Ni Bula Vinaka mai ki na Koniferedi
Keimami gadreva me lewe levu tikoga na lewenilotu me ra gole yani ki na valetabu ena sala e voleka sara vei ira ka sega ni sau levu.
Kemuni na taciqu kei na ganequ lomani, au kidavaki kemuni yadudua sara ena itekivu ni 179 ni Koniferedi Raraba Vakayabaki oqo ni Lotu i Jisu Karisito ni Yalododonu Edaidai.
Au vakavinavinakataka vakalevu na gauna eda sa mai bula donuya tiko oqo—e dua na gauna ni veitekinolaji vovou me rawa ni keimami vosa yani vei kemuni e vuravura taucoko. Ni ra mai tucake eke o ira na Vakaitutu Raraba kei ira na iliuliu ni veimataisoqosoqo ena Vale ni Koniferedi e Salt Lake City, ena voqa yani na domoi keimami ena vuqa na sala, oka kina ena retio, retioyaloyalo, na setilaite kei na Initaneti. E dina ga keimami na vosa tiko yani Vakavalagi, ia ko ni na rogoci keimami tiko ena 92 na vosa.
Mai na gauna eda a sota kina ena Epereli ni yabaki oqo, eda sa mai vakatabuya kina na Valetabu totoka mai Oquirrh Mountain Utah e South Jordan, mai Utah. Ena maliwa ni gauna a vakatabui oti kina na Valetabu e Draper Utah ena Maji kei na vakatabui ni Valetabu e Oquirrh Mountain Utah ena Okosita, a vakayacori kina e rua na bogi ni veivakamarautaki ni ivakaraitaki itovo vakavanua ka ra vakaitavi kina o ira na itabagone mai na tikina ni valetabu e rua oqo. Na vakatasuasua a dramataki kina ena sere kei na meke na iyaunibula tudei kei Utah. E tukuni ni volekata na 14,000 na itabagone era a vakaitavi ena rua na bogi oqo.
Eda sa tomana tikoga na tara valetabu. Keimami gadreva me lewe levu tikoga na lewenilotu me ra gole yani ki na valetabu ena sala e voleka sara vei ira ka sega ni sau levu. E 83 na pasede na noda lewenilotu e vuravura raraba era vakaitikotiko ena loma ni 200 na maile (320 kilomita) mai na dua na valetabu. Ena toso cake tikoga na pasede oqori ni tomani tiko na tara ni valetabu vovou e vuravura raraba. Ena gauna oqo sa veiqaravi tiko e 130 na valetabu, ka sa vakarau tara se sa tara tiko e 16. Sa ka ni marau vei au ena mataka nikua meu vakaraitaka ni sa voli e 5 tale na qele me tara kina na valetabu, ka sa nanumi ni na tekivutaki tiko ena vica na vula kei na yabaki mai oqo mai: Brigham City e Utah; Concepción e Chile; Fortaleza e Brazil; Fort Lauderdale e Florida; kei Sapporo mai Japani.
E milioni na cakacakatabu vakalotu e vakayacori rawa ena veivaletabu ena veiyabaki me baleti ira na noda daulomani era sa mate. Meda toso tikoga ena yalodina ni kena vakayacori na cakacakatabu vakalotu oqo me baleti ira era sega ni cakava rawa vakai ira. Au taleitaka na vosa nei Peresitedi Joseph F. Smith me baleta na veiqaravi ni valetabu kei na vuravura ni yalo ni oti na bula oqo. A kaya, “Mai na noda cakacaka ena vukudra, ena cawadru laivi mai vei ira na ivesu ni veivakabobulataki, ka na lako tani na butobuto e vakavolivoliti ira tu, me na cilavi ira kina na rarama ka ra rogoca ena vuravura ni yalo na cakacaka ena vukudra mai vei ira na [wekadra] eke, ka ra na marau vata kei kemuni ena nomuni vakayacora tiko na ilesilesi oqo.”1
Kemuni na taciqu kei na ganequ, sa tubu tikoga na Lotu, me vaka ga na kena yaco tiko mai ni se qai tauyavu ena 179 na yabaki sa oti. Sa veisautaka tiko na nodra bula e vuqa vakavuqa na tamata ena veiyabaki ka sa tete yani ka roboti vuravura ena nodra sa vakasaqara tiko na noda ilawalawa daukaulotu qaqa o ira era vakasaqara tiko na dina e tiko ena kosipeli i Jisu Karisito. Keimami sa kacivi kemuni na lewe ni Lotu kece sara mo ni nodra itokani na curuvou mai, ka vukei ira, ka karoni ira ena loloma ka vukei ira me ra vakila ni ra kauwaitaki tiko.
Au sa kerei kemuni mo ni vakabauta tiko ka masulaka na veivanua e yalani tiko kina na noda cakacaka kei na veivanua e sega ni vakatarai me da wasea kina ena galala na kosipeli ena gauna oqo. Ena yaco na caka mana ni da vakayacora vakakina.
Kemuni na taciqu kei na ganequ, eda sa vinakata meda rogoca na itukutuku ena cauraki mai vei keda ena loma ni rua na siga oqo. O ira era na vosa vei keda era sa kerea oti na veivuke kei na veidusimaki vakalomalagi ni ra vakarautaka tiko na nodra itukutuku. Era doka na veika era na wasea tiko vei keda. Sa noqu masu me da na vakasinaiti ena Yalo ni Turaga ni da vakarorogo ka vuli mai kina, ena yaca i Jisu Karisito, emeni.