Ngaahi Talanoa ʻo Sīsuú

Ko Sihova mo e Palani Fakaʻofoʻofa ʻa ʻEtau Tamai Hēvaní

Fai ʻe Diane Mangum

Ki muʻa pea toki ʻi ai ha laʻā, māhina, pe ko ha kelekele ke tau tangutu aí, naʻa tau muʻaki nofo kotoa ʻi he langí mo ʻetau mātuʻa fakalangí. Ne tau hoko ai ko ʻena fānau fakalaumālie, pea naʻe teʻeki ai ke tau maʻu ha sino fakaemāmani.

Naʻa tau ʻofa ʻi he Tamai Hēvaní. Pea naʻá Ne ʻofa lahi ʻiate kitautolu ʻo loto ai ke tau tupulaki ke tatau mo Ia pea mo nofo mo Ia ʻo taʻengata. Naʻá Ne finangalo ke tau ʻiloʻi ʻa e meʻa kotoa pē naʻá Ne ʻafioʻí. Ka ʻe anga fēfē haʻatau ʻilo kotoa ʻa e ngaahi meʻa ko iá?

Naʻe ʻi ai ha palani fakaʻofoʻofa ʻa e Tamai Hēvaní. Naʻá ne fakatahatahaʻi atu kitautolu kotoa ʻo fakahā mai kiate kitautolu ʻEne palaní. Te Ne fakatupu ha māmani fakaʻofoʻofa ʻo ʻi ai ha ngaahi vaitafe, ngaahi moʻunga, ngaahi matalaʻi ʻakau, mo ha fanga monumanu. Pea te Ne foaki mai kiate kitautolu taki taha ha faingamālie ke omi ki māmani ʻo maʻu ha sino fakamatelie. Te tau lava ai ke faluku ha ʻoneʻone māfana ʻi hotau nimá pea mo ongoʻi ʻa e musie moluú ʻi hotau lalo vaʻé.

Te tau lava ʻo maʻu ʻi māmani ha ngaahi fāmili. Te nau fafangaʻi, maluʻi, pea mo ʻofaʻi kitautolu.

He ʻikai ke tau lava ʻi māmani ʻo manatuʻi ʻa e Tamai Hēvaní, pea ʻe fie maʻu leva ke tau ako ʻo kau kiate Ia. ʻE lava ʻe he ngaahi folofolá, kau palōfitá, mo ʻetau ngaahi mātuʻá ʻo akoʻi kitautolu ʻo kau kiate Ia. ʻE fakataueleʻi kitautolu ke tau talangataʻa, pea te tau fai ha ngaahi fehālaaki he taimi ʻe niʻihi. Te tau puke ʻi ha taimi ʻe niʻihi, pea ʻe fakaiku pē ʻo tau mate.

Ko Sihová ko e ʻAlo lahi taha Ia ʻi he fānau ʻa ʻetau Tamai Hēvaní. Naʻe talangofua maʻu pē ki Heʻene Tamaí. Naʻe tatau Ia mo e Tamai Hēvaní. Naʻá Ne tali ʻa e palani ʻa e Tamai Hēvaní. Ka naʻe fakafepaki ha taha ʻo e fānau fakalaumālie ʻa ʻetau Tamai Hēvaní, ko Lusifā, ki he palaní. Naʻá ne pehē ʻoku ʻikai totonu ke tau toe fili ʻi he totonú mo e halá.

Naʻe folofola ai ʻa e Tamai Hēvaní, ʻoku fie maʻu ha taha ke hifo mai ki māmani ʻo tokoni ke tau ʻilo ʻa e founga ke tau foki ai ki he langí, kae lava ʻo hoko ʻEne palaní.

Naʻe fie maʻu ha taha ke ne fakahinohino mai kiate kitautolu ʻa e founga ʻo e muimui ki he Tamai Hēvaní. Ko hai naʻe talangofua feʻunga ke ne fakahoko ʻení?

Naʻe fie maʻu ha taha ke ne fai ha fakalelei maʻa ʻetau ngaahi angahalá ka tau lava ʻo fakatomala ʻi he taimi ʻoku tau fai ai ha ngaahi fehālākí. Ko hai naʻe lelei feʻunga ke ne fai ʻení?

Naʻe fie maʻu ha taha ke pekia pea mo toetuʻu kae lava ke tau toetuʻu kotoa ʻo foki ki he langí. Ko hai naʻe toʻa mo ʻofa feʻunga ke ne fai ʻení?

