Nodra Vukei na Tani Me Ra Vakila na Vakasolokakana ni Yalotabu

Vicki F. Matsumori

iKarua ni Daunivakasala ena Mataveiliutaki Raraba ni Lalai

E rawa meda vukei ira na tani me yaco me ra kila vakalevu cake na veivakauqeti ni Yalo Tabu ni da wasea noda ivakadinadina ena veivakayarayarataki ni Yalo Tabu ena noda bula.

Ni mai cava e dua na siga, ena nodrau sa gole yani ki vale na daukaulotu a vuki vakasauri mai e dua vei rau kivei kena ikarua ka kaya, “Au vakila ni gadrevi me daru gole mada ki na vanua oqo me kena iotioti.” E dua na dauveituberi ni matavuvale a vakauqeti me qiria e dua vei ira na matavuvale a sikova ena vica na siga sa oti. E dua na goneyalewa a nakita tiko me lako ki na dua na soqo ni marau ni nona itokani vakavuli ia e a vakauqeti me tiko ga e vale ena gauna oqo.

Erau kila vakacava na daukaulotu me rau tukituki ena dua na katuba ni dua na tamata a dau masulaki rau tiko? se me dua na dauveituberi ni matavuvale me qiria e dua na matavuvale a gadreva vakalevu na veivuke? se me dua na goneyalewa me kua ni tiko ena vanua e rawa me vakawaleni kina na kena yaga? Na veika sa yaco oqo era sa dusimaki mai ena veivakayarayarataki ni Yalo Tabu.

Na veika vata ga a sotavi oqo e sa dau yaco tiko vakawasoma kivei ira na lewenilotu e vuravura raraba, ka sa tu eso era gadreva me ra vakila na Yalotabu me dusimaki ira tiko ena nodra bula ni veisiga yadua. Ena nodra rawa ni vulica na tamata yadua me ra kila na vakasolokakana ni Yalotabu, sa rawa me vakarawarawataki na icakacaka ni vuli o ya ena nodra vukei keda o ira na tani meda kila na veika me baleta na Yalo Tabu, nodra wasea nodra ivakadinadina vakayadudua, ka vakarautaki na vanua e rawa me vakilai kina na Yalotabu.

Kilai ni Vunau

Na bibi ni nodra vukei na tani me ra kila e sa vakamacalataki tu ena Vunau kei na Veiyalayalati. Ko ira na itubutubu “mai Saioni, se ena dua na iteki sa tauyavutaki tu” me ra vakavulici ira na luvedra me ra “kila na ivunau.”¹

Se da tiko ena dua na loma ni rumu ni vuli, dua na veituberi kei na daukaulotu, se dua na lotu vakamatavuvale, na kena vakatavulici na ivunau me baleta na Yalo Tabu ena rawa ni vukei ira na tamata me ra kila na isolisoli bibi oqo. Eda vulica ni “sa soli vei ira na tamata kecega na Yalo i Karisito, me ra kila kina na vinaka mai na ca,”² na dodonu me dua e veitokani tikoga kina kei na Yalo Tabu e dau yaco ni sa soli vei ira na lewenilotu na isolisoli oqori ena veitabaki ni liga mai vei ira ka tu vei ira na kaukauwa.³

Na veitokani vata oqo e rawa me da taukena tikoga kevaka eda kilikili tiko. E tukuni vei keda ni “sa laivi ira na Yalo ni Turaga ni sa sega ni dautiko ko Koya ena vale dukadukali”⁴ kei na noda “qarauna me savasava tikoga na [noda] vakanananu; ena … sala vata voli ga kei [keda] na Yalo Tabu.”⁵

E vakatavulica na ivolanikalou kei ira na parofita na veika eda vakila ena veitokani tikoga vakaoqo. E kaya vei keda na Turaga,“Raica ena vakatakila vei iko na Yalo Tabu; io ena lako yani vei iko ko koya ka tukutuku sara ki lomamu.”⁶Kaya o Inosi, “Ia niu sa … masu tiko ena yaloqu taucoko sa rogo tale mai na domo ni Turaga.”⁷Kaya o Josefa Simici, “Me vaka nomu vakila na vuku savasava ni drodrovi iko yani, sa na rawa ni vakavotuya vei iko na veivakasama… .”⁸E vakamacalataka o Peresitedi Henry B. Eyring na veivakayarayarataki ni Yalo Tabu me “yalovakacegu, inuinui kei na reki… .” E tomana, “Vakawasoma e veigauna au vakila talega e dua na ue ni rarama.”⁹

Na kena ivakamacala talei duadua vei au, e lako mai vua e dua na gonetagane yabaki walu ka se qai ciqoma ga na Yalo Tabu. A kaya, “E vaka na rarama ni siga.”

