Tovolea na Ka Dredre
Na bula tawamudu sa ikoya na bula vata kei na Tamada kei ira na noda matavuvale. Sega beka ni koya oqo na yalayala me na itakele ni noda sasaga?
Na gauna era sa kacivi kina na tisaipeli le tinikarua e Amerika, sa qai vakaroti ira na Turaga o Jisu Karisito ka kaya, “O koya mo dou qai vinaka sara me vakataki au, se mo dou vinaka sara me vaka na Tamamudou sa tiko mai lomalagi.”1 Se qai vakacavara ga na iVakabula ena rogo vinaka, sega ni nanumi koya ga vakaikoya, kei na vakaturagataki ni nona itavi e vuravura. Sa doudou sara ga o Koya me kaya ena nona dodonu ni o Koya kei Tamana, ka Tamada, me rau sa ivakaraitaki meda muria kece sara.
Ena rai vakatamata ena via dredre toka ni se qai tekivu. Ia, sa na vaka me vakilai ni na rawa, ni sa kilai ni kevaka me vinakati me rawati, e tiko na noda ivukevuke. Na veivuke totoka ka kaukauwa ena gadreva e dua na tamata me vukei kina, sa dau vakarautaki rawa tu. Na kena imatai sa ikoya na liga dauloloma ni Tamada Tawamudu ka ni vinakata meda lesu tale ka laki bula tawamudu vata kei Koya. Me vaka ni Tamada, sa dau tu vakarau ka gadreva me vosota noda cala kei na malumalumu,kei na caka cala eda vakayacora, na veivosoti ni da sa veivutuni vakaidina. Me kena ikuri, ka ivakaraitaki ni Nona loloma cecere vei ira yadua na Luvena—sa vakarautaka tu o Koya vei keda, na isau ni itavi e mai qarava na iVakabula, sa ikoya na Veisorovaki, ka me vaka a vakayacora e dua na Luvena talairawarawa, ka sa dau tu vakarau me vakayacora na loma iTamana me baleti keda yadudua.
E a vakaraitaka na Turaga vei Josefa Simici na veika oqo, “Raica kevaka ko sa muria na noqu vunau ka vosota me yacova na ivakataotioti, ko na rawata na bula tawamudu, oqo na isolisoli uasivi duadua ni Kalou.2 Na yalayala vakalou oqo ena rawa ni rawati. Na bula tawamudu sa ikoya na bula vata kei na Kalou kei ira na noda matavuvale.3 Sega beka ni koya oqo na yalayala me na itakele ni noda sasaga meda solia na noda vinaka duadua ena qarai na veika sa yalataki tu vei keda?
Ni se qai tekivu na veivakararamataki ni Veivakalesuimai, ka basika na cakacaka veivakurabuitaki oqo vei ira na luve ni tamata, qai kaya na Turaga, “Ia koi kemudou kece sa lesi mo dou qarava na ilesilesi ni Kalou, mo dou qaravi koya ena yalomudou taucoko, na nomudou kaukauwa taucoko, kei na nomudou nanuma kecega, io me kunei ni dou sa sega ni cala ena mata ni Kalou ena siga mai muri.”4 Ena yaloda taucoko, na noda kaukauwa taucoko, na noda nanuma kecega, kei na noda kaukauwa kecega—kena ibalebale na noda bula taucoko.
A kaya o Peresitedi David O. Mckay, “Na kalougata ni vutuniyau ena lako mai vei ira na dausasaga vagumatua.”5 Na kalougata oqo ena soli ga vei ira era bucina na nodra vakabauta vei Jisu Karisito, ka muria na Nona ivakaro ni cakacaka, solibula, ka solia na ka kece e tu vei ira me taraicake ka vaqaqacotaki kina na matanitu ni Kalou.
Na kena vakavotukana na yalayala vakalou ni bula tawamudu, me rawati na ‘vinaka sara’ ka bula marau tawamudu ena matavuvale, ena vakatau na kena cakacakataki na vakabauti Jisu Karisito, talairawarawa ki na ivunau, vosota vakadede, ka yalodina ena noda bula taucoko.
E a sega ni namaka na Turaga meda na cakava na ka eda na sega ni rawa ni cakava. Na ivakaro ni vinaka sara me vakataki Koya, e vakauqeti keda meda rawata na ka e vinaka duadua me baleti keda, meda vaqara ka vakatorocaketaka na taledi ka a solia vei keda na Tamada Tawamudu dauloloma, ka sureti keda tiko meda na rawata na ka eda rawa ni rawata ni da luvena na Kalou. E kilai keda o Koya; e kila o Koya na ka eda rawa ni rawata kei na noda malumalumu. Na veisureti kei na bolebole meda rawata na vinaka sara, me rawa kina na bula tawamudu e baleta na kawatamata.
