Liliu ʻo e Māmaní ʻe ha Fefine Angamaʻa ʻe Taha ʻi ha Taimi Pē ʻe Taha
ʻI ʻEpeleli 2008, ne tuʻu ai ʻa e kau palesitenisī lahi ʻo e Kau Finemuí ne toki uiuiʻi foʻoú—ʻa Elaine S. Dalton, Mary N. Cook, mo Ann M. Dibb—ʻi he funga Ensign Peak he tuliki fakatokelau ʻo Sōleki Sití ʻo vakai hifo ki he teleʻá kotoa.
Mei honau tuʻuʻangá, naʻe fetapaki hake ʻa e ʻāngelo ko Molonaí mei he Temipale Sōlekí, pea naʻa nau ʻiloʻi ai ʻa e meʻa ʻoku finangalo ʻa e ʻEikí ke fai ʻe he kau finemui ʻo e Siasí.
Naʻe hiki ʻe he kau fafiné ni ki ʻolunga ha tokotoko naʻe vilingia ai ha pulupulu koula faka-Pelū—ko ʻenau fakaʻilonga mo e fuka ki he ngaahi puleʻangá, ko ha ui ke foki ki he moʻui anga-maʻá.
Naʻe pehē ʻe Sisitā Tolotoni, “He ʻikai ke tau talanoa ki he ʻulungāanga mahuʻinga foʻou ko ʻení taʻe te tau pehē ko e ʻuhinga ki he ʻulungāanga mahuʻingá ni ko e temipalé. Pea ko e temipalé ko e ʻuhinga ia ʻo e meʻa kotoa pē ʻoku tau fai ʻi he Finemuí, koeʻuhí he te ne tokoniʻi ʻa e kau finemui ko ʻení ke nau omi kia Kalaisi.”
Naʻe fakakau atu ʻa e angamaʻá ki he ngaahi tuʻunga mahuʻinga ʻo e Kau Finemuí ʻi Nōvema 2008. ʻOku fakamatalaʻi ia ʻi he tohi Fakalakalaka Fakatāutahá “ko ha tōʻonga fakakaukau mo ha ʻulungāanga ʻoku fakavaʻe ʻi he ngaahi tuʻunga māʻolunga ʻo e angamaʻá. ʻOku kau ai ʻa e angamaʻá mo e haohaoá” (Young Women Personal Progress [booklet, 2009], 70).
ʻOku makehe ʻa e ʻulungāanga mahuʻingá ni he ko hono kotoa ʻo e ngaahi taukeí mo e ngāue ki he ʻulungāanga mahuʻingá kuo pau ke fakahoko ia, ka ko hono toenga ʻo e ngaahi ʻulungāanga mahuʻingá ʻoku tuku ai ki he kau finemuí ke nau fili mei ha ngaahi meʻa kehekehe. ʻIkai ngata aí, ko e fuofua taimi ʻeni ne fakaafeʻi ai ʻa e ngaahi faʻeé ke nau fakakakato ʻa e polokalama Fakalakalaka Fakatāutahá fakataha mo ʻenau fānau fefiné pea mo maʻu hanau mētali.
ʻI he taʻu kuo ʻosí, ne tali fiefia ai ʻe he kau finemui mo ha niʻihi he funga ʻo māmaní ʻa e kole ke nau foki ki he moʻui angamaʻá, ʻo fonu ai ʻa e ʻōfisi ʻo e Kau Finemuí ʻi ha ngaahi tohi mo ha ngaahi telefoni meiate kinautolu ne nau tali ʻa e kolé ni. Kuo kaka ha niʻihi tokolahi ʻi ha ngaahi moʻunga ʻo folahi ai ʻenau ngaahi fuká.
Naʻe holi ha kulupu ‘o ha kau finemui ʻe taha ʻi Hanipale ʻi Mīsuli ʻi ʻAmelika, ke fai ha fakapapau mei ha potu māʻolunga te nau moʻui angamaʻa, ka ʻi he ʻikai ke nau maʻu ha moʻunga ofi atú, ne nau kaka ai ʻi ha fale sima māʻolunga naʻe fungavaka ʻe 36, ʻo folahi ʻenau fuká mo tukupā ke nau moʻui angamaʻa.
