Parau poro‘i na te Peresideniraa Matamua
Te Imiraa i te Puai na roto i te Haapa‘o
I roto i to tatou ao i teie mahana tei ni‘a i te apîraa te faatumuraa te ohipa. Te hinaaro nei te mau taata atoa ia hi‘oraa apî noa ratou, ia apî noa te feruriraa, e ia apî noa te tino. No reira te mau tino moni rarahi i haamau‘ahia ai i te mau matahiti atoa no ni‘a i te mau mea ta te taata e ti‘aturi nei e faaho‘i faahou mai te reira i to ratou huru apî. E ti‘a ia tatou ia ui ia tatou iho e, « te imiraa i te hi‘oraa apî e ohipa apî anei te reira no to tatou nei anotau, no to tatou u‘i ? » E ti‘a ia tatou ia hurihuri rii i te mau api o te aamu no te imi i ta tatou pahonoraa.
E rave rahi tenetere i ma‘iri a‘e nei, i te anotau rahi o te mau ohipa ma‘imiraa, ua faanahohia te mau tere, e ua uta te mau pahi i te mau taata na ni‘a i te moana mataro-ore-hia no te ma‘imi i te hoê pape o te apîraa. Te faaite ra te aai e, i te hoê vahi i « te atea ê » te vai ra te hoê pihaa o te pape viivii ore, e te ohipa ta te taata e rave no te farii i te huru apî nehenehe, e ia vai noa taua itoito ra, o te inu ïa i te pape tahe noa na roto mai i taua pihaa ra.
O Ponce de Léon, tei fano na muri iho ia Columbus, tei tere e rave rahi tere ma‘imi, ma te imi i roto i te mau fenua Bahamas e i te tahi atu mau tuhaa o te Caraïbe, ma te ti‘aturi hope roa i te aai tei parau e, e itehia taua pape ra o te horo‘a i te tino apî. Aita ta’na mau tautooraa, mai ta te tahi atu mau taata e rave rahi, i horo‘a mai i te hoê iteraa, no te mea i roto i te faanahonahoraa hanahana a to tatou Atua, ua tomo mai tatou i roto i te oraraa tahuti nei no te tamata i te apîraa tera râ hoê ana‘e taime.
Te Pihaa o te Parau mau
Noa’tu e, aita e pihaa o te apîraa ta tatou e imi maite, te vai ra te tahi atu pihaa o te hoê pape tao‘a rahi atu, oia ho‘i, te mau pape o te ora mure ore. O te pihaa ïa o te parau mau.
A papa‘i ai te rohi pehe i teie mau parau pohe ore, ua roaa ia’na te auraa mau o te imiraa i te parau mau:
Oia ïa, a parau, eaha te parau mau ? ‘Teie te tao‘a hanahana a‘e
Ta te taata nei e aora râ, ta te mau Atua e nehenehe e titau.
Haere a imi i roto i te mau hohonuraa tei reira te vairaa to’na anaana,
E aora râ, a imi i ni‘a i te mau ra‘i teitei:
‘Teie te titauraa o te hinaaro teitei a‘e. …
I muri iho, a parau, eaha te parau mau ? ‘Teie te hopea e te matamua,
No te mea ua hope te mau otia o te taime.
Noa’tu e reva te mau ra‘i e e parari te mau pihaa o te fenua,
Te parau mau, te taatoaraa o te oraraa, e ora ïa i te ino,
Te mure ore, ma te taui ore, e a muri noa’tu.1
I roto i te heheuraa tei horo‘ahia i te Peropheta Iosepha Semita i Keterani, Ohio, i te ava‘e Me 1833, ua parau te Fatu e:
« O te parau mau ra o te ite ïa i te mau mea i to ratou huru mau, mai te au i tei vai ê na, e mai te au ho‘i i te vai a muri atu; …
« O te Varua no te parau mau ra no te Atua ïa. … Ua farii Oia (o Iesu) i te îraa o te parau mau …;
« E e ore roa te hoê taata e farii i te îraa maori râ ia haapa‘o oia i ta’na mau faaueraa.
