“Dou Veivutuni … Meu Vakabulai Kemudou”
Na veisureti ni veivutuni e sega ni domo ni veicudruvi, ia e kerekere ni loloma mo saumaki ka “lesu tale” vua na Kalou.
Kemuni na taciqu kei na ganequ, sa rauta oqo e ono na vula na noqu kacivi ki na Kuoramu ni iApositolo Le Tinikarua. Au sa mai sotava tu oqo na yalo e lokomi ena noqu sa mai veiqaravi vata tiko kei ira na turaga era a dau noqu ivakaraitaki ka qasenivuli tu mai vakadede sara. Vinaka vakalevu na nomuni masu kei na veitokoni. Vei au sa gauna ni masu vagumatua, ena kena kerei na veivakadonui ni Turaga. Ena guiguilecavi dredre na noqu sa vakila na cecere ni Nona loloma. Au vakadinadinataka ni bula tiko o Koya, ka sa ikoya oqo na Nona cakacaka.
Eda lomani Peresitedi Thomas S.Monson na parofita ni Turaga. Au na dau nanuma tu ga na nona vakadewataka vei au na veikacivi ena vula o Epereli sa dromu. Ni sa mai cava na neirau veivakatarogi, sa qai ovici au ena ligan a ruarua. O Peresitedi Monson e turaga balavu. Ni sa ovici au e ligana ka dreti au yani vakavoleka, au vaka sara ga e dua na gonetagane lailai ena liga ni veitaqomaki ni tamana dauloloma.
Mai na ka au sotava o ya, au sa dau vakasamataka tu ga na veisureti ni Turaga meda lako ki Vua, ka taqomaki vakayalo e Ligana. A kaya, “Raica, [sa] dodo tu yani vei kemudou na [ligaqu] dauloloma, ia ko koya yadua sa lako mai vei au, au na vakabula; ia sa kalougata ko ira sa lako mai vei au.”1
Tukuna na ivolanikalou ni dolava tu ga na ligana,2 dodoka,3 dodo yani,4 ka vakavolivoliti keda.5 E tukuni ni kaukauwa6 ka savasava,7 ligana dauloloma,8 liga dauveimaroroi,9 liga ni loloma,10 “ka dodoka tu ga ena veisiga”11
Eda sa vakila kece na ligana vakayalo ni dau taqomaki keda. Eda sa vakila na Nona veivosoti, Nona loloma kei na veivakacegui. A kaya na Turaga,“Koi au kau sa vakacegui kemudou.”12
Sa ikoya na Nona veisureti meda veivutuni na Nona gadreva meda lako ki Vua ka taqomaki e Ligana. Meu kaya mada, “Raica, sa kacivi ira na tamata kecega ko Koya, a sa dodoka yani vei ira na ligana dauloloma ka kaya: Dou veivutuni, kau na qai vakabulai kemudou.”13
Ni da caka cala, eda sa vukitani mai vua na Kalou. Ni da veivutuni eda lesu vua na Kalou.
Na veisureti ni veivutuni e sega ni domo ni veicudruvi, ia e kerekere ni loloma mo saumaki ka “lesu tale” vua na Kalou.14 Sa veivakayarayarataki ni Tamada dauloloma kei na Luvena e Duabauga meda vinaka cake, meda vueta cake na ituvaki ni noda bula, meda veisau ka vakila na marau ni kena bulataki na ivunau. Ni da tisaipeli i Karisito, eda marautaka na veivakalougatataki ni veivutuni kei na vakacegu ni da sa vosoti. Era sa na tiki ni noda bula, me bulia na ivakarau ni noda vakasama kei na ka eda vakila.
Mai na tini vakacaca na udolu ka vakarorogo tiko ena koniferedi oqo, e levu sara na itagede ni bula kilikili kei na bulasavasava. Ia ena vakalougatataki keda kece sara na veivutuni. Ena ganita meda vakila na liga ni loloma ni iVakabula ena kena vosoti na noda caka cala.
