E Okati ena Koniferedi na Kacivaki ni Lima na Valetabu Vou

A dolava o Peresitedi Thomas S. Monson na ika 179 ni Koniferedi Raraba Vakayabaki ni Lotu, ka a vakayacori ena Vakarauwai kei na Sigatabu, 3 kei na 4 ni Okotova, 2009, ena nona kacivaka na veivanua ena tara kina e lima na valetabu vovou sa nakiti me na tara ena dua na gauna mai oqo, e Brigham City, Utah, Amerika; Concepción, Chile; Fortaleza, Brazil; Fort Lauderdale, Florida, Amerika; kei Sapporo, Japani.

Era vakaitavi ena koniferedi na lewenilotu e vuravura raraba ena 92 na vosa ena Vale ni Koniferedi ka vakakina ena retioyaloyalo, setilaiti, na Initaneti, kei na kakaburaki ena retio. Na katoni ni kakaburaki ena vakarautaki ena DVD kei na CD ka vakakina ena initaneti.

Na veivaletabu vovou sa kauta mai kina ki na 21 na iwiliwili ni valetabu sa kacivaki se sa tara tiko. Ni ra sa tara oti, na 21 na valetabu oqo sa na kauta mai ki na 151 na iwiliwili taucoko ni valetabu e vuravura raraba.

“Eda sa tomana tikoga na tara valetabu,” e kaya o Peresitedi Monson, “Keimami gadreva me lewe levu tikoga na lewenilotu me ra gole yani ki na valetabu ena sala e voleka sara vei ira ka sega ni sau levu.”

Na valetabu e Brigham City sa na kena ika 14 e Utah; e rua na valetabu, na Draper Utah kei na Oquirrh Mountain Utah Temples, erau a vakatabui ena itekivu ni yabaki oqo.

Ena gauna oqo e 14 na valetabu era sa vakayagataki tiko ena Ceva kei Amerika. Na valetabu e Concepción, e Chile, sa na kena ikarua e Chile.

Na valetabu mai Fortaleza, e Brazil, sa na kena ikavitu mai Brazil. A kacivaki ena Me ni 2007 e dua na valetabu mai Manaus, ka lima era sa vakayagataki tiko ena gauna oqo.

Ni sotava tiko na nodra gagadre na lewenilotu ena Ceva kei Florida vata kei na Bahamas, na valetabu e Fort Lauderdale, e Florida, sa na kena ikarua e Florida.

Na valetabu e Sapporo Japani sa na kena ikatolu ena vanua ko ya, taravi rau yani na Valetabu e Tokyo kei Fukuoka Japani.

E kaya o Peresitedi Monson ni 83 na pasede ni lewe ni Lotu era tiko ena loma ni 200 na maile (320 km) mai na dua na valetabu. “Ena tubu tikoga na iwiliwili vakapasede oqori ena noda tara valetabu vovou tiko e veiyasai vuravura,” e tomana ko koya.