Te mau haamaitairaa o te Hiero
No roto mai i te a‘oraa no te hoê pureraa i Brigham Young University tei horo‘ahia i te 15 no novema 2005 No te mau parau taatoa o te a‘oraa na roto i te reo Peretane, a hi‘o http://speeches.byu.edu.
Ua riro te hiero ei fare mo‘a, e vahi mo‘a i reira te mau ohipa faaoraraa e te mau oro‘a faufaa e ravehia ai no te faaineine ia tatou no te faateiteiraa.
Te mau haamaitairaa o te oro‘a hiero e mea faufaa roa ïa no tatou tata‘itahi mai to tatou bapetizoraa. Teie te tumu tatou e faaineine ai ia tatou iho ia mâ tatou no te tomo i roto i te hiero o te Atua.
Te tomoraa i roto i te hiero e te raveraa i ni‘a ia tatou iho i te mau fafauraa mo‘a i reira, o te hoê ïa o te mau haamaitairaa rahi a‘e e roaa ia tatou i roto i te tahuti nei. I muri iho, ia oti tatou i te rave i te reira mau fafauraa i ni‘a ia tatou, e riro ïa to tatou haapa‘o i te oraraa i te reira i te mau mahana atoa ei faaiteraa i to tatou faaroo, te here, te haapa‘o, e te fafauraa varua e faatura tatou i to tatou Metua i te Ao ra e i Ta’na Tamaiti, o Iesu Mesia. E faaineine atoa to tatou haapa‘o ia tatou ia ora i piha‘i iho ia Raua e a muri noa’tu. E mea faufaa te mau oro‘a faaora – e o te faatumuraa ho‘i te reira o – te faanahonahoraa o te oaoa.
Te Parau Haapiiraa o te Hiero
Ua riro mau te hiero ei vahi i reira outou e « vai ai i roto i te ao nei e ere râ i to te ao nei ». Ia pe‘ape‘a outou e ia tupu mai te mau faaotiraa teimaha o te faateimaha i to outou feruriraa e to outou varua, e nehenehe outou e hopoi i to outou pe‘ape‘a i te hiero e ia farii i te arata‘iraa varua.
E mea ti‘a ia tatou ia farii i te hoê iteraa papû e te hoê mana‘o faatura no te hiero ei fare no te Fatu. Ua haapiihia ia tatou e, eiaha roa te mea viivii ia tomo i roto i te hiero ei parururaa i te mo‘araa o te hiero e no te titau i te Varua ia haamaitai i te feia te tomo i roto i te hiero mo‘a no to ratou mau oro‘a e ta ratou mau fafauraa. Ua riro te tura i roto i te hiero ei ohipa faufaa rahi no te titau i te Varua ia parahi mai i roto i te mau hora atoa o te mahana.
I to‘u vai tamariiraa, ua afai to‘u metua tane ia‘u mai Long Island, New York, i roto i te aua o te Hiero no Roto Miti, ia tape‘a i te hiero, e ia aparau i te faufaa o te hiero i roto i to‘u oraraa. I taua taime ra to‘u faaotiraa i to‘u mana‘o e, ia tae i te hoê mahana e ho‘i faahou vau i reira no te farii i te mau oro‘a o te hiero.
I roto i te roaraa o te aamu, i roto i te mau tau tuuraa atoa, ua faaue mai te Fatu i te mau peropheta ia patu i te mau hiero ia ti‘a i to’na mau taata ia farii i te mau oro‘a o te hiero. Ua haamaitaihia Mose e te Ati Iseraela na roto i te hoê hiero afa‘ifa‘i, te sekene, i reira ho‘i te ohipa o te oro‘a mo‘a i ravehia ai i raro a‘e i te ture a Mose – e i reira atoa te Fatu i haere mai ai e paraparau ia Mose i te tahi taime. Ua faaoti te Arii Solomona i te hoê hiero nehenehe i Ierusalema, tei haamouhia i muri a‘e ra. I muri iho, i te anotau o te Mesia, ua patuhia te tahi atu hiero i Ierusalema.
Ua haapii atoa tatou i roto i te Buka a Moromona e, ua patu atoa te Ati Nephi i te hoê hiero « mai te au i te hoho‘a o te hiero o Solomona ra » (2 Nephi 5:16). Ua haapii atoa te tahi atu mau peropheta o te Ati Nephi, mai Iakoba e te Arii Beniamina, i te taata i te hiero (a hi‘o Iakoba 1:17; Mosia 1:18).
Te vahi faufaa roa’tu, i te taime a fâ mai ai te Fatu tiafaahou o Iesu Mesia i te Ati Nephi 34 i muri a‘e i te Mesia., ua haere mai Oia i te hiero (a hi‘o 3 Nephi 11:1–11).
