Taura Matua

Ann M. Dibb

iKarua ni Daunivakasala ena Mataveiliutaki Raraba ni Goneyalewa

Ena vica na yabaki sa oti, a dreta na mataqu e dua na itukutuku lekaleka ena neitou niusipepa, kau se nanuma vinaka tikoga oqo. “Era a mate e va na tamata ka ratou vueti rawa e lewe vitu na tamata cakacaka ni oti na nodratou tautauri toka me sivia e dua na auwa ena ruku ni dua na wavu 125 na fute [38-m] na kena cecere e St. Catharines, Ontario, [Canada,] ni oti na kena kasura na ikabakaba eratou a cakacaka tiko kina” (“News Capsules,” Deseret News, 9 ni June, 1993, A2).

Au a kurabuitaka, kau se kurabuitaka tikoga na italanoa lekaleka oqo. Ni oti ga vakalailai noqu wilika na itukutuku oqo, au a qiria e dua na neitou itokani ka vakaitikotiko e St. Catharines. E vakamacalataka ni ra a cakacaka tiko na tamata ka ra boroya tiko na wavu na Garden City Skyway ena dua na yabaki ka sa vo tiko e rua na macawa me vakaoti kina sa yaco na vakacalaka oqo. Ni oti na vakacalaka, era tarogi na vakailesilesi se cava e sega tu kina na nodra iyaya itataqomaki ni leqa na tamata cakacaka oqo. Na kena isau e rawarawa walega: e tu nodra iyaya ni itataqomaki ia era a sega ga ni via daramaka. Ni sa kasura na ikabakaba, era a qai tautauri toka o ira na bula ena dua na ucu ni kaukamea dua na idi (2.5cm) ka tucake tu ena dua na ucu ni kaukamea walu na idi (20-cm) me sivia e dua na auwa me yacova ni ra sa yaco yani na dauveivueti. A kaya e dua a bula mai kina ni gauna a tautauri tu kina ena wavu, a vakananuma vakalevu nona matavuvale. E kaya, “Au sa vakavinavinaka vua na Turaga niu tu eke nikua… . Sa vakadomobula dina, au kaya vei kemuni” (ena Rick Bogacz, “Skyway Horror,” Standard, 9 ni June, 1993).

E vuqa sara na lesoni me vulici ka veidutaitaki vata mai na ka oqo. Ena levu vei keda era na sega ni sotava, na mataqali ituvaki ni bula vakadomobula vakaoqo ena noda dui bula vakayadua.

E rawa me da vakila noda tatauri tu ena dua na ka me vaka e dua na ucu ni kaukamea dua na idi. E sega ni rawarawa noda vakatovolei vakayago, ka sega talega ni lekaleka. Eda sa vakalougatataki noda lako mai ena vuravura oqo ka rawata na bula vakayago. Na bula oqo sa ikoya noda gauna donu me da vakadeitaka ka vakayagataka kina noda galala ni digidigi (raica Eparaama 3:25). E rawa me da digitaka me da muria na yavu ni veivakabulai tawamudu nei Tamada Vakalomalagi (raica Jeromi 1:2; Alama 42:5; Mosese 6:62) kei na veivueti (raica Jekope 6:8; Alama 12:25; 42:11) se e rawa ni da tovolea me da vakasaqara noda dui gaunisala.. E rawa me da talairawarawa ka rokova Nona ivunau, se e rawa ni da besetaka ka sotava na kena isau ka na salamuria vakaidina mai.

Ena vuku ni ka oqo, o ikeda talega e tu e dua na ivakamacala ni noda cakacaka vakarerevaki kei na itavi. E dodonu me da qarava na veibolebole. Eda na vakila na galili, na ca ni noda veiwekani, cakitaki na veivakabauti, veivakatovolei, vevakatotogani, yalani na noda kaukauwa vakayago se yali na cakacaka ka gadrevi vakalevu. Eda na bolei beka ena yalo ca baleta ni sega ni yaco mai ena gauna eda vinakata kina na noda vakanuinui kei na tatadra dodonu. Eda na vakataroga beka na noda kaukauwa ni rawaka ka rerevaka na noda sega ni rawata na veika e namaki vei keda, ena noda ilesilesi sara mada ga ena Lotu kei na matavuvale. Na veibolebole kei na veika rerevaki eda bula kaya nikua, ka okati kina na kena sa ciqomi tu ena noda veitikotiko na ivalavala ca, ka ra sa yalataka tu na veiparofita ni gauna e liu kei ira era bula tiko nikua. Era sa rerevaki ka sega ni dei ka rawa ni yaco dina me vaka ga na lutu ki na mate mai na dua na wavu 125 na fiti (38 m) na kena cecere.

