Tohi ki he ʻĒtitá
Ko ha Mana ʻi Homau Fāmilí
Ne fai ʻe he fakamatala ʻa ʻEletā Siosefa B. Uefilini, “Tali Lelei ʻA Ia ʻOku Hoko Maí,” ʻi he Liahona (p. 26), ʻo Nōvema 2008, ha tokoni fakalaumālie ki heʻema taʻahine, naʻá ne foua kimuí ni mai ha taimi faingataʻa. ʻI he lolotonga ʻo ʻene feitamá, ne fakahoko ange ki ai ʻe he kau toketaá ha fakamatala ko hano sivi naʻe ongo fakamamahi—he ʻikai moʻui homa mokopuná.
Ne ʻomi ʻe he lotu fakafāmili fakaʻahó mo e lotu fakafoʻituituí, fakataha mo e fakamatala ko ʻení ha ʻamanaki lelei pea naʻe hoko ha mana ʻi homau fāmilí: naʻe fāʻeleʻi homa mokopuna tangatá. Naʻe pau ke nofo ʻi he falemahakí ʻi ha kiʻi vahaʻa taimi, ka ʻi ha māhina ʻe taha mei ai, ne ʻikai lava ʻe he kau toketaá ʻo fakapapauʻi ʻa e sivi ne nau fai ki muʻá.
ʻOku mau ʻilo ʻoku moʻui ʻetau Tamai Hēvaní pea pehē ki hotau Fakamoʻui mo e Huhuʻi ko Sīsū Kalaisí. Ko e Toetuʻú, moʻui taʻengatá mo e Tamai Hēvaní ko e meʻa moʻoni ia.
Kenatisi mo Tatiana Mitisenikō, Lūsia
ʻIkai ʻi he Sāpaté
Naʻá ku maʻu ʻi ha ʻaho ʻe taha ha tikite ki ha vaʻinga soka ʻe fakahoko ʻi ha ʻaho Sāpate. Naʻá ku telefoni leva ki hoku uaifí ʻo ʻeke pe ʻe fie ʻalu mo au ki he vaʻingá. Naʻe ʻikai ke ne tali mai, kae pehē mai ia, “Ko hoʻo aʻu mai pē ki ʻapí ni, lau ʻa e Liahoná.”
ʻI heʻeku aʻu atu ki ʻapí, ne u lau ai fekauʻaki mo ha finemui mei Palāsila naʻe ʻikai ke ʻalu ia ki he tau hau ʻo e Ipu ʻa Māmaní ʻi Falanisē koeʻuhí he naʻe fai ia ʻi he ʻaho Sāpate (vakai, Suzana Alves de Melo, “ʻIkai Ke Sio he Feʻauhi Ki he Ipu ʻa Māmaní,” Liahona, Sune 2007, 37). Naʻá ku ongoʻi ʻo hangē ko hano fakahā mai ʻeni ʻe he Tamai Hēvaní kiate au, “ʻOku ou ʻilo ʻokú ke manako he soká, ka ko e Sāpaté ko hoku ʻaho ia ʻOʻoku. ʻOua te ke ʻalu.” Ko ia, naʻe ʻikai ai ke u ʻalu ki he vaʻingá. Talu mei ai mo ʻeku kei lau pē ʻa e ngaahi lea ʻa hotau palōfitá. ʻOku hoko ʻa e makasiní ni ko ha kāpasa ki heʻetau moʻuí. Te ne fakamālohia kitautolu ʻi he māmani faingataʻá ni.
ʻEnitasoni Kapenieni, Palāsila
ʻOku ʻIkai ha Meʻa ke Fai Ki ai ha Ilifia
Kuo tō maʻu pē hoku loʻi matáʻ i he Liahona kotoa pē he lolotonga ʻo e taʻu ʻe valu kuo hilí.
Kuó u ʻiloʻi, ʻoku ʻi ai siʻa kakai kehe ʻoku faingataʻaʻia hangē ko aú. Ka koeʻuhí ko ʻetau fakamoʻoní, ʻa ia kuó ne fakamaʻu hotau tuʻunga fakalaumālié, he ʻikai ha meʻa ia te tau taʻe-malava ke ikunaʻi.
ʻOku hoko ʻa e makasiní ni ko ha fakahinohino mahuʻinga ʻi heʻeku moʻuí, pea ʻoku ou ʻilo ko e ʻuhinga ia ʻoku fakahingoa ai ko e Liahoná.
ʻEtuini ʻUlusia, ʻIlinoisi, ʻAmelika