Ko ha Efiafi Fakafāmili ʻi ʻApi ʻOku Tolongá

Sēsiō Tuleso Liisi, Halisikou, Mekisikou

Naʻe kamata ʻaki ha efiafi fakafāmili ʻi ʻapi he ngaahi taʻu lahi kuo hilí haʻamau hivaʻi ʻa e, “[Kuo mafoa ʻa e atá, kuo ʻā ʻa māmani]” (“The Day Dawn is Breaking,” Hymns, fika 52). Ko e taimi ne ma kole taha taha ai ki heʻema fānaú ʻe toko nima ke nau fokotuʻu mai ha ʻekitivitī te mau lava ʻo fai he uike ko iá, ne tala mahino mai ʻe he toko taha taʻu nima ia ko Fenanitoó, “ʻOku ou fie sio au pe ʻoku fēfē ʻa e mafoa ʻa e ʻatá pea ʻā ʻa māmaní.” Naʻá ma feinga mo feinga ke fakamatalaʻi ange ki ai ʻa e ngaahi meʻa ʻoku hokó: ʻa e anga ʻo e hopo hake ʻa e laʻaá, māʻiliʻili ʻa e havili ʻo e pongipongí mo e fetapaki ʻa e hahaú ʻi he funga ʻo e fonuá. Ka naʻe ʻikai ke ne tali ha meʻa ʻe taha. Naʻá ne toe talamai pē, “ʻOku ou fie sio au ai.”

Ko ia, ʻi he taimi 4 hengihengi ʻo e Tuʻapulelulu ko iá, ne mau tuʻu hake, heka ki heʻemau meʻalelé, ʻo lele ki ha feituʻu ʻoku ʻasi lelei ai ʻa e tafaʻaki fakahahake ʻo e langí. Naʻe hangē e hopo hake ʻa e laʻaá he ʻaho ko iá ko haʻane haʻu tonu pē mei he langí. Naʻe liliu ʻa e ngaahi fuopotopoto lanu engeengá ʻo ngingila ʻi he hā mai ʻa e fuopotopoto fōlahi ʻo e laʻaá. Naʻe nāunauʻia moʻoni.

Hili mei ai ha taʻu ʻe tolungofulu, naʻe ʻeva mai e foha siʻisiʻi ʻo Fenanitoó ko Fenanitito. Naʻá ne pehē: “ʻIloʻi koā Kui Fefine? Naʻe ʻave kimautolu ʻe he tangataʻeikí ke mau mamata ʻi he hopo ʻa e laʻaá.”