E sega ni sa vinaka sara na noqu bula. Au dau sotava e vuqa sara na bolebole. Eda sotava kece. Au kila ni veivakatovolei ni meca kei na dredre ni bula vakavuravura era na tu ga e veigauna taucoko ka vakasosani keda vakayadua. Au duavata kei na tamata cakacaka ka a vueti bula ena ka vakadomobula a sotava ena nona tautauri toka ena kaukamea ko ya: “E [sa] vakarerevaki dina, meu kaya vei kemuni.”

Sa ka bibi me da kila, ena ivolanikalou e vica wale sara na italanoa ni tamata ka ra bula marau tu ga ka ra sega ni sotava e dua na kena veisaqasaqa. Eda na vuli ka tubu ena noda vakamalumalumutaka na bolebole ena vakabauta, sega ni guce, ka vakakina ena buladodonu. Au sa vakaukauwataki ena nona dau yalodei tikoga o Peresitedi Thomas S. Monson vua na Tamada Vakalomalagi ka vakakina vei keda. A kaya o koya, “Nanuma ni nomu na nona veivakalougatataki na Tamada [Vakalomalagi] ena vuku ni cakacaka oqo. A sega ni kacivi iko o Koya ki na nomu itutu dokai oqori mo lakova duadua, sega kina na veidusimaki, ka vakararavi ki na kalougata. Na kena veibasai, e kila o Koya na nomu maqosa, sa raica o Koya na nomu yalodina, ka na veisautaka o Koya na malumalumu o nanuma ni tu vei iko ki na kaukauwa ena laurai ka kilai. A yalataka o Koya; ‘Au na duri tu e matamuni. Au na tu e ligamuni imatau kei na ligamuni imawi, kei na Yaloqu ena tu e yalomuni, ka ra na vakavolivoliti kemuni na noqu agilosi, me tokoni kemuni’ (“Sugar Beets and the Worth of a Soul,” Liahona, Jiulai 2009, 3–4).

E sega ni biuti keda duadua tu na Tamada Vakalomalagi ena bula vakatovotovo oqo. Sa solia oti tu vei keda na “iyaya ni tataqomaki” kece sara ni leqa eda na gadreva me da na lesu bula yani kina Vua. Sa solia tu vei keda o Koya na masu yadua, na ivolanikalou, o ira na parofita bula, kei na Yalo Tabu me tuberi keda. Ena so na gauna, ni da vakayagataka na iyaya oqo eda na vakaicolacolataki, logaloga ca ka sega ni toso vata kina kei gauna. Na kena vakayagataki vakadodonu e gadrevi kina na gugumatua, talairawarawa, kei na sega ni guce. O au, e dua, au digitaka meu dau vakayagataka. Sa dodonu vei keda me da digitaka kece me da vakayagataka.

Ena ivolanikalou, eda vulica kina e dua tale na iyaya bibi ni veitaqomaki—e dua na “ititoko kaukamea.” Era sa sureti na tisaipeli ni noda iVakabula, o Jisu Karisito me ra tautauri matua ena ititoko kaukamea oqo me rawa kina ni ra raica na nodra gaunisala ki na bula tawamudu. Au tukuna tiko na raivotu nei Liai me baleta na vunikau ni bula me vaka e tu ena iVola i Momani.

Ena ivakatakila yadua vakalou, a dui vakaraitaki kina vei Liai na parofita ni iVola i Momani kei Nifai na luvena, e dua na raivotu me baleta na keda ituvaki vakatovotovo oqo kei na veika rerevaki e salavata kaya. E kaya o Liai, “A sa tubu e dua na butobuto loaloa; era sa butu seva kina ko ira era sa tekivu muria mai na sala, era sa lako sese ka yali yani” (1 Nifai 8:23). Ia “a raica [talega] ko koya ni ra sasaga tikoga mai na lewe vuqa; era sa lako yani ka tautauri matua tiko ena ititoko kaukamea [oqori], me yacova ni ra sa yaco yani ka kania na vuanikau,” kena ibalebale na vunikau ni bula (1 Nifai 15:24).

Ena tadra nei Liai, eda vulica kina ni dodonu me da na taura matua na itautauri ni veitaqomaki oqo—na ititoko kaukamea oqo, ka kunei ni davo ravita na noda dui sala qiqo ka rabailailai—ka taura matua toka me yacova ni da sa basika ki na noda ulu ni sasaga, na bula tawamudu vata kei na Tamada Vakalomalagi. A yalataka o Nifai ni o ira era tautauri matua ki na ititoko kaukaumea “era na sega ni rusa; ena sega talega ni rawai koya na vere kei na gasau vidi ni ca me vakamatabokotaki koya ka kauti koya yani ki na veivakarusai” (1 Nifai 15:24).

