Ko e Foʻi Lole Fuopotopotó
“Te u fakahā kiate koe ʻi ho ʻatamaí pea ʻi ho lotó, ʻi he Laumālie Māʻoniʻoní” (T&F 8:2).
Naʻe ʻā fiekaia hake ʻa Lesieli. Naʻe puna mei hono mohengá ʻo lele ki he kōpate ʻi he loki tukuʻanga nāunau ngaohikaí. Naʻá ne fakaava mai ʻa e matapaá ʻo sio takai he funga laupapa ki ʻolungá. Ko ʻena---ʻa e siā lolé! Naʻe ʻi loto ʻi he siaá ʻa e ngaahi foʻi lole naʻe saiʻia taha aí, ʻo nau fetapaki hake hangē ha ngaahi foʻi mapu ngingilá. Ko ha ngaahi foʻi lole fuopotopoto naʻe fakatauele ʻene lanu kulokula-molí ʻoku ʻi loto ai ha sokoleti ifo.
Naʻe kiʻi sio takai fakavavevave ʻa Lesieli ke vakaiʻi pe ʻoku sio ange ʻa e Fineʻeikí mo e Tangataʻeikí. Naʻe lava pē ke ne ongoʻi hona leʻó, ka naʻe ʻikai ke sio kiate kinaua. Naʻá ne tekeʻi fakaoloolo atu leva ha sea papa ki he loki tukuʻanga nāunau ngaohikai pea kaka hake ki ai. Pea kakapa hake leva ʻo mioʻi fakaava ʻa e tāpuni ʻo e siā lolé. Naʻá ne faluku leva ha falukunga lole, mioʻi tāpuni ʻa e tāpuní, pea lele atu he loto holó ki hono loki mohé. Ka ʻi he fakaofiofi mai ʻa e leʻo ʻo ʻene ongomātuʻá, naʻá ne afe leva ki he loki kaukaú ʻo tāpuniʻi mai ʻa e matapaá.
Ko e taimi naʻe sio ʻuakai hifo ai ʻa Lesieli ki heʻene lolé, naʻe fifili ʻo peheni, “ʻE lava nai ke u lī ha foʻi taha ki ʻolunga peá u hapo ʻaki ia hoku ngutú?” Naʻe ʻikai toe tatali ka ne lī māʻolunga ha foʻi lole ki ʻolunga. Naʻe tētē ʻi ʻolunga ʻi hono ʻulú, pea toki tō hifo fakahangatonu ki hono ngutu ne ʻosi fakamanga haké ʻo ʻefihia ʻi hono loto kiá. Naʻe ʻikai toe lava ʻo mānava!
Naʻe feinga ke kaila ka naʻe ʻikai ke toe ʻi ai hano leʻo. Naʻe tangi loto pē ʻo pehē, “Teti, tokoni mai!” Naʻá ne lotu, “Tamai Hēvani, kātaki ʻo tokoni mai!” Ne tafe hifo hono loʻimatá ʻi hono kouʻahé ʻi heʻene feinga ke mānavá ka naʻe ʻikai lava. Naʻá ne ongoʻi faingataʻaʻia mo ninimo.
Fakafokifā pē kuo hū mai ʻene tangataʻeikí ki he lokí. Naʻá ne puke takaiʻi mai ʻa Lesieli mei hono tuʻá peá ne kukuʻi mālohi. Patō! Punakaki mai ʻa e foʻi lolé ʻo tō he pēsoni tafitafí. Ne fakatau leva ʻe Lesieli ʻene mānavá. Ne tuku hifo leva ʻe he Tangataʻeikí ia ki lalo ʻo kuku mai. Naʻe fanafana leʻo siʻi ange leva, “ʻOku sai pē ia, Lesieli. Te ke sai pē koe ia he taimí ni.”
Naʻe pehē ange leva ia, “Mālō, Tangataʻeiki. ʻOku ou kole fakamolemole atu ʻi heʻeku toʻo taʻe poaki ʻa e lolé. ʻOku ou ʻofa atu kiate koe.
Naʻe hū mai ʻa e Fineʻeikí ki he lokí. Peá ne ʻeke mai, “Ko e hā e meʻa ne hokó?”
Naʻe pehē ange ʻe he Tangataʻeikí, “Naʻá ku fanongo ki ha leʻo naʻe pehē mai, ʻʻOku faingataʻaʻia ho ʻofefiné! ʻAlu ki ai!ʻ Naʻá ku maʻu ʻa Lesieli ʻi he loki kaukaú, ka naʻe ʻikai ke u ʻilo pe ko e hā ʻa e meʻa naʻe fehālākí. Pea pehē mai ʻa e leʻó, ʻPuke ia ki ʻolunga!ʻ Naʻá ku fakahoko ia, pea punakaki mai ki tuʻa ha konga lole mei hono ngutú.”
Naʻe fāʻofua ʻa e Fineʻeikí kia Lesieli.
Naʻe fakakaukau lahi ʻa Lesieli ʻi he ʻaho ko iá. Naʻe fakakaukau ki he lolé pea mo e faitotonú. Naʻe fakakaukau ki he lelei ʻo e foʻi mānava kotoa pē he ʻeá. Naʻe fakakaukau ki he lahi ʻo ʻene ʻofa he Tamai Hēvaní mo e Fineʻeikí pea mo e Tangataʻeikí. Kae mahulu haké, naʻe fakakaukau ki he Laumālie Māʻoniʻoní. Naʻe taʻofi ʻe he Tangataʻeikí ʻene loʻoá koeʻuhí he naʻe fakafanongo. Naʻe loto ke hangē ko ʻene Tangataʻeikí ʻo fakafanongo maʻu pē ki he Laumālie Māʻoniʻoní.
Tā fakatātaaʻi ʻe Matt Smith