« O oia o te haapa‘o i ta’na mau faaueraa ra e farii ïa i te parau mau e te maramarama, e tae noa’tu i te taime oia e faahanahanahia ai i roto i te parau mau e ua ite ho‘i i te mau mea atoa ».2
Aita e titauhia ia outou e aora râ, ia‘u nei i teie tau maramarama, i faaho‘ihia mai ho‘i te îraa o te evanelia, ia fano na ni‘a i te mau moana mataro-ore-hia e aora râ, ia ratere na ni‘a i te mau e‘a tapa‘o ore no te imi i te pihaa o te parau mau. I te mea ho‘i e, ua tapa‘o te hoê Metua i te Ao ra i to tatou haerea e ua horo‘a mai i te tapura fenua hape ore – te haapa‘o!
Ua faaite mai ta’na mau parau ora i te mau haamaitairaa ta te haapa‘o e horo‘a mai e tae noa’tu i te aau mauiui e te oto ta te taata ratere e farii mai te mea e, e haere oia na ni‘a i te mau e‘a opanihia o te hara e te hape. I te u‘i tei parahi noa i roto i te peu o te faatusiaraa animala, ua faaite papû o Samuela e, « e maitai rahi tei te haapa‘o i tei te tusia, e maitai rahi tei te faaroo i tei te toahua mamoe oni ra ».3
Ua ite te mau peropheta no mutaa ihora e no teie tau i te puai e roaa mai na roto i te haapa‘o. A haamana‘o na ia Nephi : « E haere atu vau, e rave ho‘i i te mau mea ta te Fatu i faaue maira ».4 E aora râ, i te tatararaa nehenehe a Moromona i te puai i roaa i te mau tamaiti a Mosia:
« Ua tupu to ratou ite i te parau mau i te rahi; e mau taata mana‘o papû ho‘i ïa ratou, e i imi maite ratou i te parau i papa‘ihia ra, ia ite ratou i te parau a te Atua.
« E ere râ te reira ana‘e; i pinepine ratou i te pure, e i te haapae i te maa; no reira i noaa‘i ia ratou te Varua tohu, e te Varua ho‘i o te heheuraa parau; e ia haapii ratou, ua haapii ma te mana e te toro‘a no ô mai i te Atua ».5
A haapa‘o i te mau faaueraa.
Ua horo‘a mai te Peresideni David O. McKay (1873–1970), i roto i te hoê o ta’na mau parau poroi omuaraa i te mau melo o te Ekalesia i roto i te hoê amuiraa rahi, i te hoê arata‘iraa no to tatou nei anotau ma te ohie e te puai atoa: « A haapa‘o i te mau faaueraa a te Atua ».6
Mai te reira atoa te faaueraa i roto i te parau poroi a te Faaora i te na ôraa e, « No te mea o ratou atoa o te hinaaro i te noaa mai i te hoê haamaitairaa i to‘u rima nei e haapa‘o ïa i te ture i faataahia no taua haamaitairaa ra, e te mau huru ho‘i no te reira mai te au i tei faatumuhia hou roa i te faatumuraa o te ao nei ».7
Ua riro te mau ohipa a te Fatu ei haapapûraa i Ta’na mau parau. Ua faaite Oia i te here mau i te Atua na roto i te oraraa i te hoê oraraa maitai roa, na roto i te faaturaraa i Ta’na misioni mo‘a. Aita Oia i faateitei i te aau. Aita Oia i î i te te‘ote‘o. Aita Oia i haavare noa a‘e. Ua haehaa râ Oia. Ua vai papû noa Oia. Ua vai parau ti‘a noa Oia.
