Vakalougatataki na Lewenilotu ena Vuku ni Vakabauta ena Gauna ni Leqa Vakasauri

O ira na Yalododonu Edaidai e Samoa, ka ra a sotava na vakacaca levu mai na dua na uneune kei na kena ualoka, era a biuta vakatikitiki mada na leqa vakatamata yadua kei na leqa vakamatavuvale ni veika ni bula vakayago me rawa ni ra sotava kina na veika e gadrevi vakayalo ena gauna ni koniferedi raraba.

A yaco na uneune 8.0 na kena kaukauwa oqo rauta ni 120 na maile (190 km) ena ceva-i-cake kei Apia, e Samoa, ena ika 29 ni Sepiteba, 2009—ni vo ga e vica na siga me yaco na koniferedi raraba. Na uneune kei na kena ualoka e sala vata kaya mai—e va na ua e rauta ni 15 na fiti (5 na mita) na kena cere—a vakamatei ira e sivia ni 180 na tamata ena Pasivika, oqo era kai Samoa taucoko, ka vakavo ga eratou lewe 9.

E dina ni tu na leqa vakasauri oqo, ka ra mate kina e 26 na lewenilotu ke lailai, kei na sasaga ni vakacoko e tarava mai, era a vakalougatataki vakalevu sara na Yalododonu Edaidai ena nodra raica na gauna me ra vakaitavi kina ena koniferedi raraba ena retio, retioyaloyalo, se setilaiti.

Ko Eni F. H. Faleomavaega, e dua na lewe ni Lotu ka mata nei Samoa qali vaka-Amerika ki na Matabose ni Vanua ko Amerika, e kaya ni ra rawata na Yalododonu na kaukauwa ena nodra vakaitavi ena koniferedi ena loma ni gauna ni leqa. “E kauta mai e dua na yalo ni veivakadeitaki na nodra vakarorogo vua na parofita … ena loma ni gauna ni bula kei na mate,” e a kaya.

Na nodra rawa ni ciqoma na lewenilotu na veivakadeitaki oqo mai vei ira na parofita ni gauna oqo ena nodra vosa dina, sa vakavinavinakataki kina vakalevu sara na nodra igu na dauvakadewa vosa ka ra a sotava tale tu ga na veika dredre ena leqa vakasauri oqo.

Ni se qai kena imatai ni gauna me lesi kina vei ira me ra vakavakadewa bula mai na veiyanuyanu ka sega mai Salt Lake City, a soli vei iratou na timi ni vakavakadewa me ratou digidigi ni oti na kena yaco na leqa vakasauri. A rawa me ratou solia lesu ki Salt Lake City na vakavakadewa ni sa vo lailai sara na kena gauna ka lako me veivuke ena leqa era sotava tu na nodratou itokani kei na matavuvale era sotava vakaca sara na revurevu ni uneune, se me ratou qarava ga na nodratou itavi.

E kaya o Aliitasi Talataina, na supavaisa ni vakavakadewa ka dau raica talega na vakadewa vosa, ni vakauqeti ni ra sa lewe levu tu e rawa ni ra veivuke ki na nodra gagadre vakayago na tamata se ena nodra bulu na mate ia “oqo na ka e vinakata na Turaga me da cakava [me baleti] ira na bula kei na veitabatamata muri mai.”

Baleta ni ratou sa vakayagataka tiko e dua na timi ni veivuke ni gauna ni leqa tubukoso na valenivolavola ni veiqaravi sa vakarautaki tu kina na iyaya ni vakavakadewa, me ratou sa na vaqara na timi e dua na vanua e tu kina na wa ni talevoni kei na so tale na veika vakamisini e gadrevi me rawa kina ni vakayacori na vakavakadewa veitikivi vakayawa.

E kaya o Sisita Talataina ni nodratou vakabauta na timi e vakataki Nifai ena nodratou kaya, “Kevaka sara mada ga me datou na laki cakava na ka oqo ena dua na ruku ni vunikau, edatou [na] lako ka kitaka” (raica 1 Nifai 3:7).

Ena veivuke ni turaga eratou a raica e dua na vanua, tokitaki yani na iyaya e gadrevi, vakadaberi, ka vakatovolei ena vica na siga ni bera na koniferedi.

“Keitou vakila na liga ni Turaga ena neitou qarava na veika a vakaroti vei keitou,” e kaya o Sisita Talataina.

Ena vuku ni nodratou igu na timi, ni qai tekivu na koniferedi, a rawa vei ira na lewenilotu era a cegu mai vakalailai ena cakacaka vakaitamera ni sasamaki me ra mai vakarorogo me ra rogoca ka kila na nona itukutuku na Turaga me baleti ira.