Me na Mamada kina na Nomudou iColacola

Elder L. Whitney Clayton

Ena Mataveiliutaki ni Vitusagavulu

Na icolacola sa rawa kina me da vakatovotovotaka na ivakarau ni ivalavala dodonu ka na rawa kina ni yaco na vinaka sara.

Ena vuqa na yabaki sa oti au a taubaletaka tiko ena mataka lailai na veigaunisala qiqo veivatuvatu e Cusco, Peru, ena Veiulunivanua na Andes. Au raica sara e dua na turaga itaukei e kea ni taubale tiko mai ena dua na gaunisala. E sega soti ni turaga levu, ia a colata tiko e dua na icolacola buka levu tawai taga tu. E tautauvata ga kei koya na levu ni taga o ya. E rairai tautauvata na kena bibi kei na icolacola o ya. A vesuka vakavinaka toka ena dali ka buki toka e ra ka laki waviviga sara toka na uluna. A qai dreta kaukauwa toka o koya na dali e yasa ruarua ni uluna. A vesuka toka e dua na isulu e uluna ena ruku ni dali me kakua kina ni drakusi. A kala yani i liu ka taubale ka dredre na nona ikakalawa.

E colata tiko na buka oqo me laki volitaki ena makete. Ena veisiga yadua ena rawa ni kauta e rua se tolu na iusana ki taoni me laki volitaka na iusana bibi ka dredre vaka o ya.

Niu nanuma lesu na nona vakalairoro, ena nona sasaga yani e gaunisala o ya, sa mai balolo tu ni noqu vakanananu ena veiyabaki. Ena vakacava beka na balavu ni gauna me na colata tiko kina na icolacola vaka o ya?

Na bula oqo e vakataqara vei keda yadudua na veimataqali icolacola, eso e mamada ka so era bibi tu ga ena veigauna. Era sasagataka na tamata ena veisiga na nodra icolacola ka vakatovolei kina na nodra gugumatua. E vuqa vei keda era vakaogai ena icolacola vakaoqo. E dau rawa ni ra veivakayalobibitaki se veivakaogai vakayago. Era na dau rawa ni veivakalomaocaocataki, veivakacudrui, ka veivakaocai. Ka dau yaco me vakayabaki.

Ena kena vakasama raraba, e tolu na ivurevure ni noda icolacola. Eso na icolacola era vu ga mai na veituvaki ni bula eda sotava ena vuravura eda bula tiko kina oqo. Na tauvimate, na vakaleqai ni yago kei na cagilaba, kei na uneune ka ra dau yaco mai ena veigauna eso e sega ni bale vei keda. E rawa ni da vakavakarau ki na veika vakaoqo ena so na gauna eda rawa ni tukuna ni sa voleka mai, ia ena ivakarau tudei ni bula eda na dui sotava kece eso na bolebole vakaoqo.

Eso tale na icolacola eda vakacolati kina mai na nodra cala na tani. Na veivakacacani kei na veivakatotogani ena rawa ni vakacacana na vuvale ia e vanua vakalomalagi vei ira na lewe ni matavuvale era sega ni caka cala. Na ivalavala ca, na ivakarau sega ni dodonu, na vunivuni matua, kei na basulawa sa rawã e levu sara na tamata ena bula oqo. Eso sara mada ga na ivalavala sega ni dodonu me vaka na kakase kei na yaloca e rawa ni vakavu rarawa dina vei ira na tamata.

Na noda cala ga vakataki keda kei na luluqa eso e vakavuna e vuqa sara na leqa ka rawa ni vakataqara ki tabada na icolacola bibi. E dua vei ira na icolacola dredre duadua eda vakataqara vei keda sai koya na icolacola ni ivalavala ca. Eda sa kila taucoko na luluqa ni yalo kei na mosi ena dau yaco dina ga mai ni da sega ni muria na ivakaro.

Se cava ga na icolacola eda sotava ena bula oqo, na nodra itovo ca na tani, se na noda cala kei na malumalumu, eda sa luvena kece na Tamada Vakalomalagi dauloloma, ka biuti keda mai ki vuravura me tiki ni Nona ituvatuva tawamudu me baleta na noda torocake kei na tubu. Na veika totoka eda dui rawata ena rawa ni vukei keda me da vakarautaki keda meda lesu tale Vua. Na veika ca kei na veivakararawataki eda sotava, se cava ga na kena bibi, sa yaco me rai vakalomalagi, ni “sa lekaleka walega na [kena] gauna; ia kevaka [eda] sa vosota rawa, ena laveti [keda] cake na Kalou.”¹ E dodonu meda cakava na veika kecega me da vosota rawa “vakavinaka” na noda icolacola se cava ga na kena balavu ia “sa lekaleka walega” na noda na vosota tiko.

