Taimi Feʻinasiʻakí
Tohinoa ʻo e Folofolá
ʻOku maluʻi au ʻe he mālohi ʻo e folofolá mei he angahalá.
Ko e mālohi ʻo e folofolá ko ha mālohi ia ke ikuna.
Mālohi ʻo e folofolá! ʻOku fie maʻu he ʻaho kotoa
Ko e mālohi ʻoku ou maʻu he taimi kotoa pē ʻoku ou lau aí.1
Ko e folofolá ko e lekooti ia ʻo e ngaahi akonaki ʻa e ʻOtuá mo ʻEne ngaahi fengāueʻaki mo ʻEne fānaú. Ko e tohinoa ʻo e folofolá ko hoʻo tohi pē ia ʻaʻau te ke lava ʻo hiki ai ʻa e founga hoʻo feinga ke mahino pea mo moʻui ʻaki ʻa e ngaahi akonaki ʻo e ongoongoleleí. Te ke lava ʻi he māhina kotoa pē ʻo e taʻú ni ke ako ha potufolofola mo ako ke fakahoko ʻa e meʻa ʻokú ne akoʻí. ʻE tokoni atu ʻa e Tamai Hēvaní ʻi hoʻo fili ke ako mo moʻui ʻo fakatatau mo e folofolá. Te ke ongoʻi ʻa e mālohi ʻo e folofolá, pea ʻe tupulaki mo hoʻo fakamoʻoní.
Founga ke Fakaʻaongaʻi ai Hoʻo Tohinoa ʻo e Folofolá
Ngaohi pe fakatau haʻo kiʻi tohi ʻoku ʻi ai ha peesi ʻe 12 pe lahi ange. ʻE ʻi he ngaahi tatau ʻo e Liahona he taʻu ní ha ngaahi potufolofola mo ha ngaahi ʻekitivitī ke ke fakahoko ʻi hoʻo tohinoa ʻo e folofolá. Kapau te ke fie maʻu ha tokoni ʻi hono laú, pe ke mahino ʻa e folofolá pe ʻekitivitií, te ke lava ʻo kole ki hoʻo ongomātuʻá, ki ho ngaahi tokoua lalahí pe tuofāfiné, ngaahi kaungāmeʻá, pe kau faiako ʻi he Palaimelí ke nau tokoni atu.
Tohinoa ʻo e Folofolá ʻi Sānuali 2010
Lau ʻa e ʻuluaki tefito ʻo e tuí. Te ke lava ʻo maʻu ia ʻi he Mataʻi Tofe Mahuʻingá.
Lotu ke ke ʻilo ʻoku moʻoni ʻa e tefito ko ʻeni ʻo e tuí. Kole ke ke ongoʻi ʻa e ʻofa ʻa e Tamai Hēvaní mo Hono ʻAlo ko Sīsū Kalaisí. ʻOku ui ʻa e ʻofa ko ʻení ko e ʻofa faka-Kalaisi.
Ako maʻuloto ʻa e tefito ko ʻeni ʻo e tuí.
Fili ha taha ʻo e ngaahi ʻekitivitī ko ʻení, pe faʻu haʻo ʻekitivitī pē ʻaʻau:
-
Tokoniʻi ha taha kehe ke ne ako ʻa e potu folofola ko ʻení.
-
Lotua ha taha kehe ke ne ongoʻi e ʻofa ʻa e ʻOtuá.
-
ʻI he taimi ʻoku tau ongoʻi ai e ʻofa ʻa e Tamai Hēvaní mo Sīsū Kalaisí, ʻoku tau tui ai kiate Kinaua. ʻOku tau tui ko e fānau kitautolu ʻa e ʻOtuá. ʻOku tau fakahaaʻi ʻetau tui ko Ia ʻetau Tamai Hēvaní, ʻaki ʻetau fakamālō kiate Ia koeʻuhí ko hotau ngaahi tāpuakí. ʻI hoʻo sio ko ia ki he meʻa fakaʻilonga ʻoku tatau he fakaavaʻanga ʻo ho matapaá (vakai ki he peesi 67), fakakaukau leva ai ki he ngaahi tāpuaki kuó ke maʻu he ʻaho ko iá.
ʻOku founga fēfē ha tokoni e meʻa kuó ke ʻosi faí ke mahino ai ʻa e potu folofola ko ʻení?Hiki ʻi hoʻo tohinoá ʻo fekauʻaki mo e ngaahi meʻa kuó ke faí, pe tā ha fakatātā ʻo e ongo ʻokú ke maʻu hoʻo ʻilo ʻoku ʻofa ʻa e Tamai Hēvaní mo Sīsū Kalaisi ʻiate koé.
Ngaohi ha Fakaʻilonga ke Tautau he Fakaavaʻanga ʻo e Matapaá
Kosiʻi ʻa e foʻi fakaʻilonga ʻi laló ke tautau he matapaá. Peluki ʻa e fakaʻilonga ki he matapaá ʻi he laine motumotú. Fakakaukau ki he ngaahi tāpuaki kuo foaki atu ʻe he Tamai Hēvaní peá ke hiki kinautolu ʻi he lisí. Tautau ʻa e fakaʻilonga ki he meʻa fakaavaʻanga ʻo e matapaá ʻi ha feituʻu te ke toutou sio ai ki ai.
Kuo faitāpuekina au ʻe he Tamai Hēvaní ʻaki ʻa e:
Toʻohemá: tā fakatātaaʻi ʻe James Johnson; toʻomataʻú: tā fakatātaaʻi ʻe Maryn Roos