaiteraa i te Hanahana
Ua haere teie na hoa na piha‘i iho i te pou reva o to raua fenua tei tahirihiri noa i roto i te mata‘i puai. « Ua faahaamana‘o atoa mai te reva i te hiero ia matou ia haapa‘o », te na reira ra o Dilcia. « E ere no te û noa, ua hau atu râ i te reira. Te vai ra te papa‘iraa i ni‘a iho Dios, patria, libertad [Te Atua, te fenua, te ti‘amâraa] e te faaite ra i te hoê satauro e te Ture Ahuru. Te faahaamana‘o maira te reira ia matou e, ua haamauhia to matou fenua na te mau taata tei ti‘aturi i te Atua e e mea faufaa noa â te Atua i ô nei ».
Ua haere atoa raua na mua i te uputa o te hiero, tei reira te papa‘i-raa-hia te mau parau ra Santidad al Señor, la Casa del Señor (Ei mo‘a i te Fatu, te Fare o te Fatu) i ni‘a a‘e i te uputa tomoraa, mai te itehia i ni‘a i te mau hiero atoa.
« Ia tai‘o ana‘e i taua mau parau ra, e î au i te iteraa puai e, e parau mau te reira », te parau ïa a Dilcia. « Te haamana‘o nei au i to‘u haereraa mai i ô nei e te pŭpŭ Feia Apî i te hoê pô no te mataitai i te aua. Ia hope ta matou mata‘ita‘iraa ua ui maira te episekopo ia matou eaha ta matou i ite. Ua paraparau matou i te reira tumu parau e ua hoê ta matou pahonoraa: e hau ».
E ua ho‘i o Kelsia e o Dilcia ma te feruri i ni‘a i taua pahonoraa maitai hoê ra … maitai no te mea te hiero e vahi ïa no te hau.
Hoho‘a na Richard M. Romney