Na icolacola sa rawa kina me da vakatovotovotaka na ivakarau ni ivalavala dodonu ka na rawa kina ni yaco na vinaka sara. Era sureti keda tu na noda icolacola meda “vakarorogo ki na domo ni Yalo Tabu, ka [biuta] tani na itovo vakayago ka [yaco] me tamata yalosavasava ena vuku ni isoro i Karisito na Turaga, ia meda [vaka na] gone lailai, meda talairawarawa, yalomalua, yalomalumalumu, dauvosota, dauloloma, ka talairawarawa ki na veika kece sa lewa vua na Turaga, me vaka na gone sa talairawarawa vua na tamana.”² Sa yaco kina na icolacola oqo me veivakalougatataki, e dina ni dau tabogo tu na veivakalougatataki vakaoqo ka na gadrevi kina na gauna, sasaga, kei na vakabauta me ciqomi ka kilai vakavinaka kina. E va na ivakaraitaki ena rawa me vukea na kena vakamacalataki:

iMatai, a tukuni vei Atama ni sa “Cudruvi na qele ena vukumu,” na vanua me bula kina, ka na “kania na [kena] kakana ena buno ni [matana].”³ Sa dua na icolacola tudei na cakacaka, ia sa dua talega na veivakalougatataki tudei “ena [vukuda],” ni vakavulica vei keda na lesoni e da na vulica walega mai na “buno ni [matada].”
iKarua, sa kila o Alama ni ra “sa yalomalumalumu [na tamata dravudravua i Soramu] ena vuku ni veika rarawa era sotava era sa na vakabauta kina na vosa.”⁴ E vakuria, “Ia dou sa kalougata ni dou sa yalomalumalumu.”⁵Na ibolebole ni bula vakailavo sa rawa me vukea na noda vakarautaki me da rogoca na vosa ni Turaga.
iKatolu, me baleta ga ni “sa vuqa sara na yabaki na [nodra] veivaluvaluti,” e vuqa sara na Nifai kei na Leimani era “sa yalomalumalumu ena vuku ni veika era a sota kaya, ka ra sa vakamalumalumutaki ira vua na Kalou.”⁶ Na duidui vakapolitiki, na yakusurasura ni bula veimaliwai, na veilecayaki ni itovo vakavanua, ka vakakina ena so na vanua e vuravura, ni rawa me ra vakayalomalumalumutaki keda na daubutako i Ketianitoni ka vakauqeti keda me da vakasaqara na ivakaruru vakalomalagi mai na cava ni bula vakatamata.
iKava, a tukuni vei Josefa Simici ni veika ni veivakararawataki a sotava ena veiyabaki eso, mai vei ira na kena meca ena “kalougata vakalevu o [koya], kevaka … [me na] vosota.”⁷ Na veivakararawataki eda sotava ena vuku ni nodra vakacudrui keda na tani e yaga vei keda ka dina ga ni ivakavuvuli rarawa me vakavinakataki cake kina na noda ivakarau.

Kena ikuri, na noda gumatuataka na noda icolacola ena vakavuna e lomada e dua na ivurevure ni veinanumi me baleta na nodra leqa na tani. E vakavuvulitaka o Paula na iApositolo ni dodonu talega meda “veivuke … ni colata na [noda] icolacola ka [meda] vakayacora kina na vunau i Karisito.”⁸ E vakavulica kina vei keda na noda veiyalayalati ni papitaiso meda ”veivuketaka na [noda] icolacola me mamada kina; io ni sa lomamudou [mo dou] tagi vata kei ira sa tagi, ka vakacegui ira sa rarawa.”⁹

Ni da maroroya tiko na noda veiyalayalati ni papitaiso ena veivuke ena kena vakamamadataki na noda icolacola ka vakakina vei ira eda qarava era vakaicolacola tu vakayalo.¹⁰ O ira era veivuke vakaoqo ena vukudra na tani era sa tu ena vanua tabu. Ena nona ivakamacala, a vakavulica vakaoqo na iVakabula:

“Keimami a raici kemuni mada ninaica ni kemuni a viakana, ka vakani kemuni? Se viagunu, ka vagunuvi kemuni?

