Ko ʻEtau Tafaʻakí

ʻI he Uepisaití: Tokoni ʻo fili ʻa e ngaahi pousitā lelei tahá ke fakaʻaongaʻi ʻi he ngaahi māhina ka hokó. ʻAlu ki he liahona.lds.org ʻo fili. Pea ʻi he lolotonga hoʻo ʻi aí, te ke lava ʻo fokotuʻu mai mo ha ngaahi ʻata pe ngaahi fakakaukau ki he ngaahi pousitā he kahaʻú.

Ko e Potufolofola ʻOku ou Manako Taha Aí

“Kapau te mou haʻu kiate au te mou maʻu ʻa e moʻui taʻengatá. Vakai, ʻoku mafao atu hoku nima ʻo e ʻaloʻofá kiate kimoutolu, pea ko ia ia ʻe haʻú, te u maʻu ia; pea ʻoku monūʻia ʻa kinautolu ʻoku haʻu kiate aú” (3 Nīfai 9:14).

Ko e taha ʻeni hoku ngaahi manakó he ko e potufolofola ʻeni naʻá ne ʻomi ʻeku fakamoʻoni ʻoku moʻui ʻa Kalaisi pea ʻokú Ne fie maʻu ke tau muimui ʻiate Iá.

ʻOlivia K., 15, Hivi, Hungali

Ko e Kau Faifekau Kitautolu he Taimí ni

ʻOku ʻomi ha pōpoaki mahuʻinga ʻe he fakamatala ʻi he Liahona ʻo Māʻasi 2007 ko e “Founga ke Teuteu ai ke Hoko ko ha Faifekau Leleí”. ʻOku ʻikai fie maʻu ia ke tau tatali ke taʻu 19 ka tau toki hoko ko ha kau faifekau. ʻIkai, ko e kau faifekau kitautolu ia he taimí ni.

ʻOkú ne talamai ʻoku totonu ke tau fekumi mo fakalaulauloto ki he folofolá pea mo lotu maʻu ai pē ke tau lava ʻo ikunaʻi ʻa Sētane. ʻOku totonu ke tau maʻu maʻu pē ha tui ki he Fakamoʻui ko Sīsū Kalaisí.

Melisa N., 18, Haʻamoa

ʻOku Lelei e Meʻa Kotoa

ʻOku ou manatuʻi lelei ʻa e pō naʻá ku ʻi ha fepaki fakalaumālie lahi ai. Naʻá ku lolotonga fononga ki he ʻinisititiutí ʻi he kamata ko ia ke u ongoʻi faingataʻaʻiá. Naʻe puputuʻu ʻeku fakakaukaú. He ʻikai ke u lava au ʻo pehē naʻá ku ʻilo ʻa e moʻoni ʻo ʻeku tui fakalotú. Naʻe ʻikai ke u toe ongoʻi ʻoku ʻi ai ha meʻa ʻoku pau. Naʻá ku ongoʻi loto foʻi mo mā ʻiate au pē peá u lotu ke maʻu ha ivi.

ʻI he taimi naʻá ku aʻu ai ki he falelotú, kuó u fōngia ʻi he loto mamahí. Naʻe fakatau ʻeku mānavá peá u hū atu leva ki fale. Ko e taimi naʻá ku ofi atu ai ki falé, naʻá ku fanongo ki he himi “Haʻu Kāingá” (Ngaahi Himi, fika 18) ʻi hono hivaʻi ʻe he hoku ngaahi tuongaʻané mo hoku ngaahi tokouá. Naʻá ku ongoʻi ʻi he taimi pē ko iá ʻa e fakanonga ʻoku maʻu mei he ʻOtuá ʻo fakafou mai he Laumālie Māʻoniʻoní.

Naʻe lahi fau ʻa e ongo ʻo e nongá pea ʻikai ke u toe lava ʻo mapukepuke hoku loʻimatá. Ne tuku ʻe he ʻEikí ke u ʻiloʻi ʻe lelei ʻa e meʻa kotoa pē pea kuó u hao. Naʻá ku fakatokangaʻi ne feinga ʻa e mālohi ʻo e fakapoʻulí ke ne fakaʻauha ʻa e meʻa lelei kotoa pē ne u akó ka ko e ʻofa ʻa e ʻOtuá ʻoku malu mo fakafiefia. Naʻe mahino kiate au ʻoku moʻoni ʻa e ʻOtuá pea ko hotau ungaʻangá ia mo hotau mālohí. Naʻá ku toe ʻilo foki ai te tau lava ʻo ikunaʻi ʻa e ngaahi faingataʻá mo e ngaahi fakatauelé kapau te tau tui ki he ʻOtuá mo fekumi maʻu pē ki Heʻene fakahinohinó ʻi he lotu.

ʻOku fonu ʻa māmani ʻi he faingataʻá, pea ʻoku ʻikai ke tau lavelaveʻiloa pe ko e hā ʻe hoko maí. ʻOku fie maʻu ke tau falala kakato ki he ʻOtuá, fakatupulaki ʻetau tuí ʻi he ako ʻo e folofolá, pea moʻui ʻo fakatatau mo Hono finangaló.

ʻIvoneti S,. 19, Pahia, Palāsila

“Pea te ke tutu ʻeku māmá: ʻe huluaki ʻeku fakapoʻulí ʻe [he ʻEiki] ko hoku ʻOtuá” (Saame 18:28).

Ko Hoʻomou Tafaʻakí ʻEni

Ko hoʻomou ngaahi pēsí ʻeni—ko ha potu ke vahevahe ai mo e toʻu tupu kehé ʻa e ʻuhinga kiate koe ʻo e ongoongoleleí. Ko e meʻa ʻeni ke ke siofi ʻi hono lau ʻo e ngaahi peesi ko ʻení pea mo e meʻa te ke lava ʻo tokoni aí:

• Ngaahi aʻusia pe ngaahi ʻilo ʻe tokoni ke mahino kiate koe mo ke moʻui lelei ʻaki ai ʻa e ongoongoleleí.

• Ko ha tā ʻata lelei naʻá ke ʻaí pea mo e potu folofola naʻe fakamatalaʻi ʻakí.

• Ko ha meʻa lelei ne ke foua lolotonga ʻa hoʻo ngāue ʻi he Fatongia ki he ʻOtuá pe Fakalakalaka Fakatāutahá.

• Ko haʻo fakamatala fekauʻaki mo ha potufolofola ʻokú ne ueʻi fakalaumālie koe. Fakakau mai ai ho laʻi taá, kapau ʻokú ke loto ki ai.

• Tokoni fekauʻaki mo e Liahoná: ko e hā ʻa e ngaahi fakamatala naʻá ke saiʻia ʻi hono laú?

ʻĪ-meili hoʻo fakamatalá, taá, pe ngaahi fakamatalá ki he [e-mail]. Kātaki ka ke tohiʻi ʻa e “Our Space” ʻi he laine ki he kaveingá, pea ʻomai ai mo e tohi fakangofua hoʻo mātuʻá (fakahoko mai ʻi he ʻī-meilí) ke vahevahe ʻa e meʻa ʻokú ke ʻomaí mo kimautolu. ʻE lava pē ke fakaleleiʻi ʻa e ngaahi meʻa ʻoku fakahū maí ke lōloa feʻunga mo mahino.

Toʻomataʻú: Tā fakatātaaʻi ʻo e ʻatá ʻe Craig Dimond