Ua haapii mai te Peropheta Iosepha Semita e, « Aita te Ekalesia e hope roa i te faanahonahohia, i roto i to’na huru mau, e eita roa e hope e tae noa’tu ua oti te Hiero, tei reira ho‘i te mau vahi no te raveraa i te mau oro‘a o te Autahu‘araa ».1
Te Hiero no Kirtland te hiero matamua i roto i teie anotau hopea nei, e ua riro ïa ei vahi faufaa i roto i te faaho‘i-raa-hia mai te mau taviri o te autahu‘araa. Ei pahonoraa i te pure a Iosepha Semita, ua haere mai Iesu e farerei ia’na i roto i te Hiero no Kirtland i te 3 no eperera, 1836 (a hi‘o PH&PF 110). Ua fâ mai te Faaora ma te hanahana e ua farii i te Hiero no Kirtland ei fare No’na. I taua mau taime ra ua fâ atoa mai o Mose, Elia, e o Eliaha no te horo‘a mai i te mau taviri o te autahu‘araa tei mauhia e ratou ra. Ua faaho‘i mai o Eliaha i te mau taviri o te mana taati, mai tei fafauhia mai e Malaki, ia ti‘a ho‘i ia tatou ia farii i te îraa o te mau haamaitairaa o te hiero i roto i to tatou oraraa.
Ua faaoti to tatou mau tupuna pionie i te hamani i te Hiero no Navu e ua rave i te mau oro‘a mo‘a i roto. Te Hiero no Navu te hiero matamua i reira i ravehia ai te mau oro‘a hiero e te taatiaraa, tei riro ei faaiteraa i te puai rahi o te mau pionie a faaoroma‘i ai ratou i te teimaha o to ratou tere na roto i te mou‘a e tae atu i Ziona i roto i te Afaa no Roto Miti. Ua farii ratou i te puai i roto i te hiero mo‘a. Ua taatihia te tane e te vahine te tahi i te tahi. Ua taatihia te mau tamarii i to ratou mau metua. E rave rahi o ratou tei mo‘e te mau melo o te utuafare na roto i te pohe i roto i to ratou tere, ua ite râ ratou e, e ere te reira i te hopearaa no ratou. Ua taatihia ratou i roto i te hiero no te tau e a muri noa’tu. I muri a‘e, na roto i te heheuraa i fariihia e te Peresideni Brighama Young, ua patu te Feia Mo‘a i te tahi atu mau hiero i te pae Tooa o te râ.
I teie mahana e 130 hiero e ohipa nei, ia ti‘a ho‘i i te mau melo faaroo o te Ekalesia ati a‘e te fenua nei ia haere i te fare o te Fatu no te farii i to ratou mau oro‘a no te hiero e ia rave i te mau fafauraa Ia’na ra.
Te mau Oro‘a no te Hiero
Te tumu matamua roa o te hiero o te horo‘araa ïa i te mau oro‘a e titauhia no to tatou faateiteiraa i roto i te basileia tiretiera. Na te mau oro‘a no te hiero e arata‘i ia tatou i to tatou Faaora ra e ia horo‘a mai ia tatou nei i te mau haamaitairaa o te roaa ia tatou na roto i te Taraehara o Iesu Mesia. Ua riro te mau hiero ei fare haapiiraa teitei rahi a‘e o te haapiiraa e itehia e te taata, o te horo‘a mai ia tatou i te ite e te paari no ni‘a i te Hamaniraa o te ao nei. Ua riro te mau haapiiraa o te oro‘a hiero ei arata‘i ia tatou i roto i te huru no te faatereraa i to tatou oraraa i te tahuti nei. Te auraa o te parau ra oro‘a hiero e « horo‘a » ïa. I roto i teie oro‘a te vai ra te mau arata‘iraa no ni‘a i te huru o to tatou oraraa, e te vai atoa ra te mau fafauraa ta tatou e rave no te ora ma te parau ti‘a na roto i te peeraa i to tatou Faaora.
Te tahi atoa oro‘a faufaa oia ho‘i te taati-raa-hia no a muri atu i roto i te faaipoiporaa tiretiera. Na roto i teie fafauraa o te faaipoiporaa e ti‘a i te mau tamarii ia taatihia i to ratou mau metua e te mau tamarii i fanauhia i roto i te fafauraa, e riro mai ïa ratou ei tuhaa no te hoê utuafare mure ore.
Te haapii mai nei te Parau Haapiiraa e te mau parau fafau ia tatou e: « Te mau mea atoa ta oe e taati atu i ni‘a i te ao nei e taatihia’tu ïa i te ra‘i ra; e te mau mea atoa ta oe e ruuruu atu i ni‘a i teie ao nei, i roto i to‘u nei i‘oa, e na roto ho‘i i ta‘u parau, te na reira mai nei te Fatu e, e ruuruuhia te reira e a muri noa’tu i roto i te ra‘i » (PH&PF 132:46).
Ia tuturi te tane e te vahine i mua i te fata, ei taata taati, ua ite au i ta‘u ohipa ei ti‘a no te Fatu. Ua ite au e, tei taatihia i te fenua nei ua taati-atoa-hia ïa i te ra‘i ra eita ho‘i e ofatihia mai te mea e, e haapa‘o tamau noa te feia i taatihia e tae noa’tu i te hopea ra.