Noa’tu e ua faahemahia oia e taua fatu o te haavare ra, oia te diabolo; noa’tu e ua paruparu oia i te haapaeraa i te maa e 40 mahana e e maha ahuru ru‘i e « poia ihora »; ia pûpû mai râ te diabolo ia Iesu i te mau mea au e te faahema ho‘i, ua horo‘a mai Oia ia tatou i te hoê hi‘oraa hanahana o te haapa‘o na roto i te patoiraa i te hahi ê i te mea Ta’na i ite e ua ti‘a.8
I mua i te ahoaho o Getesemane, i reira ho‘i Oia i mauiui ai i te ati rahi e ua tahe mai te toto na roto i te mau poa, ua faaite Oia i te hi‘oraa o te Tamaiti haapa‘o i te na oraa e, « E ta‘u Metua, ia ti‘a ia oe ra, e hopoi ê atu i teie nei au‘a: ia tupu râ to oe hinaaro eiaha to‘u ».9
Na ô atura Iesu ia Petero i Galilea ra, « A pee mai ia‘u ». Te reira ra atoa te parau i ni‘a ia Philipi, « A pee mai ia‘u ». E i ni‘a i te terona ra o Levi, te parahi noa ra, ua tae atoa maira taua piiraa ra, « A pee mai ia‘u ». I te taata atoa tei horo mai Ia’na , e tao‘a rahi ta’na ra, te na mai nei te mau parau, « A pee mai ia‘u ».10 E ia outou na e ia‘u atoa nei, te na ô atoa mai nei taua reo ra, e taua Iesu ra, « A pee mai ia‘u ». E haapa‘o anei tatou ?
Ua riro te haapa‘o ei tapa‘o no te mau Peropheta, tera râ, e mea ti‘a ia ite e, e roaa teie puai ia tatou i teie mahana.
Hoê Hi‘oraa no teie Tau
E taata teie tei haapii maitai i te parau o te haapa‘o, tei iteahia ia’na te parau mau, e taata maitai e te aau parau ti‘a e te oraraa haehaa. Ua tomo mai oia i roto i te Ekalesia i Europa, e, na roto i te faaitoitoraa i te haaputu i te moni e te faatusiaraa, ua reva atu i Amerika Apatoerau i te hoê fenua apî, te hoê reo taa ê, te mau peu taa ê, tera râ, hoê â Ekalesia i raro a‘e i te faatereraa a te hoê noa iho Fatu, o ta’na i ti‘aturi e i haapa‘o i te parau. Ua riro mai oia ei peresideni amaa no te hoê na’na iti nainai o te Feia Mo‘a faaoroma‘i i roto i te hoê oire e ere te taata i te mea hoa. Ua haapa‘o oia i te faanahonahoraa a te Ekalesia, noa’tu e mea iti roa te mau melo e te rahi ho‘i te ohipa. Ua faaite oia i te hi‘oraa maitai no te mau melo o ta’na amaa, e hi‘oraa tei tuati i ni‘a i te huru o te Mesia, e ua pahono mai te mau melo na roto i te hoê here e mea varavara te iteahia.
Na’na iho i imi i te maitai no to’na oraraa ei taata hoo tao‘a. E mea iti roa ta’na faufaa, ua aufau tamau râ oia i te tuhaa ahuru ti‘a e ua horo‘a hau atu. Ua haamau oia i te hoê afata misionare i roto i ta’na amaa iti na‘ina‘i e no te mau ava‘e e rave rahi, oia ana‘e te taata aufau. Mai te mea e te vai ra te misionare i roto i to’na oire, e faatamaa oia ia ratou, e aita ratou e ho‘i atu ma te ore ratou e farii i te tahi mea iti no ta ratou ohipa e no to ratou oraraa. Te mau melo o te Ekalesia e ratere atu na roto i to’na oire e e haere atu i roto i ta’na amaa, e farii ratou i ta’na aupururaa e i te mahanahana o to’na varua, e ia ho‘i atu ratou, e ite ratou e, ua farerei ratou i te hoê taata taa ê roa, te hoê o te mau tavini haapa‘o o te Fatu ra.
