Maʻá e Fānau Īkí
Akoʻi ʻo e Faiako ʻa Tená
“ ʻOku ou fie hoko ko ha faifekau. ʻIkai te u fie tali ke u lahí” (“ ʻOku ou Fie Hoko Leva ko ha Faifekau,” Tohi Hiva ʻa e Fānaú, 90).
1. ʻI ha ʻaho ʻe taha naʻe maʻu ai ʻe Tena ha fakatātā ʻo Sīsū. Naʻá ne saiʻia moʻoni he fakatātaá. Naʻá ne fie vahevahe ia mo ha taha. Naʻá ne ʻilo ʻoku ʻikai ke ʻilo ʻe he tokotaha kotoa pē ʻa Sīsū.
2. Naʻe ʻeke ange leva ʻe Tena, “Fineʻeiki, ʻe lava nai ke u foaki ʻeku fakatātā ʻo Sīsuú maʻa ha taha kehe?”
Naʻe pehē mai e Fineʻeikí, “ ʻIo. Ko hai te ke foaki ki aí?”
“Te u foaki ki heʻeku faiako ko Mīsisi ʻIongí. ʻOku ou saiʻia ai he ʻokú ne lau mai kiate au ha ngaahi talanoa lahi.”
Naʻe pehē ange leva ʻe he Fineʻeikí, “Ko ha fakakaukau fakaʻofoʻofa ia. ʻOku ou laukau ʻaki koe.”
3. Ko e taimi naʻe aʻu ai ʻa Tena ki he ako tokamuʻá (preschool), naʻá ne ʻoange leva ʻa e fakatātaá ki a Mīsisi ʻIongi. Naʻe fiefia ke ne maʻu ʻa e fakatātā ʻo Sīsuú. Naʻe fiefia ʻa Tena ʻi heʻene saiʻia aí.
4. Hili ha ngaahi ʻaho siʻi mei ai, kuo faʻu ʻe Tena mo hono fāmilí ha tohi naʻe fōtunga tatau mo e ngaahi lauʻi peleti koula ʻo e Tohi ʻa Molomoná. Hili ia pea nau hiki leva ʻenau fakamoʻoní ʻi loto he tohí.
Ne toe ʻeke ange ʻe Tena, “Fineʻeiki, ʻe lava nai ke u ʻalu mo ʻetau tohí ki he akó ʻo fakaʻaliʻali kia Mīsisi ʻIongi?”
Naʻe pehē ange e Fineʻeikí, “ ʻIo, ʻe lava.”
5. ʻI he ʻaho hono hokó ʻi he akó, naʻe takitaki ʻe Tena ha kato āfei naʻe ʻi loto ai ʻa e ngaahi lauʻi peleti koula ʻa hono fāmilí. Naʻá ne fakamatala ange kia Mīsisi ʻIongi ʻa e tohi naʻe faʻu ʻe hono fāmilí. Naʻe mātuʻaki mahuʻingaʻia ai e faiako ʻa Tená.
6. ʻI he taimi naʻe ʻalu atu ai ʻa e Fineʻeikí ke ʻomi ʻa Tena mei he ʻakó ʻi he ʻaho ko iá, naʻe haʻu ʻene faiakó ke talanoa mo e faʻē ʻa Tená.
Naʻe pehē ange ʻa Mīsisi ʻIongi, “Naʻe ʻomi ʻe Tena ha meʻa mātuʻaki mahuʻinga he ʻahó ni. ʻE lava nai ke ke toe fakamatala ki ai?”
Naʻe fehui ʻange leva ʻe heʻene Fineʻeikí, “ʻE fēfē kapau te mo ō mai mo ho husepānití ke tau maʻu meʻatokoni efiafi ʻi homau ʻapí? Te tau lava ʻo talanoa lahi ange ai.”
Naʻe pehē ange leva ʻa Mīsisi ʻIongi, “ʻOku ngali sai ʻaupito ia.”
7. Hili ha ngaahi māhina siʻi mei ai, ne ʻalu leva ʻa Tena mo ʻene fineʻeikí ki he papitaiso ʻo Misa mo Mīsisi ʻIongí.
Naʻe pehē ʻe Tena, “ʻOku ou fiefia lahi heʻeku vahevahe ʻeku fakatātā ʻo Sīsuú mo ʻeku faiakó.”
Naʻe pehē ʻe heʻene Fineʻeikí, “ʻOku ou ʻilo ʻoku fiefia mo ia. Ko koe ʻa e ʻuhinga lahi ʻoku papitaiso ai ʻa Mīsisi ʻIongi mo hono husepānití he ʻaho ní.”
8. Naʻe ongoʻi fiefia ʻa Tena ʻi he taimi naʻe mamata ai ki hono papitaiso ʻo Mīsisi ʻIongí. Naʻe malimali ʻi he taimi naʻe maleʻei atu ai ʻene Fineʻeikí ʻo fanafana ange, “Ko ha kau faifekau maʻongoʻonga ʻa e kau taʻu faá!”