Ko ʻEtau Pēsí
ʻOku tuku mavahe ʻe he fānau Palaimeli ʻo e Uooti Tāsakilaní he Siteiki Siutepani Mekisikoú, ha ʻaho ʻe ua ke nau ʻaʻahi ai mo tokoni ki he houʻeiki fafine uitoú mo ha ngaahi fāmili kehe pē ʻi he uōtí. Naʻa nau hivaʻi ai ha ngaahi himi, tokoni ʻi hono fafanga ʻa e fanga moá mo fakahoko ha ngaahi ngāue ʻi fale ʻi ha niʻihi ʻo e ngaahi ʻapí.
ʻI Palāsila he Nōvema ʻo e 2008, naʻe hoko ai ha tāfea fakataha mo ha ʻuha pea mo ha holo ʻa e kelekelé. Naʻe maʻu ʻi he akó ha kiʻi tohi naʻe tufa ʻo kole mai ha ngaahi tokoni. Naʻá ku foaki ai ha tangai koloa kehekehe fakataha mo ha kiʻi loli afi vaʻinga pea mo ha ongo kā vaʻinga fakapolisi.
ʻInāsiō F., taʻu 4, Palāsila
ʻOku ou manako ke tokoni ki ha taha ʻo hoku kaungā kalasi ʻi he akó. Ko hono hingoá ko Alesenitulō, pea ʻokú ne fie maʻu ha tokoni lahi. ʻOku ofi ʻaupito ʻemau kau faiakó ki ai koeʻuhí ko ʻene ngaahi fie maʻú, pea ʻoku ou tokoni ke ne fakahoko ʻa e ngaahi meʻa ʻoku kole mai ʻa e kau faiakó ke mau faí.
Mātina Z., taʻu 7, ʻĪtali
ʻOku mau ongoʻi fiefia ʻi he lava ke mau hivaʻi ʻa e ngaahi hiva ʻo e Palaimelí he lotú mo ʻemau faʻeé. ʻOku tokoni hono hivaʻi ʻo e ngaahi hivá ki he kakaí ke nau ongoʻi ai ʻa e Laumālié, pea ʻoku lele lelei ange ai ʻa e houalotu sākalamēnití ʻi he taimi ʻoku ʻiate kimautolu ai ʻa e Laumālié.
Sīpola B., taʻu 8, mo Selaia B., taʻu 10, Kuatilupu
ʻOnitulei O., taʻu 9, Kosita Lika
Kāinga Tokanga
Naʻe ʻave hoku kāinga ki he falemahakí he naʻe langa lahi hono keté. Naʻe pau ke fai ha ngaahi sivi lahi kiate ia. Naʻá ku fai ha tohi ki ai ʻo fakahā ange ke toʻa pea te u lotua ia. Naʻá ku faʻo foki ha tohi lelei pea mo ha kiʻi meʻalelei, ʻo mau ʻave ki he falemahakí. ʻI he taimi naʻa mau mavahe mai aí, naʻá ku maʻu ha ongoʻi lelei. ʻOku ou ʻiloʻi kapau te tau fai ha ngaahi angaʻofa ki he kakai kehé te ne ʻai ke tau ongoʻi fiefia pea te ne ʻai ke fiefia ʻa e Tamai Hēvaní.
Seiki S., taʻu 7, ʻAlapeta, Kānata
Ko ha Foki Taimi Tonu
Naʻa mau lolotonga kaukau ʻi he vai kaukauʻanga ʻi he hōtelé ʻo mau ʻilo ai ha kiʻi uasi he takele ʻo e vai kaukaú. Naʻa mau ʻeke ki ha kakai tokolahi pe ko ʻenau uasi. Naʻa nau talamai kotoa pē, ʻikai. ʻI he ʻosi ʻo e ʻahó, ne mau ongoʻi ʻoku totonu ke mau toe foki tuʻo taha mo e uasí ki he vai kaukaú. Naʻe ʻi ai ha fāmili ʻi he loto vai kaukaú. Naʻa mau ʻeke ange pe ʻoku ʻanautolu ʻa e uasí. Naʻa nau talamai ʻio, pea ko e uike kakato ʻaki ʻeni ʻenau kumi. Ko e uasi ia ʻa ʻenau tangataʻeikí, pea naʻe mamafa ʻaupito hono fakataú. ʻOku ou fiefia heʻemau fakafanongo ki he Laumālie Māʻoniʻoní kae lava ke fakafoki ʻa e uasí.
Hanitilī, Salapeti, mo Keilini C., taʻu 10, 9, mo e 7, Kalefōnia, USA
Tā fakatātaaʻi ʻo e uasí ʻe Joe Flores