Ni oti ga na veivakavulici ni “sa sega ni yaga vua na tamata me cici vakatotolo ni sa malumalumu na yago,” vakaraitaka o Penijamini na Tui ni “ia sa kilikili me gumatua sara me rawata na lagilagi.”6 Na Kalou ena sega ni vinakata me na sivia na ka vinaka duadua eda na rawa ni solia baleta ni o ya ena sega ni veiraurau, ia, ena sega talega ni ciqoma na ka e sega ni veiganiti kei keda baleta ni na sega talega ni na veiraurau. Sa ikoya gona meda sa solia sara ga na ka vinaka duadua ni da qarava tiko na Kalou kei ira na wekada. Meda sa veiqaravi ena noda matavuvale, ena noda itavi ena Lotu, ena kena e cecere sara. Meda sa tovolea meda vinaka sara, ka tovolea meda vinaka cake ena veisiga yadua.
Na veivakabulai kei na bula tawamudu ena sega ni rawa kevaka me a sega na Veisorovaki ka a vakayacora na noda iVakabula, ka da dinau tu kina vua ena veika kece. Ia me na vakavotukana na veivakalougatataki cecere oqo ena noda bula sa dodonu meda cakava mada na noda itavi, “ia eda sa kila ni da sa vakabulai ena loloma walega, ni da sa cakava oti na veika kece e rawa ni caka.”7 Meda sa cakava kece sara na ka eda rawa ni cakava ena vakabauta, yalomarau, yalodina, kei na yalomatua me rawa kina ni da na cakava na ka e dau sega ni rawa ni caka … o ya ,me na qai rawa kina na ka e tukuna na nanuma ni tamata ni na sega ni rawa, ia ni basika na veivuke ni Tamada dauloloma kei na solibula vakalou ni iVakabula, sa na qai isolisoli levu duadua, mai na veika e kilai rawa, meda na laki bula tawamudu kei na Kalou kei ira na noda matavuvale.
Au masulaka ni o keda kece na lewenilotu eda na vakavoui ena noda kilikili ni vakaivotavota ena sakaramede, na yalayala eda cakava vata kei na Tamada Vakalomalagi ena gauna eda a papitaiso kina kei na kena ciqomi na veicakacakatabu vakalotu tale eso ni kosipeli vakalesumai. Au masulaka ni da na tovolea meda na cakava na noda vinaka duadua ena noda itavi vakaveiwatini, vakaitubutubu, vakagone, vakaveitacini, ena noda itavi ena wasei ni kosipeli, ena nodra vueti mai o ira era sa lako sese tu, na kena qaravi na cakacaka ni nodra vakabulai na noda qase e liu, ena noda cakacaka, kei na noda bula ena veisiga.
Au masulaka me na rawa, ena ivakarau ni noda bula meda tukuna, me vakataki Paula na iApositolo, “Au sa vala oti ena ivalu vinaka, au sa ciciva oti na cere, au sa taura matua na vakabauta.”8
Ni da sa cakava, eda sa cakava tiko na veika e tuvalaka na Tamada mai Lomalagi, me na vakalougatataki keda kina vakalevu, ena bula oqo ka vakakina na bula sa bera mai. E gadreva me solia vei keda na veika kece e tu Vua, ia meda vakaivotavota ena Nona isolisoli levu duadua sa ikoya na bula tawamudu.
Ena gauna mada ga, e yaco kina na rai savasava vakatamata e dau dredre me rawati rawa na bula e taucoko. Au sa vakadinadinataka ni Tamada kei na noda iVakabula rau sa vakatakila vei keda ni sa rawa meda rawata na veika dredre. Io, sa na rawa me rawati na bula tawamudu. Io, sa na rawa meda bula marau nikua ka tawamudu.
O koya e vola na yavu ka tu kina na yalayala totoka oqo na Tamada mai Lomalagi, ka bula tiko. Na Luvena, o Jisu Karisito e a vakataqara vei Koya na noda ivalavala ca kei na veika cacawale e vakayacori tiko e vuravura ki na ivakataotioti ni sa na rawa meda vagalalataki mai na kena revurevu. Au kila ni noda Turaga o Jisu Kartisito e bula tiko. Sa vakalesui mai ki vuravura na kosipeli kei na matabete ena iotioti ni gauna oqo vua na Parofita o Josefa Simici. Nikua sa tu vei keda na veivakalougatataki ni iapositolo kei na parofita ka ra sa kacivi mai vua na Kalou ka ra sa dusimaki keda tiko yani ki na gaunisala meda na lesu tale vei Tamada. Sa kacivi o Peresitedi Thomas S. Monson me liutaka na cakacaka oqo ena iotioti ni gauna oqo. E parofita ni Kalou o koya. Au vakadinadinataka na ka oqo ena yaca tabu i Jisu Karisito, emeni.