Ngaahi Ongoongo Nounou mei Māmani
Fakalahi e Tānakiʻanga ʻo e Ngaahi Tohi Kakai ʻa Kānatá
Kuo tānaki atu ʻehe FamilySearch ʻa e tohi kakai ʻo e 1851, 1861, mo e 1871 ʻa Kānatá ki heʻenau faile ʻi he ʻInitanetí, ʻa ia kuo ʻosi ʻi ai ʻa e tohi kakai ʻo Kānata he 1881 mo e 1916. ʻOku ʻi ai ha palani ke vavé ni pē hano tānaki mai mo e tohi kakai ʻo Kānata he 1891. Ko e fakamatala ko ʻeni he ʻinitanetí, ʻi he FamilySearch.org, ʻoku ʻi ai ha ngaahi lekooti nai ʻe 17 miliona. ʻE faingofua pea ʻilo lahi ange ʻa e kakaí ki honau hisitōlia fakafāmilí ʻi hono ʻoatu taʻe totongi ko ʻeni ʻo e ngaahi tohi kakaí.
Tokoniʻi ʻe ha Ngāue Tokoni Siʻi Fānau ʻi Tituloití
ʻOku ʻiloa ʻa e loto kolo ʻo Tituloiti ʻi Misikení ʻi ʻAmeliká, ʻi he fai-hiá, tōʻonga fakakaukengí mo hono ngāue ʻaki ʻo e faitoʻo kona tapú. Koeʻuhí ko e lahi ʻo e taʻe maʻu ngāué mo e siʻi ʻa e ʻosi mei he akó ʻi he feituʻú ni, kuo fetakinima ai ʻa e Siteiki Pulumufila Hila Misikení mo e Siasi Fakatahatahá ke tokoniʻi ʻa e fānau akó, ko ha konga ia ʻo e ʻAho ʻo e Kaungāʻapi he Kolo ko Tituloití. Ne fakataha ha ongo kulupu ʻe ua ʻo foaki ha ngaahi kato nāunau ʻe 250 tupu kuo ʻosi fakakakato ai ha ngaahi pepa ako, penivahevahe, kala valivali, ngaahi foʻi lapa mo ha ngaahi nāunau ako kehe.
Hao ha Kāingalotu mei ha Vela
Ne fetukutuku ha kāingalotu ne laka hake he toko 70 tupu mei honau ngaahi ʻapí, ko hanau tokolahi ʻoku nau nofo mo ha ngaahi fāmili siasi, koeʻuhí ko ha vela ʻi ʻIutā mo Kalefōnia ʻi ʻAmeliká, ʻi Sepitema 2009. Naʻe tutu ʻe he afí ha ʻeka ʻe 123,000 tupu (50,000 ha) ʻi Sākalamenitō mo Losi ʻEniselisi, ʻi he ʻēlia ʻo Kalefōniá, ʻo mate ai siʻa ongo tangata tāmate afi ʻe toko ua mo fakaʻauha ha ngaahi fale ʻe 100 tupu. ʻI he ʻēlia Niu Hāmoni ʻi ʻIutaá, ne tutu ai ʻe he afí ha ʻeka ʻe 10,000 tupu (4,000 ha) mo ha ngaahi fale. Ne tokoniʻi ʻe he kau taki lakanga fakataulaʻeiki ʻo e feituʻú ʻa e kāingalotu ne uesia ʻi he ongo siteití fakatouʻosi.
Naʻe ngāue ʻa e kāingalotu ʻi Tituloiti Misikeni ʻi ʻAmeliká mo ha niʻihi ke foaki atu ha ngaahi nāunau ako ki he fānaú.
Faitaaʻi ʻe Betsy Anderson