Faateitei ia Vetahi ê e Ia‘u iho

Cathy Whitaker Marshall, Washington, USA

Tei te oro‘a haamauruururaa (thanksgiving) no te matahiti 1990 tatou. No oti noa a‘e nei te faataaraa teimaha i to‘u hoa faaipoipo, e a piahi au no te haapiiraa ture no te matahiti matamua i roto i te hoê oire matau-ore-hia e au. Te faaineine ra ta‘u mau tamarii e haere i to ratou papa ra no te tau faafaaearaa haapiiraa, e no te taime matamua i roto i to‘u oraraa, o vau ana‘e ïa i te taime o te oro‘a haamauruururaa.

I te haamataraa, ua hinaaro vau e tatarahapa no‘u iho e ia ta‘i papû. Tera râ, ua haamata a‘era vau i te tai‘o i to‘u mau haamaitairaa. E piti ta‘u na tamarii nehenehe roa, hoê fare nehenehe, hoê rave‘a e roaa ai te ite ia‘u, e te evanelia a Iesu Mesia no te arata‘i i to‘u oraraa. Ua haamaitai-mau-hia vau i te mau mea e rave rahi.

Ia fatata mai te oro‘a haamauruururaa, ua ite a‘era vau e, ua faanaho te hoê pupu piahi haapii ture ia haere i te hoê fare fariiraa taata no te tauturu i te opereraa i te maa i te mau taata nohoraa ore. Ua faaoti a‘era vau e, e mea maitai a‘e ia haere atoa vau e tauturu i te fare fariiraa, i te parahi noa i te fare ma te mo‘emo‘e e te riri noa, no reira ua amui atu vau i taua mau piahi ra.

Tau mahana i muri iho, ua ite au ia‘u iho i te tuuraa i te umara putete taviri i roto i te mereti a te mau taata po‘ia e te mauruuru e te oraraa fifi. Te roimata tei tahe i roto i to‘u nau mata e ere ïa no to‘u pe‘ape‘a no‘u iho; e mau roimata râ no te here no te mau tamarii atoa a te Atua, noa’tu te huru o to ratou oraraa.

E ere te Thanksgiving i te hoê oro‘a haamauruururaa mai te mea e aita e raoro to roto i te umu. Tera râ, e rahi roa no‘u ana‘e te hoê raoro e 6 kiro, no reira ua ani manihini au e rave rahi mau piahi no te tahi atu mau fenua e te tahi mau tuhaa atea ia amui mai ia‘u. Ua hinaaro vau ia horo‘a i te hoê tamaaraa oro‘a haamauruururaa, Marite, tera râ, ua ani au ia ratou ia afa‘i atoa mai i te tahi mea. Ua ani au i te taata tata‘itahi ia afa‘i i ta ratou au‘a au roa. Ua riro ta matou tamaaraa oro‘a haamauruururaa, ei tamaaraa oaoa e te haamana‘o-maoro-hia– huero mo‘a e te mau mea atoa.

Ua parau te Arii Beniamina e, « E inaha, e faaite atu vau ia outou na i taua mau mea nei, ia ite outou i te paari; ia ite ho‘i outou e, a tavini ai outou i te taata nei te tavini ïa outou i to outou Atua ra » (Mosia 2:17).

Ua haapii mai au i te paari i taua mahana oro‘a haamauruururaa, ra. Ua itehia ia‘u te oaoa na roto i te taviniraa, e mea ohie a‘e ho‘i te parahi noa e te mana‘o ino noa. Ua riro te taviniraa ei taviri no te oaoa eiaha i te mau mahana faafaaearaa noa, oia ho‘i, i te mau taime e mea ohie ia ô i roto i te mau ohipa aita e itehia i roto i to tatou oraraa, i roto atoa râ i te mau huru pu‘e tau atoa. Noa’tu eaha te huru o to tatou oraraa, e itehia ia tatou te hoê taata no te tauturu. Na roto i te faateiteiraa i to tatou mau taea‘e e te mau tuahine, e faateitei atoa tatou ia tatou iho.

Ua faaoti a‘era vau e, te tautururaa i roto i te hoê misioni e mea maitai a‘e ïa i te parahi noa i te fare ma te mo‘emo‘e e te riri noa. Tau mahana i muri iho, ua ite au ia‘u iho i te tuuraa i te umara putete taviri i roto i te mereti a te mau taata po‘ia.