Vica na yabaki sa oti, e a kerei meu laki sotava e dua, ka a dau sega ni muria tu na ivakavuvuli ni lotu ni bera ni keirau qai mai sota. E a muduki tani mai na Lotu ena vuku ni nona digidigi cala. E se tarai koya tikoga na veika e a dau vakayacora, dina ga ni sa mai lotu tale ka sa vakamuria sara tiko vagumatua na ivakavuvuli. Ena noqu a sotavi koya, au vakila ni se maduataka tu ga o koya na nona a vakawalena na nona veiyalayalati. Ni oti na neirau veivakatarogi, au a vakotora e buradelana na ligaqu ka vosa vakalougatataki koya. Ni se bera niu tekivu, au sa vakila na veivaqaqacotaki ni loloma kei na veivosoti ni iVakabula me baleti koya. Ni oti na veivakalougataki, keirau a veimarautaki ka sa sega ni madualaka na nona tagi.
Au qoroya na liga dauloloma ni iVakabula kei na nona lomani ira na veivutuni, se vakacava sara na ivalavala ca ka sa biu laivi tu mai. Au vakadinadinataka ni iVakabula ena tu vakarau ka na rawa ni vosota na ivalavala ca. Vakavo ga o ira na sa digitaka na ivalavala ca sega ni vosoti ni sa oti na nodra ciqoma na veika kece, e sega ni dua na ivalavala ca ena sega ni rawa me vosoti.15 Sa dua na ka talei ni rawa vei keda yadua meda vuki tani mai na ivalavala ca ka lesu vei Karisito. Na veivosoti vakalou sa dua na vua ni kosipeli totoka, ni kauta laivi na madua kei na mosi mai na yaloda ka vakaisosomitaka ena vakacegu kei na galala ni vakasama. A tukuna o Jisu, “Dou na sa sega li ni veivutunitaka na nomudou ivalavala ca ka saumaki ka lesu mai vei au meu vakabulai kemudou?”16
Eso e vakarorogo tiko nikua ena gadreva na “veisau levu [ni] yalodra”17 me ra vorata kina na ivalavala ca e bibi. Ena gadrevi kina na veivuke ni dua na iliuliu ni matabete. E lewe levu era na veivutuni lo toka ga ka cakava ga vakataki ira, ena nodra vakasaqara ena veisiga na veivuke ni Turaga ena veisau era gadreva tiko.
Vei ira e vuqa, na veivutuni e vaka e dua na ilakolako ka sega ni ka ga ni dua na gauna. E sega ni ka rawarawa. E bau dredre toka mo veisau. Ena vaka na saqata na matanicagi, se qalova cake na uciwai. A tukuna o Jisu,“Kevaka e dua sa via muri au, me kakua ni muria na lomana, ia me colata na nona kauveilatai; ka muri au.”18 Na veivutuni sa ikoya na vukitani mai na so na ka me vaka na cakacaka vakailawaki, dokadoka, cudrucudru, kei na vakasama dukadukali; ka vakanamata yani ki na veika me vaka na dauloloma, nanumi ira na tani, yalomalua, kei na bula vakayalo. O ya na “lesu tale” vua na Kalou.
Eda digitaka vakacava na vanua me vakanamata kina na noda veivutuni? Ni dua na noda daulomani se itokani e tukuna na veika meda veisautaka, ena sauma lesu na tamata vakayago e tiko vei keda ka kaya, “Oi o nanuma ni dodonu meu veisau? Sa vinaka, meu tukuna mada yani eso na leqa e tiko vei iko.” E vinaka cake mo cabora vua na Turaga ena vakarokoroko;“Tamaqu, na cava ko Ni gadreva meu cakava?” Na kena isau ena yaco mai. Eda na vakila na veisau e ganita me caka. Ena tukuna na Turaga ki na noda vakasama kei na yaloda.19
Sa na qai soli vei keda na galala meda digidigi: eda na veivutuni, se eda na dreta sobu na ilati ka tabonaka tiko na noda katuba ki lomalagi?