“Keimami a raici kemuni ninaica ni kemuni a vulagi, ka kauti kemuni ki vale? Se luvawale, ka vakasulumi kemuni?

“Se keimami a raici kemuni ninaica ni kemuni a tauvimate, se tiko e valeniveivesu, ka lako vei kemuni?

“Ena qai vosa na Tui ka kaya vei ira, Au sa kaya vakaidina vei kemuni, Ni kemuni a cakava vua e dua sa lailai vei ira na wekaqu oqo, ni a cakava vei au.”¹¹

Ena veika kece oqo, sa solia vei keda na iVakabula na veivakaukauwataki kei na veitokoni, ena Nona gauna kei na kena sala, sa vakabulai keda kina o Koya. Ena gauna eratou a dro bula mai o Alama kei ira na nona itokani mai na mataivalu nei Noa na Tui, eratou a laki tauyavutaka sara e dua na itikotiko o Ilami, na yacana. Era sa tekivu teivaka na qele, tara vale, vakatubukawa ka ra gugumatua.¹² E vakidacala ga, a vesuki ira e dua na mataivalu nei Leimani, ia “a qai vakabulai ira ga na Turaga na nodra Kalou.”¹³ Ia na veivakabulai o ya, a sega ni yaco totolo mai.

O ira na kedra meca era sa qai “vakayacora ga na [nodra] lewa ka vakacakacakataki ira vakaukauwa.”¹⁴ E dina ga era a vakarerei ke ra masu era na vakamatei,¹⁵ ia o Alama kei ira na nona tamata era sa qai “tagi vakaidina vua [na Kalou] na yalodra; ka sa kila ko Koya na gagadre ni yalodra.”¹⁶ Ena vuku ga ni nodra caka vinaka ka talairawarawa ki na nodra veiyalayalati ni papitaiso,¹⁷ a vakaituvatuva tiko na nodra vakabulai. A kaya vei ira na Turaga:

“Au na … vakamamadataka na i colacola dou sa vakacolati kina, mo dou kakua ni vakila ni dou sa colata ena nomudou tiko vakabobula; ia au na kitaka oqo mo dou kila vakaidina kina ni sai au na Turaga na Kalou, kau sa dau talevi ira na noqu tamata era sa vakararawataki.

“A sa vakamamadataki kece na i colacola sa vakataqari vei Alama kei ira na wekana; a sa vakaukauwataki ira na Turaga me ra colata rawa na nodra icolacola, ka ra soli ira ena yalomarau kei na yalovosota ki na nona lewa na Turaga.

“Ia ena levu ni nodra vakabauta kei na vosota, sa rogo tale kina vei ira na domo ni Turaga ka kaya: Dou vakacegu ena mataka au na vakabulai kemudou kina mai na nomudou vakabobulataki.”¹⁸

Ena loloma veivueti, sa solia kina vei keda na Luve ni Kalou na veisereki mai na veivakabobulataki ni noda ivalavala ca, sai koya e dua vei ira na icolacola bibi duadua eda colata voli. Ena Nona Veisorovaki e a vakararawataki o Koya, “ia ena vosota e colata kina na nodra ivalavala ca na Nona tamata, ia ena bokoci na nodra ivalavala ca ena Nona isoro.”¹⁹ Na Karisito “a vosota oti na veika oqo, me ra bula kina ko ira sa veivutuni.”²⁰ Ni da sa veivutuni ka muria na ivunau, sa na yaco mai na veisereki ki na lomada bikai ena veivuke ka rawa ni solia duadua ga na iVakabula, ni o “koya sa veivutuni ena lomani vakaidina.”²¹

Au nanuma lesu na turaga o ya e Peru, ena nona vakalakala toka ka segata ena nona igu me colata na taga buka bibi e dakuna. Vei au, o koya e keda ivakatakarakara kece ni da oga voli ena icolacola ni bula oqo. Au kila ni gauna eda muria kina na ivunau ni Kalou kei na noda veiyalayalati, ena veivuke mai ki na noda icolacola. Ena vakaukauwataki keda o Koya. Ni da veivutuni, ena vosoti keda ka vakalougatataki keda meda yalo vakacegu ka marau.²² Meda sa qai bula ka marautaka tiko ena vosota na veika kecega sa lewa vei keda na Turaga, sa noqu masu ena yaca i Jisu Karisito, emeni.