Fakafiefiaʻi ʻe he Toʻu Tupú Ha Taʻu Foʻou Moʻoni
ʻOku maʻu ʻe he ngaahi ʻiuniti ʻo e Siasí ʻi he funga māmaní ha DVD ʻoku ui Ko ha Taʻu Foʻou Moʻoni: Fakafiefiaʻi ʻe he Toʻu Tupú ʻa e 2010. ʻOku fakafeʻiloaki ʻe he foʻi DVD ʻa e taumuʻa ʻo e Mutualé ki he 2010 pea ʻe lava ke fakaʻaongaʻi ia ke tokoniʻi e ngaahi kalasi ʻa e toʻu tupú, fakatahaʻanga ʻa e ngaahi kōlomú, Mutualé, fealēleaʻaki ʻa e Pīsopé mo e toʻu tupú mo ha ngaahi ʻekitivitī kehe ʻi he lolotonga ʻo e taʻú.
Ko e kaveinga ʻo e Mutualé ki he 2010 ko e “Ke ke mālohi koe peá ke loto toʻa; ʻoua naʻá ke manavahē, pea ʻoua naʻá ke puputuʻu: he ko [e ʻEiki] ko ho ʻOtuá ʻoku ʻiate koe ia ʻi he potu kotoa pē ʻokú ke ʻalu ki ai” (Sosiua 1:9; ko e tānaki atu hono fakamamafaʻí). Ko e konga ʻuluaki ʻo e Ko ha Taʻu Foʻou Moʻoni: Fakafiefiaʻi ʻe he Tou tupú ʻa e 2010, ko ha pōpoaki makehe ia meia ʻEletā M. Lāsolo Pālati, ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá mo ha hiva ʻa e toʻu tupu ʻo e funga māmaní.
ʻOku ʻi he foʻi DVD foki mo ha ngaahi konga kehe ʻe hiva, ʻa ia ʻoku kau ai ha ngaahi pōpoaki fakalaumālie ʻo fakafou ʻi ha ngaahi talanoa, ngaahi fakamoʻoni, mūsika mo ha lea makehe mei he kau palesitenisī lahi ʻo e Kau Talavoú mo e Kau Finemuí. ʻOku tokanga taha ʻa e ngaahi konga ko ʻení ki he ngaahi tuʻunga moʻui ʻo e ongoongoleleí mei he Ki Hono Fakamālohia ʻo e Toʻu Tupú, kau ai ʻa e akó, fāmilí mo e ngaahi kaungāmeʻá, mūsiká mo e hulohulá, teití mo e angamaʻá, moʻui leleí, tokoní pea mo e fakatomalá.
ʻOku vahevahe ʻe he toʻu kei talavou mei ha ngaahi potu kehekehe ʻo e māmaní ʻa ʻenau ngaahi fakamoʻoní ʻi he foʻi DVD.
Naʻe pehē ʻe ʻIleini S. Tolotoni, ko e palesiteni lahi ʻo e Kau Finemuí, “ʻOku mau fiefia ʻi he lava ke femātaaki e toʻu tupu ʻo e Siasí ʻi he foʻi DVD ko ʻení mo nau fefakamālohiaʻaki ʻenau ngaahi fakamoʻoní. Ko kinautolu te nau mamatá, te nau fakatokangaʻi ha toʻu tupu loto toʻa ʻi he potu kotoa pē ʻi heʻenau fili ke moʻui ʻaki ʻa e ngaahi tuʻunga moʻui [ʻo e Siasí] mo fai ha tokoni ʻi he māmaní. ʻOku mau fakatauange ʻe fakaʻaongaʻi ʻe he kau taki mo e kau faiako ʻo e lakanga fakataulaʻeikí mo e ngaahi houalotú ʻa e foʻi DVD ʻi heʻenau ngaahi kalasí ki hono akoʻi ʻo e ngaahi tuʻunga moʻuí mo e ngaahi ʻekitivitií ke ne tokoniʻi ʻa e toʻu tupú ke nau tukupā ke moʻui ʻaki mo fakaʻaongaʻi ʻa e ngaahi tuʻunga moʻui ko ʻení ʻi heʻenau moʻuí.”
Kuo ʻosi poupouʻi ʻe he kau taki ʻo e Siasí ʻa e kau taki fakalotofonua ʻo e lakanga fakataulaʻeikí mo e ngaahi houalotú ke nau toe sio he foʻi DVD mo fakaʻaongaʻi ia ʻi heʻenau ngaahi fakatahá mo ʻenau ngaahi ʻekitivitií. ʻE lava ke fakaʻaongaʻi ʻa e konga ʻuluaki ʻo e foʻi DVD ʻi he ngaahi ʻekitivitī ʻo e Taʻu Foʻoú pe ʻi ha ngaahi meʻa makehe ʻoku fakamatalaʻi ai ʻa e taumuʻa tatau ko ʻení. Ko e toenga ʻo e ngaahi kongá naʻe fokotuʻutuʻu ia ke fakaʻaongaʻi ʻi he lolotonga ʻo e taʻú ki hono fakamahino ʻo e taumuʻá.
Ko e ngaahi kongá ʻoku pulusi fakataha ia mo ha ngaahi fakamatala ʻi he lea faka-Kenitoni, Pilitānia, Falanisē, Siamane, ʻĪtali, Siapani, Kōlea, Manitalini, Potukali, Lūsia mo e faka-Sipeiní. ʻE lava foki ke maʻu fakahangatonu ʻa e fakamatala he foʻi DVD mei he ʻInitanetí.
Ko e Vahevahe ʻe Manuela Salapia ʻo Mekisikoú ʻa ʻene ngaahi aʻusia ʻi he DVD.
Faitaaʻi ʻe tyler harris