A veivunauci vakaoqo o Alama“ Mo kakua ni vakamatautaka na vakaiulubale.”20 Ni da “dreta sobu na ilati,” eda sa sega tiko ni vakabauta na domo vakayalo ka sureti keda tiko meda veisau. Eda masu tiko, ia e lailai sara na vakarorogo. E sega ni tiko ena noda masu na vakabauta e ganita me rawa ni kauti keda yani ki na veivutuni.21
E dua e tukuna sara tikoga ena gauna oqo, “Baraca Andersen o iko o sega ni kila. O na sega sara ni vakila na ka au a vakila. Sa ka dredre sara meu veisau.”
O sa dina sara, au sega sara ga ni na kila rawa. Ia, e tiko e Dua e kila vinaka. O Koya e kila. E vakila o Koya na nomu mosi. E kaya o Koya, “Au sa ceuti iko ena qeteqete ni ligaqu.”22 E tiko na iVakabula, e sa dodoka tu ga na ligana vei keda yadua, ka sureti keda tiko: “Dou lako mai vei au.”23 E rawa ni da veivutuni. E rawa!
Ni da sa kila na veika meda veisautaka, eda na osivaka na veika rarawa eda a vakavuna. Oqo ena tuberi keda yani ki na vakatutusa dina vua na Turaga ni da gadreva, ka vakakina vei ira na tani.24 Ni sa rawa, meda na vakalesuya tale na ka eda sa vakaleqa se taura mai.
Sa na tiki ni noda bula e veisiga na veivutuni. Na noda votai ena sakaramede ena veimacawa sa na ka bibi sara toka—meda lakova ena yalomalumalumu, ena yalomalua e matana na Turaga, ka vakadinadinataka na noda dau vakararavi Vua, ka kerei koya me vosota ka vakavoui keda ka yalataka ni da na dau nanumi koya tikoga.
Ena so na gauna ni noda veivutuni, ni da sasaga tiko e veisiga meda vaka na Karisito, eda qai kunea ni da sasagataka tiko na dredre vata sara ga. E vaka na cabeta tiko e dua na ulunivanua veikaukau, ka da sega ni raica rawa na noda itosotoso me yacova ni da sa yaco ki cake ka qai rai sobu mai na vanua cecere o ya. Kakua ni yalolailai. Kevaka ko sa sasaga ka cakacakataka tiko mo veisau ko sa veivutuni sara tikoga oqori.
Ni da sa vinaka cake mai, sa na qai matata mai na ituvaki ni bula, ka da vakila ni kaukauwa cake na cakacaka ni Yalo Tabu e lomada.
Ena so na gauna eda dau vakasamataka se cava eda nanuma lesu kina na noda cala ni sa makawa sara na kena biu laivi. Na cava na vuna eda se rarawataka tikoga kina na noda cakacala ena gauna eda sa veivutuni oti kina.
Ko ni na nanuma tiko e dua na italanoa nei Peresitedi James E. Faust. E vakaoqo, “Niu se gonetagane lailai mai na loga ni iteitei … au nanumi buqu sara … ni vakasaqara tiko na keitou kakana ena dua na sitovu buka katakata. Ni sa lala ga na kato ni buka ena yasa ni sitovu, sa dau taura ga o Buqu na kato ka lako yani ki tuba me laki vakatawa tale mai eso na sita ka laveta lesu mai na kato bibi o ya ki loma ni vale.”
Vaka me mamakeukeu na domoi Peresitedi Faust ena gauna o ya ka toso tale na italanoa: “Au sega mada ga ni bau yadrava … au dabe tu ga kau vakalaivi buqu lomani me laki yauta tiko mai tuba na buka. Au sa madua sara ga ka veivutunitaka na noqu [ivalavala ca ni] sega niu cakava, ena noqu bula taucoko. Au nuitaka ni dua na siga meu na qai kereya na nona veivosoti.”25
Sa oti oqo e 65 na yabaki. Kevaka me se nanuma tikoga o Peresitedi Faust ka veivutunitaka ni sega ni a vukei buna ena vica vata na yabaki oqori, sa dodonu li meda lialiaci baleta eso na ka eda dau nanuma ka veivutunitaka ia sa vaka me bera?