Te feia tei riro ei faatere no’na ua farii ïa i te faatura hohonu mai roto mai ia’na e i ta’na ho‘i aupururaa taa ê. I roto i to’na feruriraa e mau ti‘a ratou no te Fatu; ua utuutu oia ia ratou i te pae o te maitai tino e ua faaite oia i to’na aroha rahi i roto i ta’na mau pure – pinepine – no to ratou maitai tino. I te hoê mahana Sabati ua haere atu te tahi mau ti‘a faatere i roto i ta’na amaa e ua amui atu ratou i piha‘i iho ia’na i roto i te rahiraa pure aita i raro mai i te tatini i roto i tera e tera putuputuraa e te farereiraa i te mau melo. Ua vaiiho atu te mau ti‘a faatere ia’na i te hopea o taua mahana ra ma te oaoa rahi e te î i te varua, e na te reira i faaoaoa noa ia ratou i roto i to ratou tere e maha hora i roto i te to‘eto‘e, e i teie nei, i muri a‘e e rave rahi matahiti, ua riro ïa ei tamahanahanaraa i te varua e ei haapeepeeraa i te aau ia haamana‘o ana‘e ratou i taua mahana ra.
Ua imi te mau taata ite, te mau taata aravihi i teie taata haehaa o te Atua tei ore i haere i te haapiiraa, e ua faariro ia ratou ei mau taata fanao mai te mea e, ua parahi ratou i piha‘i iho ia’na hoê a‘e hora te maoro. E taata oia mai te mau huru taata atoa; e ere oia i te mea papû roa i te parau Peretane, e e ere i te mea ohie ia taa; e mea haehaa roa to’na nohoraa. Aita to’na e pereoo uira e aora râ, e afata teata. Aita oia i papa‘i i te buka e i horo‘a i te mau a‘oraa aravihi e aita ho‘i i rave i te mau mea e tau‘ahi e to te ao. Noa’tu râ i te reira, e ti‘a te feia haapa‘o i to’na uputa fare. No te aha ? No te mea ua hinaaro ratou e inu roa i te puna o te parau mau. E rahi a‘e to ratou au i te ohipa ta’na i rave i te parau ta’na i parau, e mea au a‘e na ratou te puai o to’na oraraa i te puai o ta’na mau a‘oraa.
Te iteraa i te hoê taata veve ia horo‘a tamau noa e ma te oaoa e piti a‘e tuhaa ahuru na te Fatu, na te reira e faaite i te taata i te auraa mau o te tuhaa ahuru. Te iteraa ia’na ia utuutu i tei po‘ia, e ia farii i te taata ê ê, na te reira e faaite i te taata e, ua na reira oia mai te Fatu iho e na reira. Te pureraa i piha‘i iho ia’na e te iteraa i to’na ti‘aturi i te arairaa a te Atua, ua riro ïa ei faaiteraa no te hoê huru aparauraa apî.
E mea tano roa ia parau e, ua haapa‘o oia i te faaueraa matamua e tei hau i te rahi e mai te reira atoa te piti,11 oia ho‘i, ua î to’na aau i te aroha i te mau taata atoa, e ua faaunauna noa te taiata ore i to’na mau feruriraa i te mau taime atoa, e no reira, ua puai to’na ti‘aturiraa i mua i te aro o te Atua.12
E taata rima maitai teie e te parau ti‘a ho‘i. Ua roaa to’na puai na roto i te haapa‘oraa.
Te puai ta tatou e titau itoito nei i teie mahana no te pahono i te mau titauraa o te hoê ao fifi e te tauiui noa, e roaa te reira ia tatou mai te mea e, e ti‘a tatou ma te itoito e te papû maitai a parau ai mai ia Iosua ra, « Area vau e to‘u atoa ra utuafare, e haamori ïa matou i te Iehova ».13
Aui: hoho‘a na Matthew Reier; Te Hoho‘a o te Mesia, na Heinrich Hofmann, na roto i te maitai a C. Harrison Conroy Co.; atu: faahoho‘araa na Jerry Thompson
Faataaraa no roto mai i To te Mesia piiraa ia Petero e ia Andrew, na James Taylor Haywood, na roto i te maitai o te Fare anavaha parau a te Ekalesia