ʻI Mekisikoú, ʻoku liliu ai ʻa e fakalea ʻo e Fakalāngilangi ʻo e Tuʻunga Fakafinemuí “Ko e Pale ʻo e Finemui Angamaʻá.” Naʻe pehē ʻe Sisitā Tolotoni ne fiefia ʻa e kau finemui ʻi Mekisikoú ʻi hono tānaki atu ʻo e angamaʻá ki he ngaahi tuʻunga ʻulungāanga mahuʻingá,—ko ha ʻulungāanga mahuʻinga ia kuo nau ʻosi feangainga pē mo ia.
Naʻe pehē ʻe Sisitā Kuki, “Kuo tali ʻa e kole ke angamaʻá ʻaki hano fakahīkihikiʻi lahi fau mei he ngaahi tafaʻaki kotoa pē, ʻi he lotoʻi Siasí pea mei tuʻa foki. ʻOku saiʻia ai ʻa e kau takí; fakamamafaʻi ʻe he kau taki lakanga fakataulaʻeikí; ʻoku fakamālōʻia ia ʻe he ngaahi faʻeé mo e ngaahi kui fefiné.”
Ko e ngāue ki he tuʻunga ʻulungāanga mahuʻinga ʻo e angamaʻá ko e muimui ia ki he naʻinaʻi ʻa e Fakamoʻuí ke ako meiate Iá (vakai, T&F 19:23) ʻaki hono lau e Tohi ʻa Molomoná kotoa mo hiki maʻu pē ʻa e ngaahi fakakaukaú ʻi ha tohinoa.
ʻOku pehē ʻe ha ʻī-meili ki he kau palesitenisī ʻo e Kau Finemuí mei ha fefine ʻi ʻIngilani: “Meʻapango, he kuo pau ke ma kole fakamolemole atu. He ʻikai ke ma fakakakato vave ʻeni ʻo hangē ko ia ne ma fakakaukau ki aí. Ko hono ʻuhingá he ʻoku ou ako mo ʻeku tama fefiné ʻa e Tohi ʻa Molomoná ʻi ha founga ne teʻeki ke ma fakahoko ki muʻa. Ko ha meʻa fakafiefia moʻoni, pea ʻokú ma loto ke fakahoko fakalelei pē ia.”
Ne pehē ʻe Sisitā Tipi, ʻOku akoʻi ʻe he Tohi ʻa Molomoná fekauʻaki mo ha ngaahi sosaieti naʻe tuʻumālie mo fiefia ʻi he taimi naʻa nau moʻui angamaʻa mo haohaoa aí, ka ne nau tō ʻi he taimi naʻe ʻikai ke nau angamaʻa aí.
Naʻe pehē ʻe he kau palesitenisī ʻo e Kau Finemuí, kuo vēkeveke tatau pē ʻa tangata mo fafine ʻi he tuʻunga ʻulungāanga mahuʻinga foʻoú mo nau ʻomi ha ngaahi sīpinga ʻo ha ngaahi kulupu ʻo ha kau talavou mo ha ngaahi uooti ʻo e niʻihi teʻeki mali ne nau ngāue fakataha ki he tuʻunga ʻulungāanga mahuʻingá ni.
Naʻe fakamamafaʻi ʻe Sisitā Tipi kuo pau ke tokanga taha ʻa tangata mo fafine fakatouʻosi ki he ʻulungāanga mahuʻingá ni ka nau maʻu ʻa e ngaahi tāpuaki maʻongoʻonga tahá. Naʻá ne pehē, “ʻOku ʻikai maʻu ʻe he kakai tangatá ha mālohi pe ivi ke fakaʻaongaʻi ʻa e lakanga fakataulaʻeiki ʻoku nau maʻú ʻo kapau ʻoku ʻikai ke nau moʻui haohaoa. Pea ʻoku maʻu ʻe fafine ʻa e mālohi mo e ivi ko iá ke fakahoko honau uiuiʻi fakalangi ko e ngaahi uaifi, faʻē mo e kakai fefine, ʻi heʻenau moʻui angamaʻá.”