E sega ni tukuna na ivolanikalou ni da na guilecava na noda ivalavala ca ena bula oqo. Ia e kaya ga, ni Turaga ena guilecava.26
Ni sa biu laivi na caka cala e kena ibalebale ni sega ni lesuvi tale. Na biu laivi ena taura na gauna. Me vukei keda, ena dau vakatara na Turaga, ena so na gauna, me da dau vakananuma tu na ivovo ni noda caka cala.27 Oqori sa dua na iwase bibi ni ka meda vulica ena bula oqo.
Ni da sa vakatusa vakaidina na noda ivalavala ca, vakalesuya vei koya e vakacalai na ka eda rawata, ka tarova na noda ivalavala ca ena noda talairawarawa ki na ivunau, eda sa na rawa ni vosoti. Ni toso na gauna, eda na vakila ni sa na kasere mai na lomaocaoca ni rarawa, ka sa na kauta “tani na madua mai na yaloda”28 ka kauta mai na “vakacegu ni vakasama”29
Vei ira era sa veivutuni dina, ka se sega ga ni vakacegui, tomana tikoga na maroroya na ivunau. Au yalataka vei kemuni, ni na yaco mai na veivakacegui ena nona gauna na Turaga. Na veivakabulai ena taura toka e dua na gauna.
Kevaka mo nuiqawaqawa tiko, raica na nomu bisopi. E tiko vei bisopi na kaukauwa ni kila na ka me caka.30 O koya ena vukei iko.
E vakaroti keda na ivolanikalou: “Dou kakua ni lokuyarataka na gauna mo dou veivutuni kina!”31 Ia, ena bula oqo, e sega soti ni bibi na veivutuni bera.
Au a kerei ena dua na gauna meu sotava e dua na veiwatini qase ka rau sa lesu tale mai ki na Lotu. Rau a tuberi mai ena kosipeli mai vei rau nodrau itubutubu. Rau qai biuta na Lotu ni rau sa vakamau oti. Nikua, oti e 50 na yabaki, rau sa qai lesu mai. Au nanuma ni curu mai o tagane ka dreta voli mai e dua na taqe ni cagi (oxygen). Rau vakaraitaka nodrau rarawa ni rau a sega ni yalodina. Au tukuna vei rau na neimami marau ni rau sa lesu mai, ka vakadeitaki rau ena nona marautaka na Turaga ni veivutuni e dua. Kaya cake mai o tagane, “Keirau kila oqori Baraca Andersen. Ia na neirau rarawa e baleta ni o ira na luvei keirau kei na makubui keirau e sega vei ira na veivakalougatataki ni kosipeli. Keirau sa lesu mai, ia keirau lesu taurua ga mai.”
Erau sega ni lesu taurua mai. Sega walega ni veisautaki keda na veivutuni, ia e vakalougatataki ira noda matavuvale kei ira eda dau lomana. Ni da sa veivutuni ena yalodina, ena Nona ituvatuva na Turaga, ena sega walega ni maroroi keda na kena dodo mai na ligana na iVakabula, ia ena dodo talega yani vei ira na luveda kei ira na noda kawa. Na veivutuni e kena ibalebale ni sa waraki keda tu mai liu na bula marau.
Au vakadinadinataka ni noda iVakabula e rawa ni sereki keda mai na noda ivalavala ca. Au a vakila na kaukauwa ni Nona veivueti. Au a sa raica oti na Ligana dauloloma ni vakabulai ira e udolu vakaudolu ena veimatanitu e veiyasai vuravura. Au vakadinadinataka ni Nona isolisoli vakalou ena kauta laivi na madua mai na yaloda ka na vakaceguya na noda vakasama.
E lomani keda o Koya. Eda lewe ni Nona Lotu. E sureti keda yadua o Koya meda veivutuni, vuki tani mai na noda ivalavala ca, ka lako Vua. Au vakadinadinataka ni bula dina tiko o Koya, ena yaca i Jisu Karisito, emeni.