Ua hi‘o noa vau i roto i te mau matahiti e rave rahi e rave rahi tane e te vahine tei ti‘a ia tapea papû i te faaipoiporaa na roto i to ratou haapa‘o tamau-noa-raa i te mau fafauraa ta ratou i rave i ni‘a ia ratou i roto i te hiero. I roto i teie mau tane e te vahine faaipoipo e rave rahi tei manuïa te vai ra hoê vahi aifaito to ratou.
A tahi, ua ite teie mau tane e te vahine faaipoipo e o vai ratou – e mau tamaiti e e mau tamahine na te Atua. Ua haamau ratou i te mau opuaraa mure ore ia ora faahou i piha‘i iho i to tatou Metua i te Ao ra e i Ta’na Tamaiti o Iesu Mesia. Te faaitoito nei ratou ia faaru‘e i te mau haerea o te taata tino nei i muri (a hi‘o Mosia 3:19).
A piti, ua ite ratou i te haapiiraa e te faufaa o te mau oro‘a faaora o te hiero e te mau fafauraa o te hiero e to ratou faufaa no te faatupuraa i te mau opuaraa mure ore.
A toru, ua ma‘iti ratou ia roaa te mau haamaitairaa mure ore o te basileia o te Atua eiaha râ te mau tao‘a o te ao nei.
A maha, ua ite teie mau tane e te vahine faaipoipo e, ia oti ratou i te taatihia no te tau e no te mau tau a muri atu, ua ma‘iti ïa ratou i te hoê hoa mure ore – ua hope to ratou mau mahana faahinaaroraa i te tahi atu! Aita e titau-faahou-hia ia imi i te tahi atu!
A pae, te feruri nei teie mau tane e te vahine i te tahi e te tahi hou a feruri ai ia ratou iho. E tapo‘i te aau pipiri i te mau iteraa varua. Na roto i te aparauraa i te Fatu i roto i te pure, e tupu amui ratou i te rahi eiaha râ e faataa ê. E paraparau te tahi i te tahi, e na roto i te reira, aita ratou e vaiiho i te mau mea rii na‘ina‘i ia riro mai ei mau mea rarahi. E paraparau oioi ratou i te mau « pe‘ape‘a rii na‘ina‘i » ma te iti te măta‘u i te faainoraa. Na roto i te reira huru raveraa, ia piha te titata e ia ta‘i te hi‘o, aita ïa te mau feruriraa inoino e paaina. E mea maitai a‘e ia haama‘i rii te mata‘i hou a paaina ai te tapo‘i o te titata. Te vai ra te hinaaro i roto ia ratou ia tamaru e ia ani i te faaoreraa i te hapa mai te mea e, ua haamauiui ratou i tei herehia e ratou. E faaite ratou i to ratou here no te tahi e te tahi e e fatata roa ratou. E amo e e faaitoito ratou i te tahi e te tahi.
Te mau Haamaitairaa o te Hiero
E fare mo‘a te hiero, e vahi mo‘a, i reira ho‘i te mau ohipa e te mau oro‘a faaoraraa e ravehia ai no te faaineine ia tatou no te faateiteiraa. E mea faufaa ia roaa ia tatou te hoê iteraa papû e, to tatou faaineineraa ia tomo i roto i te fare mo‘a e to tatou raveraa i te reira mau oro‘a e te mau fafauraa, o te mau ohipa faufaa ïa o ta tatou e ite i roto i to tatou oraraa tahuti nei.
Na roto i to tatou iho hinaaro, ua faaru‘e atu tatou i te Atua te Metua no te haere mai i roto i teie tamataraa tahuti nei ma te farii i te ti‘amâraa, ma te ite e, te vai ra « na mea e piti i te mau mea atoa » (2 Nephi 2:11). Ta tatou opuaraa o te raveraa ïa i ni‘a ia tatou i te taatoaraa o te haana tama‘i a te Atua e ia pato‘i i « te mau ihe auahi a te feia parau ti‘a ore ra » e te paruru o te faaroo e te o‘e o te Varua (a hi‘o PH&PF 27:15–18), ia rohi tamau noa e tae noa’tu i te hopea ra, e ia ti‘amâ ia ti‘a e ia ora i mua i te aro o te Atua te Metua e Ta’na Tamaiti, o Iesu Mesia, e amuri noa’tu no te faaoti i te mea i parauhia ra e, te ora mure ore.
Hoho‘a o te Hiero no Roto Miti na Welden C. Andersen; atau: hoho‘a faahoho‘araa na John Luke
Ua haamaitaihia Mose e te Ati Iseraela na roto i te hoê hiero afa‘ifa‘i, te sekene, i reira ho‘i te ohipa o te oro‘a mo‘a i ravehia ai i raro a‘e i te ture a Mose – e i reira atoa te Fatu i haere mai ai e paraparau ia Mose i te tahi taime.
Faahoho‘araa na Ted Henniger