Wasei ni iVakadinadina Vakayadua

Ia, e sega ni dau rawarawa e veigauna na vakamacalataka taumada na “rarama ni siga” oqo. E tukuna vei keda na iVola i Momani baleti ira eso na Leimani yalodina ka ra “papitaisotaki ena bukawaqa kei na Yalo Tabu, ia era a sega ga ni kila.”¹⁰

E rawa meda vukei ira na tani me yaco me ra kila vakalevu cake na veivakauqeti ni Yalo Tabu ni da wasea noda ivakadinadina ena veivakayarayarataki ni Yalo Tabu ena noda bula. Nanuma tiko ni so na veika e sotavi e sa rui ka tabu me tukuni. Ia, na wasei ni ivakadinadina ni Yalotabu ena noda bula, o ira e sega ni matau vei ira na veivakauqeti oqo era na kila na gauna era na vakila kina na veika vata ga oqo.

O au na imatai ni lewenilotu ena noqu matavuvale. Niu sa yabaki walu, au a vinakata meu vakila e dua na ka duatani baleta niu sa papitaiso. Meu kaya vakadodonu, na ka walega au vakila ena noqu sa lamata mai wai sa ikoya … niu sa suasua. Au nanuma ga de so na ka vakaitamera ena yaco ena noqu sa vakadeitaki. Ia, niu sa ciqoma oti na Yalo Tabu, au sa marau tale ia e dina ni sega na kedrau duidui mai na kena a yaco ena vica na miniti e liu.

Me yacova sara na siga ka tarava ena soqoni ni lolo kei na ivakadinadina niu sa qai sotava na veika au vakila ena gauna oqo me veivakayarayarataki ni Yalo Tabu. E dua na itokani turaga a tucake ka wasea na nona ivakadinadina ka tukuna baleta na veivakalougatataki ena nona lewena na Lotu. Au vakila niu luvuci ena dua na katakata. Au se qai yabaki walu mada ga, au a sa kila ni oqo e dua na ka duatani. Au vakila na yalovakacegu e curumi au ka duatani noqu vakila ni taleitaki au na Tamada Vakalomalagi.

Vakarautaka e dua na Vanua Me Rawa Ni Vakilai kina na Yalotabu

Era tu na veivanua e rawarawa cake me vakilai kina na Yalotabu. Na soqoni ni soli ivakadinadina kei na koniferedi raraba sa ikoya eso na vanua vakaoqori. Sa dina sara na veivaletabu eso tale vei ira. Na bolebole vei keda vakayadudua sa ikoya na vakarautaki ni vanua e rawa me vakilai kina na Yalotabu ena veisiga yadua ena noda vuvale kei na lotu vakamacawa.

E dua na vuna eda vakauqeti kina meda masu ka wilika na ivolanikalou ena veisiga yadua sa ikoya ni o rau na itaviqaravi oqo e sureta na Yalotabu ki na noda veilomanivale kei na nodra bula na lewe ni noda matavuvale.

Baleta ni sa dau vakamacalataki vakawasoma ni Yalotabu me dua na domo lailai,¹¹e sa rui ka bibi talega me dua na gauna ni vakadirorogo ena noda bula. Sa vakasalataki keda na Turaga “mo dou tiko lo, mo dou kila niu sa Kalou.”¹²Kevaka eda vakarautaka e dua na gauna ni vakadirorogo ena veisiga yadua ena noda sega ni vakasosani ena retioyaloyalo, kompiuta, qito ni vidio, se iyaya vakalivaliva, eda vakatara ki na domo lailai oqori e dua na gauna donu me vakarautaka na ivakatakila vakayadua kei na vakasolokakana kamikamica ni veidusimaki, veivakadeitaki, ka vakacegui keda.