Naʻe ʻi ai ha taha naʻe loto ke ne fakahoko kotoa ʻeni maʻatautolu?

Naʻe ʻi ai ha taha. Naʻe pehē ʻe hotau tokoua lahi ko Sihová, “Ko au ʻeni, fekauʻi au” (ʻĒpalahame 3:27).

ʻIkai ʻoku tau ʻofa lahi ʻiate Ia ʻi he meʻa ko ʻení.

Ko e taimi naʻe hāʻele mai ai ʻa Sihova ki māmaní, naʻe hoko Ia ko hotau Fakamoʻui. Naʻe ui ia ko Sīsū Kalaisi.

Ko e Huafa Sihová

Ko e Sihová ko e huafa ia ʻo Sīsū ʻi langi, ki muʻa pea toki ʻaloʻi ʻi Pētelihemá. ʻOku ʻuhinga ʻa e Sihová ko e “taʻengata” pe “taʻe-liliua.” Naʻe ʻikai teitei liliu ʻa Sīsū. Naʻe talangofua maʻu pē ki he Tamai Hēvaní, peá Ne ʻofa maʻu pē ʻiate kitautolu.

Ko e Toluʻi ʻOtuá

ʻOku kau ki he Toluʻi ʻOtuá ha kakai māvahevahe ʻe toko tolu:

1. Ko e ʻOtua, ko ʻetau Tamai Hēvaní, ko e Tamai Ia ʻa hotau ngaahi laumālié. ʻOku tau lotu kiate Ia. ʻOkú Ne maʻu ha sino haohaoa ʻo e kakano mo e hui.

2. Ko Sīsū Kalaisi ʻa hotau Fakamoʻuí. Naʻá Ne fakahinohino mai ʻa e founga ʻoku finangalo e Tamai Hēvaní ke tau moʻui aí. Naʻá Ne pekia pea toetuʻu. Tuʻunga heni, ʻa ʻetau lava ke fakatomala, pea te tau toetuʻu. ʻOku maʻu ʻe Sīsū ha sino haohaoa ʻo e kakano mo e hui. ʻOku tau lotu ki he Tamai Hēvaní ʻi he huafa ʻo Sīsū Kalaisí.

3. ʻOku maʻu ʻe he Laumālie Māʻoniʻoní ha laumālie. ʻOku fekauʻi mai ʻe he Tamai Hēvaní ʻa e ngaahi mālohi ʻo e Laumālie Māʻoniʻoní ke ne fakafiemālieʻi kitautolu pea mo tokoni ke tau fili ʻa e meʻa ʻoku totonú.

Moʻui Fakamatelié

Ko ha meʻa matelie ʻa e ʻakaú, fangamonumanú, mo e kakai he māmaní. ʻOku ʻuhinga ia te nau moʻui, tupu, pea nau aʻu ʻo mate. Ko e maté ko e konga ia ʻo ʻetau moʻui fakamatelie he māmaní, pea ko e konga ia ʻo e palani ʻa e Tamai Hēvaní. Kapau he ʻikai ke tau mate, he ʻikai ke tau lava ʻo foki ki hotau ʻapi ʻi hēvaní.

Ngaahi Sino Fakaekakanó mo e Fakalaumālié

ʻOku fōtunga tatau pē hotau sino fakaekakanó mo hotau sino fakalaumālié. Ka hili ʻetau mate pea tau toetuʻú, ʻe fakahaohaoaʻi leva hotau sinó. Te nau moʻui lelei mo mālohi. Ka ne ʻi ai ha meʻa ne fahālaaki ʻi hotau sinó ʻi he lolotonga ʻetau moʻui he māmaní, ʻe fakaleleiʻi ia. Te tau takitaha fotu ʻi hotau tuʻunga lelei tahá.

Toʻohemá: toʻo mei he Ko Kalaisi mo e Talavou Koloaʻiá, tā ʻe Heinrich Hofmann, ʻi he angalelei ʻa e C. Harrison Conroy Co.; mei muí © Nova Development; Ko e Taimi ʻo e Talanoá ʻi Kāleli, tā ʻe Del Parson; loto mālié: tā fakatātaaʻi ʻe Sam Lawlor; toʻomataʻú: tā ʻa e © Getty Images; tā fakatātaaʻi ʻe Beth M. Whittaker