Au sureti kemuni mo ni wilika tale na itukutuku taucoko ni raivotu veivakauqeti oqo. Vulica ka vakasamataka vakatitobu, ka vakayagataka ki na nomu bula e veisiga. Ena vosa ni gauna oqo, eda na kaya beka ni da sa sureti me da “taura matua.” E dodonu me da na taura matua na ititoko kaukamea ka kakua ni laiva.

O Peresitedi Harold B. Lee, na parofita ena gauna au se yabaki tini vakacaca kina, a vakatavulica, “Kevaka e dua na ka e gadrevi vakalevu sara ena gauna oqo mai na yavavala kei na veivakacudrui, ena gauna vata ni nodra vakasaqara vagumatua tiko kina na turaga kei na marama kei ira na itabagone kei ira na uabula na iwali ni veileqa era vakararawataki kina na tamata, sa ikoya na ‘ititoko kaukamea’ me vaka e dua na itataqomaki ki na sala dodonu ni bula tawamudu, ena kedra maliwa na veigaunisala dua tani ka veiveveyaki ka na rawa me veiliutaki ki na veivakarusai kei na vakacacani ni veika kece sara ena ivalavala dodonu, totoka, se ena itukutuku vinaka’ ” (“The Iron Rod,” Ensign, June 1971, 7).

Na vosa oqo e yaga sara ga ena noqu a se yabaki tini vakacaca, ka rairai yaga vakalevu cake sara nikua. Na nodra vosa na parofita e veivakasalataki, veivakavulici, ka vakayaloqaqataka na dina, kevaka era a cavuti ena 600 B.K., 1971, se 2009. Au vakayaloqaqataki kemuni mo ni rogoca, vakabauta, ka cakacakataka na vosa veivakauqeti mai vei ira eda a tokona me ra parofita, daurairai, ka ra dauvakatakila.

E sega ni dau rawarawa na tautauri matua ki na ititoko kaukamea. E rawa ni da laiva ena vuku ni nodra veivakasaurarataki na noda icaba se ena qaciqacia, ka da nanuma ni da rawa ni raica lesu na noda gaunisala—ena dua na gauna e muri. Ni da cakava, eda sa biuta tu mai na noda iyaya ni tataqomaki. Ena raivotu nei Liai a raica e lewe vuqa ena nodra laiva na ititoko kaukamea. E kaya o Nifai,“Ka lewevuqa sa sega ni raici ira rawa ko koya, ni ra sa lako ena sala tani” (1 Nifai 8:32). Ena veigauna dredre ni noda bula, eda na raica beka ni da sa “lako tale tikoga ena sala tani.” Au vakadeitaka tiko vei kemuni ni veigauna kece ena rawa tikoga vei keda me da kunea noda gaunisala ni lesutale. Ena veivutuni, ka rawa ena isoro ni veivakaduavatataki ni noda iVakabula, o Jisu Karisito, sa rawa kina vei keda me da rawata tale ka yalataki keda tale me da taura matua na ititoko kaukamea ka vakila na veituberi loloma ni Tamada Vakalomalagi. Sa veisureti raraba tu vei keda na iVakabula: veivutuni, taura matua, kakua ni laiva.

O au, me vakataki Nifai, au vakauqeti kemuni ena igu kece ni yaloqu mo ni “vakabauta na vosa ni Kalou ka muria na nona ivakaro ena veika kecega” (1 Nifai 15:25). Vakayagataka na iyaya ni veitaqomaki sa vakarautaka vei kemuni o Koya. Taura matua, ka vakabauta ni na vakalougatataki kemuni na Tamada Vakalomalagi ena nomuni gugumatua.

Au kila ni dina na kosipeli sa vakalesuimai, au kila ni da liutaki tiko mai vua na parofita bula ni Kalou, o Peresitedi Thomas S. Monson. Sa noqu galala dokai ka veivakalougatataki meu luvena yalewa. Au lomani rau vakalevu sara na noqu itubutubu.

Ena dua na bogi au a via yalolailai ka kaya, “Isa, Ta, na veivakalougatataki eda sotava vakalewe ni Lotu kei na veivakalougatataki yalataki ni valetabu era sa rui talei, kevaka walega eda na malele yani ka digitaka me da ciqomi ira”. A sega ni vakataratutu ena nona sauma mai, “Ann, sai ira kece sara ga oqori.”

Me da taura matua na dina tawamudu ni kosipeli i Jisu Karisito baleta ni tu kina na veika kece, oqori na noqu masu dina, ena yaca i Jisu Karisito, emeni.