Vakakina na noda rawa ni vakarautaka e dua na vanua e valenilotu me vakatara na Yalotabu me solia na veivakadeitaki vakalou ena veika sa vakatavulici. O ira na qasenivuli kei na veiliutaki era cakava e levu cake na ka mai na vakatavulici ni veilesoni se na veiliutaki ena veisoqoni. Era vakarawarawataka na vakasolokakana ni Yalotabu kivei ira yadudua na lewenilotu. E kaya o Elder Richard G. Scott, “Ke sega ni dua na ka o rawata rawa ena nomu veimaliwai kei ira nomu lewenikalasi, ka o vukei ira rawa ga me ra kila ka vakamuria na veivakauqeti ni Yalo Tabu, o na vakalougatataka sara vakalevu ka tawamudu talega na nodra dui bula ”¹³

E dua na qasenivuli ni Matanisiga (Sunbeam) e ologi ira vakayadudua nona lewenikalasi ena dua na itutuvi me vakatavulici ira ena nona vakila na Yalo Tabu ni tautauvata kei na vakacegu kei na veitaqomaki ni veiologi o ya. E a rogoca talega na lesoni e dua na tina a veisiko yani.

Ni oti e vuqa na vula a vakavinavinakataki qasenivuli na tina o ya. E kaya ni a sa luluqa tu ena lotu ena nona a tomani luvena yalewa gone yani ki na Lalai. Vica na macawa ni oti na lesoni, e a vakalutu o tinanigone. Na gauna e rarawa vakalevu sara tu ga kina a vakila vakasauri e dua na ituvaki cecere kei na yalo vakacegu. E vakila ni vaka e dua e tutuvitaki koya ena dua na itutuvi katakata. E kidava na veivakadeitaki ni Yalo Tabu ka kila ni Tamada Vakalomalagi e kilai koya ka lomani koya.

Ena gauna eda sa kila kina na vakasolokakana ni Yalotabu, ena rawa meda rogoci Koya ni vakatavulica vei keda “na veika kecega ni noqu matanitu”¹⁴ kei “na veika kece [meda] kitaka.”¹⁵Eda na kila na isau ni noda masu, ka taucoko sara mai na noda bulataka na kosipeli ena veisiga yadua. Eda na dusimaki ka taqomaki. Ka rawa vei keda meda cakacakataka na isolisoli oqo ena noda bula ena noda muria na veivakauqeti vakayalo oqori. Na kena e bibi duadua, eda na vakilai Koya ni sa ivakadinadina ni Tamada kei na Luvena.¹⁶

Ena noqu se goneyalewa kau a tiko ena koniferedi ni itabagone, au vakila ni sa tukutuku vei au na Yalotabu ni sa ka dina na kosipeli vakalesuimai. Ena vakavakarau ni dua na soqoni ni ivakadinadina, keimami a lagata “Na Yalo Ni Noda Kalou.” Au a sa dau lagata vakavuqa na sere ni lotu oqori ena soqoni ni sakaramede. Ia ena gauna oqo, ni voleka mai na kena itekitekivu, au vakila na Yalo Tabu. Ena gauna keimami sa lagata kina “na veika dokai sa qai roro tu mai,”¹⁷Au kila ni sega walega ni totoka na qaqa ni sere; ia era veika dina totoka.

E vakadeitaka vei au na Yalo Tabu ni bula tiko na Kalou na Tamada. E lomani keda vakayadua. E kilai keda yadudua vakavinaka. E rogoca tu na tagi ni lomada, ka sauma mai o Koya na masumasu ena yalodina oqori.

O Jisu Karisito na noda iVakabula ka Dauveivueti. A lako mai ki vuravura ena taucoko ni gauna me sorovaka na noda ivalavala ca. Ena lesu tale mai o Koya. Na veika oqo kei na veika kece tale ni kosipeli sa buli mai kina na noqu ivakadinadina era dei tu e yaloqu ena vuku ni veivakayarayarataki ni Yalo Tabu. Ena yaca i Jisu Karisito, emeni.