Kae ʻOua ke Tau Toe Feʻiloaki
“Te Mou ʻIlo Au”
Naʻe afe ʻeku fakakaukaú ki he vaʻinga langatoi naʻá ku fakahoko mo hoku uaifí mo ʻema fānau īkí. Naʻá ma fie maʻu ke nau kumi kimaua, ka naʻá ma toe fie maʻu pē ke nau maʻu kimaua.
ʻI he fakaʻosi ʻo ʻemau lēsoni Lautohi Faka-Sāpaté, ne kole mai ʻa Sisitā Haati ke mau huke ki he Selemaia 29. Naʻá ne pehē te ne lau leʻo lahi ʻe ia ʻa e veesi 12–14, pea naʻá ne kole mai ke mau fifili ki he ʻuhinga ʻo e ngaahi leá.
Naʻá ne lau ʻo pehē, “Pea te mou toki ui kiate au pea te mou ʻalu ʻo lotu kiate au, pea te u fanongo kiate kimoutolu.
“Pea te mou kumi mo ʻiloʻi au, ʻo ka moú ka kumi kiate au ʻaki homou lotó kotoa.
“Pea ʻoku pehē ʻe [he ʻEikí] te mou ʻilo au …”
Naʻe hoko atu ʻa Sisitā Haati ʻo fakaʻosi ʻa e veesi 14, ka naʻe nofo ʻeku fakakaukaú ʻi he talaʻofa ʻo e “Te mou ʻilo au.” Naʻá ku manatu ai ki he taimi naʻá ku vaʻinga langatoi ai mo hoku uaifi ko ʻEmá, pea mo ʻema fānau īkí. ʻI heʻene aʻu ki he taimi ke ma toi ai ka nau kumí, naʻá ma ʻai maʻu pē ke faingofua ʻenau maʻu kimauá. Naʻá ma longoaʻa he taimi ʻe niʻihi pe ʻai ke ʻilonga homa laʻi vaʻé koeʻuhí ke nau ʻilo vave kimaua. Naʻá ma faʻa toi he taimi ʻe niʻihi ʻi he feituʻu tatau pē. Naʻá ma fie maʻu ʻa e fānaú ke nau kumi kimaua, ka naʻá ma toe fie maʻu pē foki ke nau maʻu kimaua. Naʻá ma sioloto atu ki heʻenau fāʻofua kiate kimauá, mo ʻenau kakata makiʻikiʻi fiefia heʻenau mālohí.
ʻOku fakalahi ʻe he manatu ko ʻení ʻa e mahino kiate au ʻoku ʻofa mai ʻa ʻetau Tamai Hēvaní kiate kitautolú. ʻOkú Ne fie maʻu ke tau kumi Ia, ka ʻokú Ne toe fie maʻu pē ke tau ʻilo Ia—ʻokú Ne ʻafoʻi ʻa e fiefia te tau maʻu ʻi he taimi ʻoku tau ʻilo ai Iá. ʻOku ʻikai feinga Ia ke Ne kākaaʻi kitautolu. Ka ʻokú Ne fai ʻa e meʻa kotoa pē ʻokú Ne lavá ke tokoniʻi kitautolu ke tau ʻiloʻi ʻa e feituʻu mo e founga ke kumi aí: ʻOkú ne foaki mai ʻa e folofolá, ui ha kau palōfita, fanongo ki heʻetau ngaahi lotú, tataki kitautolu ʻi he mālohi ʻo e Laumālie Māʻoniʻoní, tāpuakiʻi kitautolu ʻaki ha ngaahi temipale mo e ngaahi ouau ʻo e lakanga fakataulaʻeikí pea mo ha fāmili mo ha ngaahi kaungāmeʻa. Pea kapau ne tau maʻu tuʻo taha Ia ʻi ha feituʻu, kuo pau pē ke tau toe ʻilo ia kapau ʻoku tau loto ke fakafoʻou ʻetau kumí.
“ʻOku pehē ʻe [he ʻEikí] te mou ʻilo au.” Ko ha talaʻofa fakanonga moʻoni ia! ʻI he māmani ko ia ʻoku hangē ʻoku ʻilongofua ai kitautolu ʻe he palopalemá mo e ngaahi fakatauelé, ʻoku fakalotolahi ke tau ʻilo ʻoku faingofua pē ke ʻilo hotau maʻuʻanga ivi maʻongoʻonga tahá.
Tā fakatātaaʻi ʻo e ʻatá ʻe David Stoker