Naʻe pehē ʻe Sisitā Tolotoni ʻokú ne tui ko e ʻulungāanga mahuʻinga ʻo e angamaʻá kuo haofaki mai ia ki he kuongá ni, ko ha kuonga ʻoku fai ai ʻe māmani ʻa e meʻa kotoa pē ka ʻoku ʻikai ke nau tuʻuaki ʻa e angamaʻá.
Naʻe pehē ʻe Sisitā Kuki, “ʻOku mālie kiate kimautolu ʻa e tokolahi fau ʻo e kau finemui he māmani ko ʻení ʻoku lava ke pulia meiate kinautolu honau tuʻunga ko e ngaahi ʻofefine ʻo e ʻOtuá. Ko ʻemau fakamanatu pē ʻeni kiate kinautolu ʻa e foʻi moʻoni ko iá, kapau kuó ke fai ha fehālaaki, te ke lava pē ʻo fakatomala.”
Naʻe pehē ʻe Sisitā Tipi, ko e tukupā ko ia ke kei angamaʻa mo haohaoá ʻoku malava ia tuʻunga ʻi he mālohi veteange mo e mālohi huhuʻi ʻo e Fakalelei ʻa e Fakamoʻuí. ʻOku tokanga taha ʻa e ngaahi meʻa ke aʻusia ʻi he tuʻunga ʻulungāanga mahuʻinga hono faá ki he fakatomalá.
ʻI he taʻu kuo ʻosí, ne tokolahi ha kau fafine—ʻa e lalahi mo e iiki fakatouʻosi—ne fakahoko mai ʻa ʻenau fakaʻamu ke toe foki ʻo hoko ko ha kakai fefine angamaʻa. Naʻe pehē ʻe Sisitā Kuki, “Kuo hanga ʻe hono [tānaki mai ʻo e angamaʻá] ʻo fakatupu ha ngaʻuta fiefia ʻi he kakai fefine ne nau fai ha ngaahi fili halá. Kuo pehē ʻe ha tokolahi, ʻTe u toe lava pē ʻo hoko ko ha fefine angamaʻa. … ʻE malava pē ke hoko ia kiate au.”
ʻOku fifili ʻa e tokolahi ʻo kinautolu ʻoku nau fakaʻamu ke toe angamaʻá pe te nau kamatá ʻi fē. ʻOku vahevahe ai ʻe he kau palesitenisī ʻo e Kau Finemuí mo kinautolu ʻa e founga ko ʻení: Lotu ʻi he pō mo e pongipongi kotoa. Lau ʻi ha miniti ʻe nima pe lahi ange ʻa e Tohi ʻa Molomoná ʻi he ʻaho taki taha. Peá ke malimali.
Ne pehē ʻe Sisitā Tolotoni, “Kapau ʻe fakahoko ʻeni ʻe he fefine kotoa he Siasí mo māmani, fakakaukau pē ʻe fēfē ʻa māmani ʻi ha taʻu ʻe nima mei heni. ʻOku mau tui moʻoni ʻe lava ʻe he kau finemui angamaʻá ʻi hono taki ʻe he Laumālié ʻo liliu ʻa e māmaní.”
Naʻe kaka ʻa e kau finemui mo honau kau takí, ʻo e Siteiki Lepupelika Tauʻatāina ʻo Sanitā Tominikou Tominikeni he Moʻunga Kamipita Kalapitó, ko ha moʻunga he Lepupelika Tominikení, ʻo fusi ai ʻenau fuka ʻo e angamaʻá ʻi ʻAokosi 2009.
áTaá ʻi he angalelei ʻa Iván Heredia