Ko e Ngāue ʻi he Siasí

ʻA Hai, ʻA Au? Ke u Faiako?

Pea ko e taimi ní te tau tukuange ʻa e taimí kia [fokotuʻu heni ho hingoá] ki heʻetau lēsoní.” Kapau te ke fanongo ki he lea ko ʻení he lotú ʻi he Sāpate kahaʻú, te ke ongoʻi manavasiʻi pe loto lahi nai?

ʻE ʻi ai pē ha taimi ʻe hoko ai ʻa e mēmipa kotoa ʻo e Siasí ko ha faiako. Mahalo ʻe hoko ʻi he Palaimelí, ʻi he Fineʻofá pe kōlomu ʻo e lakanga fakataulaʻeikí, ʻi he faiako ʻaʻahí pe faiako fakaʻapí, pe ʻi he efiafi fakafāmili ʻi ʻapí. Ko e tokolahi ʻo e kakai ʻoku kei foʻou ʻi he Siasí, mahalo ʻoku foʻou kiate kinautolu e fatongia ʻo e faiakó. Naʻa mo kinautolu kuo tuʻo lahi ʻenau faiakó, te nau fifili pe ʻe anga fēfē haʻanau loto lahi mo tokoniʻi ke toe lelei ange ʻa e moʻuí.

Ko ha ngaahi fakakaukau faingofua ʻeni te nau lava ʻo tokoniʻi kitautolu ʻi hono fakahoko hotau ngaahi fatongia fakafaiakó:

1. Ko e lotú ko ha meʻangāue fakafaiako lelei ia. Kamata e konga kotoa pē hoʻo teuteu lēsoní ʻaki haʻo lotu ʻi he loto fakatōkilalo ke tataki koe ʻe he Laumālié. Falala ki he talaʻofa ko ia ʻa e ʻEikí ki he faiako kotoa peé: “Pea ʻe foaki atu ʻa e Laumālié kiate kimoutolu ʻi he lotu ʻo e tuí” (T&F 42:14).

2. ʻOku meimei ko e lēsoni kotoa pē, ʻoku lahi ange ʻa e ngaahi fakamatala ia ʻi he tohi lēsoní ʻi he meʻa ko ia te ke lava ʻo fakaʻaongaʻi ʻi he lolotonga ʻo e kalasí. Lau ʻa e lēsoní, peá ke filifili ʻi he faʻa lotu ha tefitoʻi moʻoni ʻe taha pe ua ʻokú ke ongoʻi ʻoku lelei taha ki hoʻo kalasí.

3. Ako ʻi he faʻa lotu ʻa e ngaahi potu folofola ʻoku fekauʻaki mo hoʻo lēsoní, peá ke toʻo mai ha ngaahi sīpinga mo ha ngaahi tefitoʻi moʻoni meiate kinautolu. ʻE lava ʻa e folofola ʻa e ʻOtuá ke ne maʻu ha “mālohi [ʻoku] lahi ange ʻene ngāue ʻi he fakakaukau ʻa e kakaí [ʻi ha] … toe meʻa kehe” (ʻAlamā 31:5).

4. ʻOku tonu ke ke maʻu ha nonga ʻi he foʻi moʻoni ko ia ʻoku ʻikai fie maʻu ke ke ʻilo ʻa e meʻa kotoa pē fekauʻaki mo e lēsoní ka ke toki hoko ko ha faiako leleí. Palani ha ngaahi fehuʻi faingofua ko ē te ne ʻai ʻa e kau mēmipa hoʻo kalasí ke nau vahevahe ʻa e ngaahi meʻa kuo nau fouá mo ʻenau ʻiló. ʻE lava ʻo hoko ʻeni ko e ngaahi konga ongo mo manatua taha ʻo hoʻo lēsoní.

5. ʻI hoʻo hoko ko e faiakó, ʻoku ui koe ke ke toe ako ai foki. Ko hono akoʻi ʻo e ongoongoleleí, ʻoku “fie maʻu hoʻo ngaahi ngāue faivelengá ke fakatupulaki hoʻo mahinó mo fakalakalaka hoʻo ngaahi taukeí, ʻi hoʻo ʻiloʻi ko ia ʻe hanga ʻe he ʻEikí ʻo fakalahi ho iví ʻi he taimi ʻokú ke faiako he founga kuó Ne fekauʻí.”¹

Ke maʻu ha ngaahi fakakaukau fakafaiako lahi ange, vakai ki he ʻOku ʻIkai ha Ui ʻe Mahuʻinga Ange ʻi he Faiakó.

Maʻuʻanga Fakamatalá

1. ʻOku ʻIkai Ha Ui ʻe Mahuʻinga Ange ʻi he Faiakó (1999), 4.

Ngaahi Fakakaukau Fakatakimuʻa

Ko e taimi ʻokú ke ngāue ai ʻi ha kau palesitenisī, fakapapauʻi ke ke ʻi ai ʻi he taimi ʻoku vaheʻi ai ha kau faiako mo ha niʻihi kehe kuo uiuiʻi ki hoʻo houalotú. Pea fokotuʻu ha taimi te ke lava ai ke mou fakataha ʻo:

1. Fakamatalaʻi ʻa e ngaahi fatongia ʻo e uiuiʻi foʻoú.

2. ʻOange ʻa e ngaahi tohi lēsoní pe ngaahi nāunau fakatakimuʻá.

3. Fai ha poupou mo ha ngaahi ako kehe.

4. Fakahaaʻi hoʻo fakahoungaʻi mo hoʻo falala ki he mēmipa kuo uiuiʻi foʻoú.

Kapau Te u Faiako

“Te u lautohi mo kamata [lotua] e lēsoni ko iá ʻi he Sāpate ki muʻá. Te u maʻu ai ha uike kakato ke u lotu, feinga ke maʻu ha ueʻi fakalaumālie, fakakaukau, laukonga mo siofi hano founga fakaʻaongaʻi ʻi he moʻuí te ne ʻomi ha ivi ki heʻeku pōpoakí. He ʻikai ke ke fakapapauʻi vave pehē ʻa e lēsoní, ka te ke ʻohovale ʻi he lahi e ngaahi meʻa ʻe haʻu ki hoʻo fakakaukaú he lolotonga e uiké, he lahi ʻo e meʻa ʻe ʻoatu ʻe he ʻOtuá—ʻa ia te ke ongoʻi ke fakaʻaongaʻi ʻi he taimi ʻe fakaʻosi ai hoʻo teuteú.”

ʻEletā Jeffrey R. Holland ʻo e Kōlomu ʻo e Kau ʻAposetolo ʻe Toko Hongofulu Mā Uá, “Akoʻi mo Ako ʻi he Siasí” (fakataha ako fakatakimuʻa fakaemāmani lahí, 10 Fēpueli, 2007), Liahona, Sune 2007, 58.